ساده یول‌لارلا یازینیزی گؤزللشدیره بیلرسینیز. بو یول‌لارین بیری دورغو ایشاره‌لرینه [سجاوندی علامت‌لره] رعایت ائتمک‌دیر. مقصدیم ویرگول، نؤقطه، نؤقطه‌ویرگول، سورو ایشاره‌سی و دیرناق‌آراسی کیمی علامت‌لری یئرلی یئرینده ایشلتمک‌دیر. آنجاق منیم آماجیم بوندان دا ساده‌دیر.
* «نؤقطه، ویرگول» کیمی دورغو ایشاره‌لرینی اؤزوندن قاباقکی سؤجوزیه یاخین یازین، اونلاردان سونراکی سؤزو فاصیله‌لی یازین.
ــ بئله یازمایاق: یاشار ، فولیا وسارا گلدیلر . (ویرگول و نؤقطه اؤزوندن قاباقکی سؤزدن آرالی یازیلیبلار. “و” حرفی یانلیشجا اؤزوندن سونراکی سؤزه یاخین یازیلیب.)
ــ بئله یازاق: یاشار، فولیا و سارا گلدیلر.
بئله اولمادیقدا هم یازینیز قارماقاریشیق آلیناجاق، هم ده بعضن نؤقطه‌لر سطیرین سونوندان او بیر سطیرین باشلانغیجینا سوروشه‌جک.
* أک‌لری [پسوندلری] کؤک‌لره بیتیشیک و یا یاخین یازین. «سئچه نک لر [گزینه‌لر، آلتئرناتیولر]» کیمی بیر سؤجویون بؤلوم‌لری بیرـ‌بیرینه یاخین یازیلمالی‌دیر: سئچه‌نک‌لر. بئله‌جه یازماق اوچون آشاغیداکی گؤستریش‌لری گئرچکلشدیرین:
ویندوزلاردا ساده بیر سئچه‌نک ده وار. عینی سؤزون بیرینجی بؤلومونو یازدیقدان سونرا Ctrl و Shift دویمه‌لرینه باسیب ساخلاین. داها سونرا 2 دویمه‌سینه باسیب یازینیزی ییغماغی داوام ائتدیرین.
اؤنجه‌دن یازیلمیش یازی‌لارینیزدا دوزه‌لیش آپارماق اوچون یوخاریداکی ایشی گؤرون و سؤجویون بؤلوم‌لری آراسینداکی فاصیله‌نی Delete دویمه‌سیله سیلین.
*بو علامت‌لر ایکی یاندان سؤزه یاخین یازیلمالی‌دیر: ()، []، «»، {}.
بئله یازمایاق: ( اؤزنه )، [ نسنه]، «اوسسال »، { ۲ }.
بئله یازاق: (اؤزنه)، [نسنه]، «اوسسال»، {۲}.
* یانلیش یازیلیش: اونلارین چوره ک لری بولدو.اونلار« من »دئییللر ،منده «اونلار » دئییلم .
دوزگون یازیلیش: اونلارین چؤره‌ک‌لری بولدو. اونلار «من» دئییللر، من ده «اونلار» دئییلم.
سلام لار
هر واختینیز خئیر اولسون
بیر سورغوم وار ایدی!
((دوزگون یازیلیش: اونلارین چؤره‌ک‌لری بولدو. اونلار «من» دئییللر، من ده «اونلار» دئییلم.))
یوخاریداکی جومله ده «چؤره‌ک‌لری بولدو» اولمالی‌دیر یوخسا «چؤره‌ک‌لری بولدور» ؟؟!
چوخ ساغولون
ساده کئچمیش زامان نظرده توتولورسا “بولدو” اولمالی‌دیر، ایندیکی زامان ایسه “بولدور.”