من ده وطن خاینییم | ایواز طاها

ناظیم حئکمت‌‌ین ایذنی ایله

 

أوَت، من ده وطن خاینییم.
سیز وطن‌پرورسینیز،
سیز یوردسئورسینیز،
من یورد خائنی، من ده وطن خاینییم.
وطن تارلالارینیزسا،
داغ أته‌یینده دینجلمه‌سارای‌لارینیزسا،
پول‌صاندیقلارینیزسا، دسته‌چئک‌لرینیزسه،
میلیاردلارجا یولسوزلوق‌دورسا، وطن؛
وطن جایناق‌لاریسا آغالارین،
یوخسوللوق‌دورسا
نئفت قویولاری چئوره‌سینده،
فهله‌لرین‌ قابار ألی
گؤره‌و-لی‌لرین قابار آلنی‌دیرسا وطن،
من ده وطن خاینییم!

شوسه یول‌لار اوزونو آجلیقدان گبرمک‌،
قیزدیرمادان قیوریلماق،
شاختادا ایت کیمی تیتره‌مک‌دیرسه وطن،
دیری-دیری گؤمولمک اوچون
قیش گئجه‌لرینده سفیل‌لره قویلاق‌دیرسا وطن،
اویوشدوروجو ماده‌دیرسه
یئنی‌یئتمه پوزغون‌لارین قان‌داماریندا وطن،
وطن قورتولماماقسا قوخموش قارانلیغیمیزدان،
من ده وطن خاینییم!

وطن،
تئله‌رادیو یالانی‌دیرسا،
آبادلیق، گووه‌نلیک، موتلولوق آدینا
اوزاق شهرلرین تالانی‌دیرسا، وطن
قوندارما تاریخ‌،
یاندیریلمیش کیتاب‌لار
یاساق دیل‌لر آلانی‌دیرسا وطن،
مئیدان‌لاردا پولیس ده‌یه‌نه‌یی،
رسمی‌لره روشوت اؤده‌نه‌یی‌دیرسه وطن،
وطن آجلیق آکسییاسی‌دیرسا،
دوستاقلیق‌ بدلی‌دیرسه آزادلیق دیله‌یی قارشیسیندا وطن،
وطن زنگین‌لرین‌سه
وطن‌سئورلیک ایسه یوخسول‌لارین،
نه یازیق، ناظیم!
من ده وطن خاینییم.

یازین نئون تابلولارا هایغیران قاپ‌قارا حرف‌لرله
بوردا بیر یازار، وطن خاینلییینی سوردورور هله ده.

 

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *