داش داشیماقدان دا چتین گؤره‌ردیم شاعیرلییی. بیرجه شعر حاققیندا یازماغی شعردن چتین ساناردیم. آمما جواد مجابی‌نین خیرداجا بیر یازیسینی اوخودوقدان سونرا یانیلدیغیمی آنلادیم. گؤبه‌لک کیمی گؤیه‌رن شاعیر قوشونونون سایی بونون دانیلماز بلگه‌سی‌دیر. بو سیز بو دا شاعیر اولماق اوچون او جنابین اون گؤسته‌ریشی:
ـ تنقيد‌چي‌لري شاشیردان، عئيني حالدا اونلارين غرورونو سينديرمايان شئي‌لر يازين.
ـ البته اوخوجولاري دا حئيران قويمالي‌سينيز. بونون اؤزو ايسه اولدوقجا چتين‌دير. استراتژي باخیمیندان اوزون بير شعرده اوخوجونون باشا دوشدويو ان آزي بير سطرين اولماسي گره‌ک‌لی‌دیر. قالانيني باشا دوشمه‌سه ده عاليجنابليق اوزوندن ذهنيني اله آلابيلمه‌دييي حسابينا قوياجاق. مدرن دونياميزدا گئدن «آنلاماق ياريشيندا» گئري قالماسين دئيه، نه اينكي «باشا دوشمه‌ديم» دئمه‌يه‌جك، اوسته‌ليك شعرده‌كي بوش‌بوغاز‌ليق‌لاري تعريف‌له‌يه‌جك.
ـ باش‌يازارلا دوستلوق ائتمك، تنقيدچي ايله يولداشليقدان داها یارارلي‌دير. بو ايش، زيانين قارشي‌سيني داها قولايليق‌لا آلار.
ـ دارتیشما دوغورماق، کسکینلیکله تؤوصيه اولونور. یازیلی موناقيشه ال به ياخا اولماقدان داها ياخشي‌دير. سؤز دؤیوشدورمه، اؤزو ده ادبي سؤیلنتی‌لر [شايعه‌لر] شبكه‌سينده، ال وئریشلی ساييلير. آنجاق اوقده‌ر اولماسين كي، هميشه دؤيوله‌سينيز. کوتله، دؤيولن شعره اؤز قوجاغینی اوزون سوره آچا بیلمز.
ـ ياييم‌ائولری كتابينيزي چاپ ائتمه‌دييي تقديرده، اونو سانسور و تهلوكه‌سيز‌ليك سورون‌لارینا باغلايین. بونو ائده بیلسه‌نیز بؤيوك اعتبار قازانا بيلرسينيز.
ـ بوتون حريف‌لري دانماغا چاليشين. بو ايشي ان بؤيوك رقيب‌لر‌دن باشلايين.
ـ دونيا ادبياتي ايله تانيش اولماسانيز دا اؤزونوزو ساوادلي گؤسترين. بو ايش هئچ كيمي اؤلدورمه‌ييب.
ـ ائله داورانين كي، ائله‌بيل تاريخ، مدنيت و مدرنيزم سيزين‌له باشلاييب.
ـ املا و انشا یانلیشلیق‌لاری‌نیزین اوستو آچيلديقدا بي‌آبيرچيليق درجه‌ده سويوق قانلي‌ليق گؤسترين. «اينترنت دؤنمینده… [بونلاردان] دانيشماق بوش بوغازليق‌دير» كيمي سؤز‌لري تكرار ائتمك‌له قارشی طرفی چيخيلماز دوروما سالین. البته اؤنجه اونون اينترنتدن باشي چيخماديغيني اؤيره‌نين.
ـ هر بير ايراد قارشيسيندا اؤزونوزه تام اينام‌لا آشاغيداكي سؤز‌لري دئيين: «من بئله گؤرموشم، من بونو به‌يه‌نيرم، منه بئله الهام اولوب، شعر منه بئله يازديردي.»
ـ اؤزونه اينام، درين بيليكدن داها چوخ، درين آخماقلیقدان ايره‌لي گله‌بيلر. لاپ بيزيم بو يازيدا اون گؤستريش يئرينه اون‌بير گؤستريش اوخودوغونوزا باخماياراق اون‌ايكينجي و اينديليكده سونونجو گؤستريش بئله‌دير: کوتله‌نین آرتيق، يئني شاعير كشف ائتمك حؤوصله‌سي قالماییب.
بو گؤره‌وی اؤزونوز اؤز اوزه‌رينيزه گؤتوره‌رك هر يئرده و هر يول‌لا اؤزونوزو تبليغ ائدين. تئز و قولايليق‌لا قبول اولماقدان قورخمايين. اونوتقان و یئل‌بئیین دینله‌ییجی‌لر چوخدور.