يارپاق قزئتي‌نين بؤيوک گؤره‌وی

yarpaq 10.indd+.inddيارپاق قزئتي 2004-جو ايلين اورتالاريندان آرديجيل اولاراق چيخماغا باشلادي. بو، تام آذربايجان ديلينده، 12 صحيفه ده، گؤزل ترتيبات‌لا چيخان موستقيل قزئت ایدی. قزئت آذربايجانلي‌لار، قاشقاي‌لار، خوراسان و خلج تورک‌لري ياشايان بؤلگه‌لرده ياييليردي.  ” يارپاق”ين مرکزي اوفيسي تهراندا يئرلشيردي، آمما اونون ماتئريال‌لاري‌نين بؤيوک بؤلومو تبريز، اردبيل، اورمو و باکيدا حاضيرلانير، سون مقامدا اينتئرنئت واسيطه‌سيله بيربيرينه جالانيردي. قزئتده عوموميتله، آذربايجان مدنيتي، ديلي و آذربايجان تورکجه‌سي‌نين تدريسي و تبليغي ايله مشغول اولان درنک‌لر 4 صحيفه‌ده ايشيقلانديريليردي. بير صحيفه  شعره، بير صحيفه  ايسه بديعي نثره آيريليردي. بير صحيفه‌ليک ساتيرا، يومور و کاريکاتورا گئدير، بير صحيفه ده ايسه تورک دونياسينا عاييد بللی مؤوضوع آيري-آيري بوجاقدان آراشديريليردی. تام 4 صحيفه ده ايسه هومانيتار علم‌لر، فلسفه و تنقيده يئر وئريليردي. “جاهان” ژورنالي‌نين گؤره بيلمه‌ديیي ايش‌لردن بيري پست‌مدرنيزمين ادبياتدا تطبيقي ايدي. سؤز يوخدور کي، پست‌مدرنيزم، فلسفه‌دن اؤنجه معمارليقدا ياراندي. سونرالار بو تئرمينین نظري کؤک‌لري ادبياتدا دا آختاريلماغا باشلادي. يارپاق′دا بو مفکوره‌نين ادبياتدا ياييلماسينا زمين ياراتماق اوچون دونيا اوزره بو دوشونجه طرزينده يازيلميش اثرلره يئر وئريريليردي. آنجاق بو، پلان‌لي و گئنيش اؤلچوده گؤرولموش بير ايش دئييلدي. واختييله گونئي آذربايجانلي اوخوجونون اؤز ديلينده فلسفي ماتئريال‌لرالا تانيش‌لیق سويه‌سيني  نظره آلاراق يارپاق بو چاتيشمامازليغي آرادان قالديرماق ايسته‌ييردي. 

اوسته ليک، يارپاق غئيري-سياسي بير قزئت اولساق دا، سيياستين مدنيت اوزرينده بوراخديغي تاثيري قولاق‌آردينا وورماغي به‌يه‌نمه‌دي. سياست چونکي گونئيين سياياسي دورومو نظره آلينديقدا مدني-ايجتيماعي بير قزئت موعين بير ايجتيماعي بوجاقدان آدي‌چکيلن قايدالارا توخونمالي‌دير. چونکي ايسته‌نيلن سياسي حاديثه  آنجاق بيزيم گومان ائتديیيميز ايستيقامتده دئييل، چوخ‌اؤلچولو بير بيچيمده گليشير. اولايلارين بئله گليشمه‌سي اورا گتيريب چيخارير کي، یالنیز بيلگين‌لر، يازيچي‌لار، شاعيرلر و اينجه‌صنعت خاديم‌لري دئییل، حتتا سياستچي‌لر ده تاريخ آراباسي‌نين تکرلري آلتيندا قابيرغالاري‌نين سينديغيني گؤرورلر. بئله بير آندا منليیي دانيليب اونودولموش خالق‌لار اؤز پاي‌لاريني اورتاشرقين کئچميشينه جالانميش سولغون خاطيره‌لرده دئييل، وارليق‌لاريني قورويا بيله‌جک سياسي، ايجتيماعي و مدني قورولوش‌لاردا آختاريرلار. اونلار حاقلي اولاراق گومان ائديرلر کي، سؤز، ويجدان و عقيده آزادليغي آنجاق دئموکراتيک سياسي قورولوش‌لاردا گئرچکلشه بيلر. هانسي اؤلکه‌نين و يا هانسيسا بير حؤکومتين دئموکراتيک اولدوغو ايدئاسينا باخماياراق، دئموکراتيانين معياري اينسان‌لارين سؤز، ويجدان و عقيده آزادليغينا نه قده‌ر سايقي بسله‌ييب اونلاري قورودوغوندان آسيلي‌دير. بو کسکين سورونون نظري و فلسفي کؤک‌لريني آراشديرماغي يارپاق ياراديجي هئيتي اؤزونون بؤيوک بورجو سانميشدي.

ادبيات قزئتي، باکي،21  اوکتيابر،2005 

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *