اورومچودان قاراچایاجان ایستانبول تورکجه‌سی | ایواز طاها

هارون قولچاغی آنارکن

پوپ موسیقیسینه خور باخیرام. دئمیرم قولاق آسمیرام، آسیرام. آمما سیلئندیونون داریخدیریجی ماهنی‌لارینا نیسبت آندرئا بوچئللی‌دن یورولمورام. لاکین بوتون بونلارا باخمایاراق پوپ موسیقی‌نین بعضن وازکئچیلمز سیمالاری وار. دوغرودور، نزار قبانی‌نین “قارئه الفینجان” شعری عبدالحلیم حافظین دیلیندن سسلندیکده آزقالا زامانین دونوب قالماسینی دیله‌ییرم. آمما بو، هئچ ده پوپ مغنی‌لری الیسا و یا ماجده الرومی سسینه احتیاجین اورتادان قالخماسی آنلامینی داشیمیر. (البته نزار قبانی هر بیر وورغون پوپ مغنیسینه سیاستی گؤزلجه هایغیرماغا سایسز میصراع‌لار باغیشلاییر.)

تورکیه موسیقیسینده ده بئله‌دیر. دئمک، بو موسیقیده نئشت أرتاشین ایفا طرزی، ائرول ائوگینین ایسه سس چالاری هارمونیک بیر دونیانین گؤزل آیرینتی‌لاری‌دیر. همین عالمده اوزان عاریف ساغین بیر یئری وار، عاشکین نوری یئنگی‌نین ایسه باشقا یئری. نیلوفر-کایاهان جوتلویو نه قده‌ر فرقلی، نه قده‌ر یاخین بیر دویغونون قایناغی‌دیرلار. البته سئزن آکسو اولمادان نه قده‌ر یوخسول گؤرونردی تورک موسیقی منظومه‌سی. بو آلاندا سس بویالاری داها چئشیدلی‌دیر، اؤز “سئودا سونای”یمیزدان توتموش عاشیق اسراری‌یه قده‌ر.* اوسته گل موسیقی اورتامی‌نین اوجقاریندا گزینن هارون قولچاق کیمی سئویملی مغنینی. هارون آز اوخویور، بلکه ده من یاخشی ایزله‌میرم. آمما خوش اوخویور. اونون سون ایکی دوئتی (بیری صحنه مدنیتی صفر سویه‌سینده اولان ارم دریجی ایله) بیزه بونو دئییر: ۶۲ یاشیندایکن سسین گوجو، ایفاسی‌نین ایسه پروفسیوناللیغی اولدوقجا اوره‌ک اوخشایان‌ آلینا بیلر. نه یازیق کی، هارون قولچاغی ایتیردیک. بونونلا دا موسیقی‌نین بیر رنگی سولدو.

تورک موسیقیسینده آرابئسکین بیله، دوغما و دانیلماز یئری وار. ایستانبول تورکجه‌سینی اورتاآسیانین درینلیک‌لرینده یایغینلاشدیران عامیل اورهان پاموک اولمادی؛ ایلبر آلتایلی اولمادی؛ یاووز باکی‌لرین دیل آخساقیلیق‌لاری باره‌ده درس‌لری اولمادی، گولنین اوخول‌لاری و اردوغانین آخارلی چیخیش‌لاری اولمادی؛ تورک پوپ موسیقیسی اولدو. اورومچودان قاراچایاجان تورک دونیاسینا ایبراهیم تاتلی‌سس و ماحزون قیرمیزی گولون آرابئسک‌لری ایستانبول تورکجه‌سینی اؤیرتدی. چوخ یئرده من بونون جانلی تانیغی اولموشام.

___________________

* سئودا سونای خانیما باشقا بیر یازیدا توخونماق گره‌ک‌دیر.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *