“آنجاق” سؤزجوٍيو رسمي ديلده داها چوْخ «يالنيزجا» و «تکجه» آنلامینی داشييير.
ـــ ايندي دنيادا يوْل‌لار يوْخ، آنجاق کوٍچه‌لر وار. (ح.هئريسچي) لازیمسا جهالت‌له گوٍلشمک؛ بير چاره وار، آنجاق يئنيلشمک. (ح.جاويد)
“آمما” سؤزوٍ ايسه، جومله‌لري و جمله عضولريني بيرلشديره‌رک قارشيليق بيلديرير، باغلاييجي وظيفه‌سيني يئرينه يئتيرير.
ـــ آت قوْجادير، آمما چوْخ گوجلودور. سيزه گلرديم، آمما واختيم يوْخدور.
“آمما” سؤزجویو عربجه‌دن آلینما اولسا دا آرتیق دوغمالاشمیشدیر. اوندان “آممالی” [مسئله‌لی] کیمی سؤزلر ده یارانمیشدی. منجه بئله بیر اؤنملی، ییغجام باغلاییجی‌نین ایشلتمه‌سیندن چکینمک دیلی دارالدا بیلر. “اما” سؤزو منیمسه‌نیله‌رک آذربایجان تورکجه‌سینده “آمما” کیمی یازیلیر، ایستانبول تورکجه‌سینده ایسه “آما” کیمی. هله‌لیک بیرینجی واریانت دیلیمیزده رسمن ایشله‌نیر، لاکین تشدیدلی سؤزلرین تشدیدینی گئت‌گئده آتماغی دوشونوندویومدن بو ایکینجیسینه ده قارشی چیخمیرام.
“آنجاق” سؤزو بو گوٍنکو دانيشيق‌لاردا داها چوْخ «آمما، لاکين» آنلاميندا گئدير. بونا گؤره، يئري گلديکده هر ايکي معنادا ايشلنمه‌سينه قارشي چيخماق يئرسيزدیر.
_____________________
“نئجه یازاق” کیتابی‌نین بیرینجی جیلدیندن