قوْرخو حؤكم سوٍره‌ن زامان‌لار، كوتله‌وي ياخالامالار گوٍنده‌ليك وظيفه كيمي قارشييا قويولدو. چوخ‌واخت بو ايشه گئجه‌لر قاتلاشيرديلار. اوٍزوـ اؤرتولو ياراقلي بؤلوک‌لر [دسته‌لر]، قاپيني دؤيه‌ره‌ك ائو يييه‌سينه، گؤزو يوخولو حالدا پالتاريني گئيينمه‌سيني أمر ائديرديلر. سوْنرا اوْنو شهرين هر يئرينده گؤبه‌لك كيمي بيتمكده اولان خيرداجا زيندان‌لارا آپاريرديلار. گوزه‌تچي‌لر بعضَن بوٍتون عايله اوٍيهلريني بيرگه ياخالايير، اؤزلرييله آپاريرديلار؛ بؤيوٍك ننه‌ني اوشاق‌لارلا بير يئرده اوْجاق باشيندا يوخودا ايكن بئله.
شهرين نفوسو گوٍندنـ گونه أريييردي. گؤزه‌تچي بؤلوک‌لري هاي‌ـ قارا سالاراق شهري باشدانباشا آياقلايير، آداملاري ائولريندن باييرا چيخارير، كوچه‌لرده سوٍرويه‌ـ سوٍرويه آپاريرديلار. چوْخ‌لاري گئجه‌لر پالتارلي ياتير، بوخچا‌ـ باغلامالاريني باشلاري‌نين آلتينا قويوردو. جاماعات سكسكه‌لي ياتيب، سكسكه‌لي دوروردو. چوٍنکو هر آن مأمورلارين ائوه تؤكوٍلوشمه‌سي گؤزله‌نيلمز دئييلدي. هامي، بير بئله آدامين زيندانلاردا نئجه يئرلشديريلمه‌سيندن چاشيب قالسا دا، بير موٍددت‌دن سوْنرا بوٍتون ائولر دوستاقليغا چئوريلدي؛ بيرـ بيري‌نين آردينجا. ائله اوْلموشدو كي، بونو اوْنون ائوينده دوستاق ائديرديلر، اونو دا بونون. وارلي‌لاري يوخسوللارين ائوينه تپيرديلر، و عكسينه. عسگرلري اوْخول‌لارا، خاچآتالاريني دؤيوٍش دوشرگه‌لرينه، حكيم‌لري عليل‌لر ائوينه، دله‌دوٍز جله‌‌قيرميش‌لاري ايسه تاپيناق‌لارا [معبد‌لره] اؤتوٍروردولر.
ايشچي قاتي كسکينجه آزالدي، دوستاق‌لار ايشلرين چوْخونو بوْيون‌لارينا گؤتوٍردولر. هامي‌نين بيرـ بيرينه اوْخشار گئييمده اوْلدوق‌لاريندان هر شئي قارانليق ايدي. دوستاق‌لارين سايي گيزلي ساخلانديغي اوچون، كيمين دوستاق اوْلدوغو، كيمين‌سه اؤزگور [سربست] قالديغي آيدين دئييلدي. حتتا باشقا آداملاري ياخالاماق اوچون دوستاق‌لاري ايشه گؤتوٍروردولر. اوْنلار ايسه دوستاق اولدوقلاري حالدا ده‌يه‌نك گزديريرديلر.
ياخالانان‌لارين سايي آرتماغا باشلاميشدي. گله‌جك قوربانليق‌لارين ايچينده، شهرين يوٍکسک روٍتبه‌لي آدليم شخص‌لري ده گؤزه چارپيردي. كئشيش‌لر، آل‌وئرچي‌لر، اوْردو باشچي‌لاري، حربي پوليس‌‌لر و دؤولت ايشچي‌لريني ده آپارديلار. سوْندا هاميني محبسه باسديلار، دؤولت يوٍكسك مقام‌لاريني بئله، زيندانا سوْخدولار. هركس او بيريسيني گوٍدوردو. هامييا ائله گليردي كي، شهرين يؤنه‌تيمينده اوْنلارا دا پاي دوٍشور، و آداملاري ياخلاييب، حبسه چكمكدن پاي‌سيز قالميرلار. هاميسي عيني گئييمده برابر حاقلاري اوْلدوغوندان، هابئله هاميسي بيرگه ياخالانديق‌لاري اوٍزوندن، سانكي نه‌سه باش وئرمه‌ميشدي. اوْنلار ايش‌لرينه گئدير، عادي گوٍنده‌ليك ياشاييشلاريني سوٍردورور، هر هانسي سوْرغونون جاوابيندا چوْخ گومان، دورومدان راضي قالديقلاريني بيلديره‌رديلر.
بير نئچه ايل اؤتدوكدن سوْنرا، بئله بير ياخالانمالاري يئرليـ ديبلي داناراق،ــ بو سؤزلر، غرض‌لي، آخماق و ساتقين بير تاريخچينين اويدورمالاريدير،ــ دئديلر.
ــــــــــــــــــــــــــــــــــــــــــــــــــــــ
سکسه: اضطراب، تشويش، هيجان /جاماعات سكسكه‌لي ياتيب، سكسكه‌لي دوروردو: مردمان مضطرب ميخوابيدند و مضطرب بيدار ميشدند. (بو جوٍمله‌ني عيني ايله يوسيف صمداوْغلونون كيتابيندان گؤتوٍرموشوم:
Yusif Səmədoğlu, Qətl Günü, Bakı, Yazıçı, 1987, s.15
پاواوْ پاويسيج Pavao Pavlicic كروات [خروآت] Croat يازيچيسي.1946ـجي ايلده اسلاوْوني Slavoni اؤلكه‌سي‌نين ووُكوْوار Vukovar شهرينده آنادان اوْلموشدور. أدبيات پروْفئسوري كيمي زاگرئب Zagreb بيليميوردوندا چاليشير. او، 1997ـجي ايلين يانواريندا خرواتيا علم‌لر آكادئمياسي‌نين أن گنج عضوو كيمي سئچيلميشدي. پاويسيج قيرخدان چوْخ كيتاب نشر ائتديره‌رک، ايندي اؤلكه‌سي‌نين أن چاليشقان و أن آدليم يازيچي‌لاريندان‌دير. «تاريخچينين سوچو» يازيچي‌نين يوگسلاويا فدراسيوني داغيلماميشدان اؤنجه يازديغي أثرلرين ماراقلي اؤرنک‌لريندن‌دير. بو اؤيکو‌ٍده اؤزباشينا حؤكومت‌لرين هامييا تانيش اوْلدوغو باشليجا اؤزه‌للييي ساتيريك بير چالارلا چؤزومله‌نير. ماراقلي بودور کي، توتاليتار حؤكوٍمتي ياراتميش بير توْپلوم، نئچه ايل سوْنرا، ائله بير دؤنمين رئالليغيني داناراق، اوْنو غرض‌لي و آخماق بير تاريخچينين اويدورمالاري آدلانديريرلار.
قایناق: چاپ اولمامیش “دیکتاتور” کیتابی