فوتوريزم Futur [گله‌جک] سؤزو ايله باغلي ايدي. گله‌جک‌چی‌لر تهلوکه‌ني، عوٍصياني، ساواشي، کوتله‌نين گوجونو، اويغارليغي [تمدني] و آوتوموبيلي سئويرديلر. ماياکوفسکي دئييردي: «ائلئکتريک ايشيغي گؤردوکدن سونرا طبيعت منيم گؤزومده دَيريني ايتيردي.» نيچهدن گوٍج‌لو ائتکيلنميش بو آخيم، شاعيرين ايچيندن گلن وورنوخمالارين و دويغولارين ايفاده‌سينه قارشي چيخير، گراماتيکايا رعايت ائتمير، شعرده دورو بیچیم آختاريشينا گيريشيردي. فوتوريزم، هابئله، غئيرشاعيرانه سؤزجوکلرين اؤزگورلويونه آرخا چيخير، بونو دوغرولتماق اوچون تئلئگراف دئييم‌لرينه بنزه‌ر قيريق و ايلگيسيز سؤزجوک‌لر قوندارير، يا دا اونلارين آنلاميني دَييشديرم‌هيه چاليشيردي. فيليپو تومماسو مارينئتتي marinetti Fillipo Tommaso باشدا اولماق‌لا، فوتوريستلر 1909ـ‌دا اؤز چاغريش‌لاريني ياياراق بو مکتبين تملداشيني قويدولار.
ساواشي، ماشين چاغيني، و فاشيزمي منيمسه‌ين بو مکتب، گله‌جه‌يين آديلا باغلانسا دا، فوتوريزمين ايکي اؤنم‌لي قولو وار ايدي: ايتاليان، روس. ايتاليان قولونون باشيندا مارينئتتي دايانيردي، روس قولونون باشيندا ايسه ماياکوفسکي. آوروپا تئخنيکاسي گوجونه صنايعلشمک؛ بونلاري کؤهنه و پالچيقلي روسيايا دارتيب گتيرمک، گله‌جک‌چی‌لرین ايلکين آماجي ايدي. ماياکوفسکي دئييردي: «کؤهنه‌لييين اؤلومونه بير سوسياليستين کور اينامي وار منده.» واختيله صنعتده دبده اولان گؤزه‌لليک فلسفه‌سينه آيغيري اولان روس فوتوريزمي بوردان دوغدو. خيالا و پسيخولوگييايا قارشي چيخان ماياکوفسکي‌نين سطير آراسي سؤزلريندن فوتوريزمين اؤزه‌لليک‌لريني داها آيدين آنلاماق اولار: «منيم ليريک آخماق سؤزلره گولمه‌ييم گلير. بئله شئي‌لري دئمک زحمت ايسته‌مير و او قده‌ر گؤزه‌ل‌دير کي، يالنيز آدامين آروادي اوندان لذذت آلير… چئشيدلي أدبياتين ائنيش‌يوخوش‌لاري، سمبوليزم، رئاليزم و باشقالاري و بيزيم بونلارلا موباريزه‌ميز…»
فوتوريستلر بيلهرکدن ياراديجيليق ديليني آلچالتديلار؛ بونونلا دا ساتيرا و کوميک استيل يئنيدن دوغولدو. ماياکوفسکينین اينتيحاريندان اؤنجه يازديغي مکتوبوندان بونو آنلاماق اولار. ائله بير چتين آندا، سويوق قانليليقلا يازير: «هامي اوچون اؤلور‌م. هئچ کيم سوچلو دئييل، بوش يئره شايعه يايمايين. من مرحوم جنابلاري شايعهدن آجيغيم گلير.»
ایواز طاها