“کیملیک‌چی سیاست…” حاققیندا رأی سورغوسو

بوندان اؤنجه بیر کیتابیم سانال اورتامدا [مجازی فضادا] یاییلمیشدی. کیتابین آدی “کیملیک‌چی سیاست باره‌سینده پاتولوژیک تئزلر“دیر [تئزهایی آسیب‌شناختی در باره‌ی سیاست‌های هویتی]. کیتاب، آدیندان بللی اولدوغو کیمی، پاتولوژیک ماهیت داشیییر. بونون اوچون اوندا گئدن سهولر اوخوجو کوتله‌سینه ایسته‌نیلمز ائتکی بوراخا بیلر. مقاله‌نین منیم اوچون حیاتی اؤنم داشیدیغینا گؤره، سایین فیکیرداش‌لارین تنقیدی باخیشینی اؤیرنمک ایسته‌ییرم.  

ریجا ائدیرم:

ــ کیتابدا سیزین اوچون قاورانیلماسی چتین اولان باشقا سؤز، جومله و پاراگراف وارسا بیزه یازین.

ــ مقاله‌ده گئدن تارتیشمالی مقام‌لار، آنلاشیماز بؤلوم‌لر و یول وئریلمیش یانلیش‌لار نظرینیزی بیلدیره‌سینیز. ــ

ــ کیتاب هانسی یؤنده گئنیشله‌نه بیلر؟ سیزین ده کیتابا آرتیریلاجاق سوژئتلرینیز وارمی؟

ــ واختینیز آزدیرسا مقاله‌ده گئدن تئزلرین بیرینی و یا بیر نئچه‌سینی اوخویوب آنالیز ائتمه‌یینیز منه یول گؤستره بیلر. ــ

 ــ مقاله‌نی آنالیز ائده‌جک باجاریغا مالیک باشقا آدام‌لار تانیییرسینیزسا لوطفن منی بیلگیلندیرین.

سایغی‌لار و سئوگی‌لرله

ایواز طاها

 

One Reply to ““کیملیک‌چی سیاست…” حاققیندا رأی سورغوسو”

  1. □ اوچونجو آدديم

    يازين سوْن آيي ايدي. اؤنوٍمده‌كي تارلادا آرا ـ‌ سيرا قوش‌قوْوان-لار [مترسک¬لر] گؤروٍنوردو. گوٍن¬اوْرتا ايستي‌سينده بيچين‌چي‌لر دريزه سؤيكه‌نيب دينج‌لريني آليرديلار. اوْنلار ساخسي بارداق-لاردا آيران ايچينجه، قوش‌قوْوان¬لار تارلاني قوْروُياجاقديلار. سرچه سئلي يئره ائنركن، يئل ووروب قوش¬قوْوان¬لارين چيينينده‌كي يايليغي تيتره‌ديردي. خيرداجا بير ترپه‌نيشدن اوٍشو‌ٍنَن سرچه، يئره ائنمه‌ميش گؤي اوٍزونه ديرمانيردي. بس ايندي، نه بير بوداق، هئچ اوْلماسا ياشيل بير يارپاغين دَبَرمه‌دييي واختدا سرچه‌لر نه‌دن هوٍركورلر؟ غريبه‌دير، قوش¬قوْوان¬لارين بيري عمللي‌باشلي يئرييير، توٍفنگ الينده. سرچه‌لر يانيليرلار، قوش‌قوْوان دئييل‌ بو، قاش‌قاباقلي دَييرمانچي‌دير.
    دوٍنن دييرمانا گلن¬لر دَن‌لريني دارتا بيلمه‌ديلر. سو اوْلماياندا دَييرمان ‌دا ايشله‌مير. هردن بئله اوْلور. هاوالار قوراقليق كئچنده، سويو ييخان چوْخ اوْلور. سن آرپا زمي‌سيني سوُواريركن، قارشي طايفادان كيمسه گلير سويون آخاريني دَ‌ييشديرير، آرپاليق‌ قالير يانا‌يانا. آمما دييرمانچي‌نين نؤوبه‌سي گوٍنو، سويو ييخيرديلارسا، هم دييرمان ياتيردي، هم ده تارلا يانيردي.
    داغ اته‌يينده‌كي اوْبالاردان گتيريلن بوغدالار، تاي‌تاي ائششك‌لره چاتيلميشدي. اوْوسارسيز ائششك‌لر چاي اوُزونو صف چكميشدي دَ‌ييرمانين قاباغيندا. دَ‌ييرمان داشي فيرلانديقجا، آغيزلاريني چايا داياييب، سو ايچن حئيوان‌لاري، بيربير چكيرديلر ايچه¬ري. «گلين بو تاي‌لاري آشيرين بوغدا قازاني‌نين ايچينه.» سو دَ‌ييرماني آرتيق سوٍرعتله ايشله‌ميردي.
    آلنيني دايادي پنجره‌نين توْزلو شوٍشه‌سينه. آرخين ديبينده‌كي چايلاق داش¬لارينا باخدي. بوْينونداكي يايليغين اوُجويلا تَريني سيلدي، موٍشدويونو سوْمورا سوْمورا:
    ـ نئجه ائله‌ييم آخي؟ گوٍنده سويو ييخيرلار، د‌ييرمان ياتير. بو گوٍن بيزيم سو نؤوبه‌ميزدير، آمما كيمه دئيه‌رسن ـ دئدي دَييرمانچي.
    گئت¬گئده سو قورودو. «ايكينجي‌ دؤنه قان تؤكمك ايسته‌مير‌م» سؤيله‌مك ايچيندن كئچسه‌ ده، صانديقدا گيزله‌دييي توٍفنگي چيخاردي. قوْخلادي. بوْز كئچه‌يه بوٍکدويو توٍفنگين لوٍله‌سيندن هله باريت قوْخوسو گئتمه‌ميشدي. قيلينج داواسي يالان¬ديرسا، قيرخ ايل قاباق، بو لوٍله‌دن آچيلان گوٍلـله، باباما دَيميشدي. «دوٍز آلني¬نين اوْرتاسيندان ووردوم» دئييردي دَييرمانچي. اوْنو دئييردي، يوْخسا باشقاسيني، بيلميرم. آخي من بيلن بابام قيلينج ياراسيندان اؤلدو. اوْ گوٍن آيازبَيلي‌لرين انتقاميني آليردي، بو گوٍن آنجاق سويو گتيرمه‌يه گئدير. ته¬تييي [ماشاني] يوْخلاييب، لوٍله‌ني قاتلادي. بيرجه قورشون يئتر.
    گلدي داياندي بولاغين باشيندا. اؤزوٍنو سودا گؤر‌ن كيمي اَييليب اوٍزونو يوياردي، يومادي. هئچ اليني باشينا دا چكمه‌دي. توٍفنگي قوْيدو بولاغين قيراغينا، آياغيني چيرمالاييب، دوٍٍشدو سويا. سويون آخاريني د‌َييشن داش‌لاري يانا ووُرمالييدي. بير داش، ايكي داش، بئش داش. سوْيون هاميسي قاييتدي دَييرمان آرخينا. آياق اوٍسته دوٍزه‌ليب، آلني‌نين تريني سيلدي. چؤندوٍ كي، قايايا باخسين، ائله بيل تپه‌سينده ايلديريم چاخدي. هاردان‌سا بيلمير گوٍلـله آچيلدي.
    قورشون جانلي هدفه توْخونماسايدي، گوٍلـله‌نين سسي بوُنجا توُتوُق گلمزدي. بوٍدره‌يه‌ بوٍدره‌يه يئريدي. بئش آدديم، اوْن آدديم. ايندي‌كي كيمي. قان، آغ كؤينه‌يي‌نين قوْلوندان آخدي، بارماق¬لاري‌نين اوجوندان يئره داما داما. قيوريلدي. دييرمان داشي¬دير بو آدام بلکه؟ اؤز باشينا فيرلانماق‌مي ايسته‌يير، يوْخسا قايايا ساري چئوريلمك‌مي؟ آياق¬لاري گَلَر گلمز قايايا ساري دؤندوٍ. قانلي گؤزلريني يومدو، آچدي. سوْنرا ائله‌بيل آغير داش‌هيئكلي يئره قاپاندي.
    توْز قوْپدو، بيچين‌چي¬لر اوْيانديلار. آيراني تزه‌جه ايچميش آدام¬لار آزاجيق هوشلاناجاقديلار، سوْنرا آياغا قالخاجاقديلار، آت آرابالاري گله‌جك‌دي. بوغدا دَريزلريني يوٍكله‌ييب، ياماجدان كنده ائنه‌جكديلر.
    داها دريز قالماميشدي. سوْن آرابايا اوْنون اؤلوٍسونو يوٍكله‌ديلر. اوجا بوْي مئييدين قوْل¬لاري آرابانين آرخاسيندان ساللانيقلي قالدي. هميشه‌كي قومسال يوْلدان يايينيب، يوْوشانليقدان قاييدان آرابا، دره‌دن قالخدي. هئچ دئييرسن يوْخوشو قالخميردي آت¬لار؛ تَكَرلري بير قاريش توْرپاغا سانجيلان آراباني اوٍزو يوخاري چكميردي اوْنلار. قوش كيمي گئديرديلر. بئله آنلاردا آرابا گئدير، قاتيلين ائوي قارشي‌سيندا دايانيردي. بيزده قان قاني يويور؛ نئجه اؤلدوٍرورسن ائله‌جه ‌ده اؤلوٍرسن.
    اوْ هله اؤلمه‌ييب. آرابا ايره‌لي‌له‌ديكجه گؤزلري آچيليسايدي، بوغداليغين اوٍزه‌ريندن سوٍرونردي باخيش‌لاري، تاختا قاپي‌يا ديكيلردي. بو گوٍن آلاتوْرانليقدا ايكي دؤنه دؤيولن بيزيم قاپي‌يا. سوْنرا آغاج¬لار قوْيسا، باخيشي پنجره‌دن كئچيب، ائويميزده فيرلاناردي. قاتيل بوردادير.
    آرابا يئريندن اوْينادي. بيچين¬چي¬لر تارلايا باخديلار. قوش‌قوْوان¬لارين بيري آزالميشدي.

پاسخ دادن به eyvaz لغو پاسخ

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *