سياست دونياسينين اؤزگو قايدالاري واردير. بو دوغرودور آمما سياست، باشقا ديني، ایقتيصادي و توپلومسال عاميل‌لر كيمي مدنيت اؤزولونون اوزه‌رينده دايانير. ائله بونا گؤره‌دير كي، مدني- اجتيماعي بير قزئت بللی بوجاقدان آدي چكيلن قورال‌لارا توخونا بيلر. بونونلا بئله، گؤرونور ايسته‌نيلن سياسي اولای، آنجاق بيزيم گومان ائتديييميز یؤنده دئييل، چوخ اؤلچولو بير طرزده اینكيشاف ائدير. اولاي‌لارين بئله گليشمه‌سي اورا گتيريب چيخارير كي، نه اينكي بيلگين‌لر، حیتا سياستچي‌لر ده تاريخ آراباسي‌نين تكرلري آلتيندا قاربيغالارينين سينديغيني گؤرورلر.
بو هئچ ده غريبه دئييل. تاريخ دوزنلیییندن سيلينمكده اولان خالق‌لارلا موقاييسه‌ده، اوچ- بئش بيلگي‌نين يوخا چيخماسي کیمسه‌نی شاشیردا بيلمز. اوردا سياستچي تاريخ آراباسي آلتيندا قاليرسا، بوردا بير خالقين تاريخي منليييني سياستچي‌لر دانير. بئله بير آندا ايسه منليييي دانيليب اونودولموش خالق‌لار اؤز پاي‌لاريني اورتادوغونون كئچميشينه جالانميش سولغون خاطيره‌لرده دئييل، وارليق‌لاريني قورويا بيله‌جك سياسي قورولوش‌لاردا آختاريرلار. اونلار حاقلي اولاراق، گومان ائديرلر كي، سؤز، ويجدان و اینانج اؤزگورلویو، آنجاق دئموكراتيك سياسي قورولوش‌لاردا گئرچكلشه بيلر. هانسي اؤلكه‌نين و يا هانسي‌سا بير حؤكومتين دوموكراتيك اولدوغو ادعاسينا باخماياراق، دموكراتيانين اؤلچوسو اینسان‌لارين سؤز، ويجدان و اینانج اؤزگورلوینه نه قده‌ر سايغي بسله‌ييب، اونلاري قورودوغوندان آسيلي‌دير. بئله‌ليك‌له، بير آذربايجانلي گنج آتا، اوشاغيني <گونش> آدلانديرديقدان اوزون مدت سونرا، اونا كيمليك وثيقه‌سي (شناسنامه) آلا بيلميرسه، اوندا هارداسا بير چاتيشمامازليق گؤزه چارپير. بوردا كيمسه اینسانليغين ايلكين شرطلريندن ساييلان آددان دا محروم قالير.
ایواز طاها، “یارپاق” قزئتی آلتینجی ساییسی‌نین باش سؤزوندن