“سیاسال” سؤزو صیفت اولسا دا اونو ایسم کیمی ده ایشله‌دیرلر. بو، اینگیلیسجه the political ایصطیلاحی‌نین قارشیلیغی‌دیر. آذربایجان تورکجه‌سینده ایندییه قده‌ر ایشلنمه‌میش بو تئرمینین (بوندان اؤنجه اونو بیر نئچه کز قوللانمیشام) ایستانبول تورکجه‌سینده قارشیلیغی “سیاسال”دیر، فارسجادا ایسه “أمر سیاسی”.
“سياسال” تئرمینی گوج قورولوش‌لارينا (پوليس) قارشی اولدوغوندان آنلام قازانیز. و “سیاست” سؤزوندن ده فرقله نیر. سیاست اؤلکه‌نی دؤولت واسیطه سی ایله ایداره ائتمک قایدالاری دیرسا، سیاسال دولتین عینیلشدیریجی گوجونه قارشی دیره‌نیشین آدی‌دیر. ألبته بعضن سیاست سؤزو سایسال آنلامیندا دا ایشله نیر. بئله کی، کوتله پولیتیکا یوروتمک‌له پولیسدن آییریلیر. پولیس کيمليک‌لري نیظام‌لي بيچيمده پايلايير؛ توپلومون هر بير آيرينتيسي‌نين، هر بير اويه‌سي‌نين يئريني دقيق معينلشديرير. سياسال ایسه بو سيستمي داغيتما گيريشيمي‌دير.
باشقا سؤزله، پوْليس اينديکي دورومون گوٍدوٍکچوٍسودور، سیاسال ايسه اينديکي دورومو سوْرغويا چکمک گیریشیمی. بونلاري بير-بيريندن آييٌران سيٌنيٌر، تيتره‌ک و سيٌييٌق اوْلسا دا آنلاملي‌دير. پوْليس ایجتیماعی گئديش‌لري ایداره ائديب، جيلوْولايير. فردلري صينيفلنديرير، يعني اوْنلاري گؤروٍنرده ساخلايير. بوٍتوٍن اوْلاي‌لارا اینتیظام باغيشلايير، هرنه‌يي قانون چرچيوه‌سينه سيخناشديرير، فرقلی‌لیک‌لره ياغي تصووورو ایله، يابانچي گؤزله باخير، اوْنلاري ديٌشلايير. بوٍتوٍن بونلارا قارشي چيخماق ايسه قورتولوشچو سياستین، و داها دقیق دئسک، سیاسالین ايشی‌دیر. اوتوروشموش عنعنه‌لری سورغویا چکمک، ائگه‌منلیک قازانمیش سؤیلم‌لری دئویرمک، أبدی حقیقت کیمی قلمه وئریلمیش أخلاقی ده‌یرلری شوبهه بورولغانینا سوروکله‌مک، رئاللیغین رمزی کیمی تانینمیش علمی فورماسیلار و موسسه‌لرده چات یاراتماق، و نهایت سؤز سؤیله‌مه ایمکانینی ایتیرمیش کوتله‌یه ایفاده آزادلیغی باغیشلاماق وظیفه‌سی سیاسالین اوزه‌رینه دوشور.
ایواز طاها