منده سيغاريكن جاهان، من بو جاهانا سيغمازام
گؤوهر لامكان منم، كؤون و مكانا سيغمازام.
عرشيله فرش و كاف و نون، منده بولوندو جومله چون
كس سؤزونو اوزاتما كي، شرح بيانا سيغمازام.
كؤون و مكان‌دور آيتيم، ذاتي‌دوٍرور بدايتيم
سن بو نيشان‌لا بيل مني، من بو نيشانا سيغمازام.
كيسمه گومان و ظنّ ايله، اولمادي حققيله بيليش
حققي بيلن بيلير كي، من ظن و گومانا سيغمازام.
صورته باخ و معنيني، صورت ايچينده تاني كيم
جسميله جان منم ولي جسميله جانا سيغمازام.
گنج نهان منم من اوش، عئيني عيان منم من اوش
گؤوهر کان منم من اوش، بهره و کانا سغمازام.
جانيله هم جهان منم، دهريله هم زمان منم
گؤر بو لطيفه‌يي كي من، دهر و زامانا سيغمازام.
ذات ايله‌يم صفاتيله، قدر ايله‌يم براتيله
گوٍل‌شكرم نباتيله، بسته دهانا سيغمازام
شهد منم، شكر منم، شمس منم، قمر منم
روح روان باغيشلارام روح روانا سيغمازام…
شعرين رجز بحرينده يازيلديغينا گؤره، هميشه اونو دؤيوش‌له باغلاميشلار، نسيمي‌نين ايجتيمايي موباريزه روحو ايله. سانکي نسيمي دوشمن‌لري ايله دؤيوشور. من بونونلا تام راضيلاشميرام کي، بو شعر اوخونارکن «سانکي آغير بير گورز معين بير آهنگ‌له هاوادا دؤوره ووراراق آغيرـ آغير دميرچي زينداني اوسته ائنديريلير. بو گوٍرز آلتيندا قالان اشيانين ازيليب، دؤيولوب لازيمي شکيله سالينماقدان باشقا چاره‌سي، چيخيش يولو اولماديغي تأکيدله نظره چاتيريلير». رجز حربه‌ـ زوربا گلمک، دؤيوش زاماني مئيدان اوخوماق معناسيندادير. لاکين شعر بو دؤيوشدن اوزاقلاشاراق، قيزيل قانا بوياناراق مست اولموش شاعيرين تک‌باشينا سماع رقصي‌دير. دليجه‌سينه اؤزباشينا فيرلاناراق، بوتون ووجودونو اوينادان سؤزلرين سيررينه دالميش وورغونون رقصي: نسيمي‌نين اينانجينا گؤره، نسنه‌لري، اينساني، اولدوزو و سئوگيني يارادان “سؤز” دئييل‌مي؟ نسيميني ائتکيلنديرميش “منم من” رديف‌لي غزلي بونون ثبوتودور. غزل، رجز بحرينده يازيلسا دا، قونييه‌ني آنديرير، درويش‌لرين سماوي توخاقليق‌لا سماع رقص‌لريني. رقص ايسه اينجه‌صنعتين اؤزگون آنلامينا شعردن داها ياخين‌دير.
“شعر وارلیغین ائوی‌دیر” کیتابیندان