کيمليييميزي دانان سئوگي مکتوبو

يئني تحصيل ايلي موناسيبتي ايله

يارپاق قزئتي‌نين باش يازاري ايواز طاهانين ايراندا يئني تحصيل ايلي‌نين باشلانماسي موناسيبتي ايله شاگيردلر و اؤيره‌نجي‌لره آچيق مکتوبو

ايراندا 14 ميليون شاگيرد و 3 ميليونا ياخين اؤيرنجي تحصيل اوجاق‌لارينا گئتديلر. مکتب‌لرين زنگي‌نين چالينماسي ايله صينيف‌لره يوللانميش بو اوشاق‌لارين 60 فايزي‌نين آنا ديلي فارسجا دئييل. اونلارين اکثريتي آذربايجان تورکجه‌سينده، قالاني ايسه کورد، عرب و باشقا ديل‌لرده دانيشسالار دا، مکتب و بيليم‌يوردلاردا فارسجا دانيشيب يازماق مجبوريتينده‌ديرلر

پرئزيدئنت احمدي نژاد بو مجبوريتي اونوداراق محبت آنلاميني داشييان  “مهر”  آييندا مکتبه گئده‌ن اوشاق‌لارا سئوگيدن دانيشدي: «امينم کي، بو ايل ده بيزيم گنج نسليميز عدالت، سئوگي بسله‌مک و اؤلکه‌نين هر طرف‌لي اينکيشافينا داير سؤزلري اؤيرنه‌جک».

 منجه بو سؤزلر “عدالت”ي هايقيران پوپوليست سياستچي‌لرين يالنيز عدالتسيزليک دوغوران ايقتيصادي گؤتوروشونون باشقا بير گؤستريجيسي‌دير. يوخسا کيم بيلمير کي، ديلي دانيلميش هر بير وارليق، “کيمليک”  گرگينلييينه سوروکله‌نه‌رک اينکيشاف ائده بيلمز. عدالتدن، سئوگيدن و اينکيشافدان بو ساياق دانيشماق، اوشاق‌لارين گؤزونه باخاراق اونلارين هم قران کريمده، هم آناياسادا، هم ده اولوس‌لار آراسي اينسان حاق‌لاري بيان‌نامه‌لرينده آچيقجا  وورغولانميش ديل و دوشونجه آزادليغيني آياق آلتينا آليب تاپدالاماقدان باشقا بير شئي دئييل دير.

 صؤحبت  «بشريتين ان گؤزل، بيتكين، و ان ياخشي طالعي‌»ندن گئديرسه، گوج قورولوش‌لاري و گوج کورسولرينه ديرسک‌لنميش آدام‌لارين سئوگي مکتوب‌لاري تکجه سوسقون کوتله‌يه ارمغان ائديلمه‌مه‌لي‌دير، حاققيني ايسته‌ين وطنداش‌لارا دا گؤنده‌ريلمه‌لي‌دير. يوخسا آغزيني آچيب ان واجيب، ايلکين و دانيلماز حاققيني، يعني آناسي دانيشان ديلده دانيشماق ديله‌ييني ديله گتيره‌ن‌لرين يئري حبس‌خانالارين قارانليق گؤزلري اولورسا، او محبت مکتوب‌لاري اسيرليک بلگه‌سينه چئوريله‌جک.

سئويملي اؤيره‌نجي‌لر! اؤز آنا ديلينيزي مومکون يول‌لارلا اؤيرنمک‌له گئرچک کيملييينيزي قورويون.

 سئوگي‌لر و سايقي‌لارلا

ايواز طاها

تبريز،  1 مهر 1387

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *