رادیکال دیلک‌لر | ایواز طاها

 

 

سیزلر اوچون دیلک‌لریم وار،
آیدان آری، سودان دورو:

*
گله‌جک یولونوز هامار،
گؤزلرینیز ایشیقلی،
وجودونوز ساغلام،
ایش‌لرینیز اوغورلو،
یاشامینیز موتلو،
کؤنول‌لرینیز گول‌تکین اولسون.

*
وارلیغینیز آنلاملیغا،
یاشیللیغا،
اوسساللیغا،
اینسانلیغا تام بویانسین.
بیلگی گلسین؛
منلی، سنلی اوغوز نسلی بیلیملنسین؛
خورافه‌لر یوخا چیخسین؛
سؤیلنتی‌لر،
جفنگیات،
آغ یالان‌لار بایرام تونقالیندا آلوولانسین.
دوشونجه‌میز لیللنمه‌سین؛
دیلیمیز اوخول‌لاردا دیل آچیب، دیللنسین؛
اؤزگورلوک قاناد آچسین؛
برابرلیک ایشیق ساچسین.

*
گون گلسین،
آماج‌لار آراج‌لارا قوربانلیق گئتمه‌سین ؛
یاشام “اولو قاورام‌لار”ا یئنیلمه‌سین؛
چالیشان أل‌لرله،
دانیشان دیل‌لرله،
دوشونن بئیین‌لرله،
وارلی- یوخسول ایکیلییی
سیلکه‌لنسین؛
اوجقار- اورتا چلیشکیسی چیچکلنسین،
قابار أللی یوخسول اینسان دیله گلسین،
گوج قارانسین، بیلینجلنسین، زنگینلشسین،
گئریلیک دئوریلسین؛
دولانسین توپلومون دامارلارینی اینکیشاف قانی؛
آدلاسین اینسان‌لار
اؤلولر گله‌نه‌ییندن دیری‌لر گله‌جه‌یینه.

*
گون گلسین
کور نیفرته قلم چکک
دوشمنچیلیک دویغوسوندان
آخماقلیق‌لار اویغوسوندان
منجیللیک‌لر باسقیسیندان قورتولوب دا
تاپیناراق حقیقتین اوجاغینا،
ظولمو داناق
دیره‌نیشچیل سیاستی موتلولوغون یولو ساناق.

*
او گون گلیرسه
آغری‌لار، آجی‌لا‌‌ر اوغورا چئوریله‌جک،
آلچاقلیق‌لار ایسه اونورا.
او گون گلسین
بوتونچولوک خولیالاری اونودولسون،
پلورالیسم ایشیغیندا
توپلوم، چات‌لاریندان نفس آلسین.

*
گون گلسین
قانداشلیقدان یوردداشلیغا
آیری‌سئچکی‌لیکدن یولداشلیغا
سارسینتیدان اؤزنه‌لییه،
دوگماتیزمدن دؤزوملولویه
گؤرکمدن گئرچه‌یه
اوخلوسدان اولوسا،
میتوسدان لوگوسا
ناغیلدان عاغیلا
ساواشدان باریشا
یاریشا یاریشا کئچه‌ک.

*
گون گلسین
ساندیغین یوخ، یاندیغین سئوگی بوللوغوندا
أخلاقا گره‌ک قالماسین؛
یاسالار یئنیدن یازیلسین؛
اینسان‌سئومز یاساق‌لار قالدیریلسین؛
دئسپوتیزم دیز چؤکسون؛
زوپالاردانسا دوشونجه‌لر چارپیشسین؛
یولازشما اورتامیندا
أیری أل‌لر قورولوشو چات گؤتورسون،
ایری قودرت آنلاییشی داشا دییب پارچالانسین؛
دؤولت اولسون اؤزگورلویون، ائشیتلییین داشییجیسی،
کوتله‌لرین آلچاق‌کؤنول قوللوقچوسو.
گون گلسین، مؤجود دوروم چالخالانسین،
رادیکال دئموکراتییا بایراغی
ساعات قاباغیندا دالغالانسین.

*
بیر دیله‌ییم ده دیلک‌لر باره‌سینده‌دیر
سئویملی شاعیر دیلیندن:
«توکنمز رؤیالار دیله‌ییرم سیزه
و بیر نئچه‌سی چین اولاجاق چیلغین آرزیلار.
سیزه سئومک ایسته‌دییینیزی سئومه‌یی دیله‌ییرم
اونوتومالی اولدوقلارینیزی اونوتماغی
سیزه چیلغینلیق، دینجلیک، باریش دیله‌ییرم.
سیزه قوش‌لارین ماهنیسیلا
اوشاق‌لارین گولوشلریله اویانماغی دیله‌ییرم.
سیزه سارسیلمادان دایانماغی
دیله‌ییرم
بو زامانین دورغونلوندا، قایغیسیزلیغیندا،
اؤزونوز کیمی، اؤزونوز کیمی اولماغینیزی دیله‌ییرم.»

*
زامان بوروندوسه دییشیم اراده‌سینه،
تیکانللی مفتیل‌لر نه‌یه‌سه یاراماز،
دوغویا باخ!
سئوگی آیه‌سی اوره‌یه قوندو.

___
15مارت 2017
سون رئداکته 18 مارت 2018

ایواز طاهانین “سیمگه‌سل دونیا/جهان نمادین” باشلیقلی چیخیشی

اسفند آیی‌نین 6-سیندا شهید مدنی آذربایجان بیلیم یوردوندا آنا دیلی گونو موناسیبتی ایله مراسیم کئچیریلدی. بو مراسیمده ایواز طاها “سیمگه‌سل دونیا/جهان نمادین” باشلیغی آلتدا چیخیش ائتدی.

طاهانین نظرینجه اسکی فلسفه‌ده گئرچکلیک و دوشونجه‌نین (ذهنین و دونیانین) ایلگی‌لری موباحیثه موضوعسودور، آمما ایییرمینجی عصردن دیل ده دؤره‌یه‌یه گیریر و بیر D اوچلویو یارانیر: “دیل، دوشونجه و دونیا”. بو یؤنه‌لیش فرگه‌دن باشلایاراق ویتگئنیشتایندا زیروه‌یه قالخیر. سونرا آنالیتیک فلسفه‌ده، دیلچیلیک‌ده، پسیخولوگییادا، قورولوشچولوق و پست‌قورولوشچولوقدا او قدر وسعت آلیر کی، 20-جی یوزایللییی “دیل عصری” آدلاندیرساق یانیلماریق.

طاها سؤزلری‌نین داوامیندا “دیل دوشونجه و دونیا” قاورام‌لا‌ری‌نین قارشیلیقلی ایلگی‌‌لرینی آراشدیردی، ویتگئنشتاین و ساپیر-وورف فرضیه‌لری اساسیندا بو سوالا جاواب آختاردی: دوشونجه دیلدن اؤنجه گلیر، یوخسا دیل دوشونجه‌دن؟ باشقا سؤزله، دیل دوشونجه‌نین آنلاتیم آراجی‌دیر، یوخسا دوشونجه‌نی فورمالاشدیران دیلین اؤزودور؟

Essensiyalizm və Damğa | Eyvaz Taha

Essensiyalizm və ya özçülük ne deməkdir? Onun totalitarizmlə necə bir ilgisi vadır? Özçülüyə inan şəxs niyə pluralizmə inanan bilməz? Damğa və ya yarlıq nə deməkdir? Damğa hansısa bilgini ehtiva edir, yoxsa güc strukturlarının bəlli bir kəlməyə yüklədikləri məna salxımıdır?

Eyvaz Taha bu suallara cavab verir.