بو کیچیک تابوتدا بیر جاهان گئدیر

اوستاد بهزادی نین اؤلومو موناسیبتی ایله “یارپاق” یارادیجی کوللئکتیوی نین موراجیعتی

بؤیوک بیلگین اوستاد بهزاد بهزادی دونیامیزدان کؤچدو، بونونلا دا گؤی‌لرینده قارا بولودلار هرله‌نن آذربایجان مدنییتی‌نین دوزه‌نلییینده بؤیوک چات یاراندی. اوستاد آذربایجان دیلی و معاریفینه ائتدییی عؤمورلوک قوللوق سونوجوندا مدنییتیمیزین سماسیندا دان اولدوزونا، یاشام رمزینه و مقصد گؤستریجی‌سینه چئوریلدی.

اونون یاراتدیغی چئشیدلی اثرلر، اؤزه‌للیک‌له ایکی گؤز باهاسینا حاضیرلادیغی سامباللی “سؤزلوک‌”لر، هابئله باشچیلیق ائتدییی دَیرلی “آذری” درگیسی بیر آکادئمیانین گؤردویو ایش‌لرله آربا گلمکده‌دیر. او بونا اینانیردی کی، “سؤزلوک‌لر گنج یازیچی‌لارا و شاعیرلره یول آچیب، یارارلی و دَیرلی ماتئریال‌لار اونلارین اختیارینده قویور. سؤزلوک‌لر و لغت‌نامه‌لر دیلین تملینی تشکیل ائده‌ن سؤزلرین توپلوسونو الوئریشلی بیر شرایطده یازیچی‌لارا تقدیم ائتمک‌له یارادیجیلیق‌لاری‌نین چیچکلنمه‌سینه یاردیم گؤسته‌ریر.” اؤنم‌لی‌سی بودور کی، بؤیوک عالیمیمیز علمی دیققتی اؤته‌ری شؤهرته و گونده‌لیک مقصدلره قوربان وئرمه‌دی، بئله بیر نجیب داوارنیشیندان دولایی ایسه داها بؤیوک آد، داها درین سایقی، داها گئنیش اوخوجو طبقه‌سی قازاندی.

باشدا آنایاسانین 15-جی ماده‌سی‌نین تطبیقی اولماقلا اوستاد بهزادی‌نین دیلیمیزین رسمیتینه دایر دیلک‌لری‌نین چین اولماسی اومیدی ایله کیچیک بیر تابوتدا گئده‌ن اولو جاهانین خاطیره‌سینی گؤِز یاش‌لاری ایله  آنیریق. سوندا ایسه او بؤیوک شخصیته تانریدان رحمت، سایین عایله‌سینه دؤزوم دیله‌ییر، بو آغیر و نیسگیللی ایتکیدن دولایی آذربایجان اولوسونا باش‌ساغلیغی وئریریک.

 ایواز طاها و “یارپاق” یارادیجی کوللئکتیوی

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *