آلئن بديو بو موخالیف نغمه‌نين سيمگه‌سي‌دير. او، بيلگيني يالنيز مؤوجود دوروم‌لا ايلگي‌لنديرير: بللي اینتیظام اوزره فيرلانان حيات، گله‌نک‌لر، يارانميش اينجه‌صنعت اثري. بونلار گئرچک‌ليک‌لردير، بيلگي بونلارا عايددير. حقيقت آنجاق باش وئره‌جک اولايدان باش قالديرير: يئني دوشونجه‌دن، آنسیزین گؤز‌لردن جوشان سئوگي‌دن، اينديجه دوغان شعردن.
اینسانين دونياسي ايکييه بؤلونور: اينديکي دوروم و ايتکين اؤلکه [جامعه‌ي آرماني]. بؤلگونون بيرينجي يؤنو گئرچکليکله موتناظیردير، ايکنيجي يؤنو ايسه حقيقت‌له. بيلگيميز حقيقته دئييل، گئرچکلييه يؤنه‌لير. گونده‌ليک ياشام، اوتوروشموش عادت‌لر، دوشونوش طرزي و گله‌نک‌لر بيلگي [معرفت] دوشرگه‌سينده يئرلشير. بيزي دورغونلوق باتاقليغيندان چيکيب چيخاران“گؤزله‌نيلمز اولاي” ايسه حقيقتي يارادير. اولايدان مقصد سئوگي، ياراديجيليق، يئني دوشونجه و سياسی دئوريم. بو آلانين اؤزنه‌سي [فاعلي] ايسه اینسان‌دير. ايدئال آختاريشي گئديشينده گؤزه‌للييه وورولان، يارادان، دوشونن و دئوير‌ن اودور. اینسان يالنيز ايتکين اؤلکه آختاريشيندا انسانلاشير.
حقيقتي يالنيز اولاي‌لاردا آختارديقدا ايدئاليزمه قاپيلميريق کي؟ ذهنيتيميزي نسنللييين [عینیتین] يئرينه سیریميریق‌مي؟ بو، اون‌يئددينجي يوز ايلليکدن داها اؤنجه‌لره قاييتماق دئييل‌مي؟ آيدينلاما[روشنگری]نين نسنلليک‌له باغلي تاپیـنتي‌لارينا قیرمیزي قلم چکمک دئييل‌مي؟ “اولاي”ـا قاييتماق سؤيله‌دييميز آغير آجي‌لارا گؤزيومماق دئييل‌مي؟ اونوتماياليم: ياشام گله‌جک کيمي‌دير، اؤنجه‌دن يارانماييب، اونو عمل‌لريميزله ياراديريق. ياشام وئريلميش دئييل، اؤنجه مؤوجوديتي يوخ‌دور، لحظه‌ده يارانير. ياشامين مادي گوجو سئوگیده، بيليمده، فلسفه‌ده، صنعت‌ده‌دير. صنعت آکسياسي اولاي‌دير. ياشامين يارانماسينا، چيچکلنمه‌سينه، داوامينا گره‌ک‌لي اولاي. صنعتين باشليجا گؤره‌وي بيلگيلنديرمک دئييل، ائتکيلنديرمک‌دير. مسئله بوراسيندادير: ياشامين آرخاسيندا حقيقي دنيا يوخ‌دور، حقيقت ياشامين اؤزونده‌‌دير. صنعت اولاي اولاراقي ياشامي ياراديرسا، دئمک حقيقت ده اونون تؤره‌مه‌سي‌دير. اولاي اولمادان دوروم أيلنجه‌نين عفونتينده زهرله‌نه‌جک.