هاميدان اؤنجه گلميشديم. آمما ايندي هاميدان آخيرا قالميشام. داها دوٍشونمورم. كاغيذي بوٍكده‌له‌ييب آتيرام. من نه قده‌ر وورنوخما ايچينده‌يم‌سه منيم کيمي آخيرا قالميش گوٍلشچي توْختاق‌دير. گوٍلشچي باجيسيني زوْرلاميش يئددي جاوانلا حئسابيني قانلي‌جاسينا چوٍرودوب. يانيلميرام‌سا دوٍنن گوٍناوْرتا چاغي اوْنلاري بيربير ائولريندن چكيب، دوه بالاسيني آياقلايان کيمي آياقلاييب. اوٍچو اؤلوب، ايكيسي خسته‌خانادادي، آغير حالدا. ايکيسي ده ائوده يوْرغان- دؤشه‌يه دوٍشوب. گوٍلشچي جاوان اوْغلان‌دي. ساواشانا هئچ اوخشامير. آسيلماغا گئده‌رکن، هئچ دؤنوب گئري باخمادي. تکجه آداخليليق اوٍزويونو قوْيدو اوْوجوما، دئدي منيم هئچ آداخليم يوْخ‌دور. اؤلن‌لرين بيري اوْنون اوٍزونو جيرماقلاماسايدي، آدام اؤلدورمه‌يينه اينانماياجاقديق. گؤزلرينه باخاندا اوٍره‌يينده‌كي آخماق آرخايينليغيني بوٍس‌بوٍتون دويوردوم. ++ آمما منيم بئينيم چالخالانير. گؤيده اوچان ميغ‌ميغالاردان توتموش، دؤشه‌مه‌يه تؤكولموش سيگارئت كوٍلونه‌دك ماراقلانديرير مني. بونلاردان داها چوخ، گؤرهجهييم يوخونو دوٍشونورم.