وطن سنسیز گؤزل‌دیر، بشار! | ایواز طاها

Suriya-Esedهیتلئرین چؤکوشو آردینجا بیر فیلوسوف یازدی: هر بیر حاکمیتین دیکتاتور و یا دئموکراتیک اولماسی­نین ایلکین گؤستریجیسی­ بودور: کوتله هانسی‌سا حؤکومتی به­‌یه­‌نمه­‌دییی تقدیرده گوج ایشلتمه­‌دن اونو دئویره بیلیرسه او حؤکومت دئموکراتیک­‌دیر، یوخسا دیکتاتور. دیکتاتور حؤکومت همیشه اؤزونه قارشی هر تورلو دیره‌نیشی قانلی مجرایا سورک­له­‌ییر؛ هر بیر اعتراضی قورغو قورامینا [توطئه نظریه‌سینه] سیغیناراق تاپدالاییر. قورغو قورامینا اینانماق و یا ائله بیر قورامدان گئنه­ بولا یارارلانماق هر بیر حؤکمتین دیکتاتور اولماسی­‌نین آیدین گؤستریجیسی­‌دیر. بو قورامین گؤزلویو آرخاسیندان باخدیقدا دیکتاتور بوتون دونیانی “شر” گؤرکمینده گؤرور، حالبوکی باشلیجا شر قایناغی، “قورغو قورامی” ایله باخان گؤزده­‌دیر. یانیلمایاق، بو خسته‌لیک یالنیز گوج کورسوسونده اوتورانلاری دئییل، قورغو ذهنیتینی منیمسه‌میش بوتون فردلری، بؤلوک‌لری و توپلوم‌لاری زهرله‌یه بیلر.

 2

اؤتن اییول آیی­نین 18-­ده سوریا گووه‌نلیک شوراسی­‌نین مرکزینده باش وئرمیش پارتلاییش سونوجوندا رژیمین دؤرد یوکسک روتبه­‌لی مقامی دمشقین اورتاسیندا اؤلدورولدو. بونونلا دا أسدین سیاسی مئییده چئوریلمه‌سی اولوس‌لار-آراسی آلاندا دانیلماز گئرچکلییه چئوریلدی. یاراقلی دیره‌نیش دالغاسی او گونه‌دک حلب و دمشقی بورومه‌میشدی. لاکین او گوندن سونرا هم حلب چاخناشدی، هم ده دمشق ساواش آلانینا چئوریلدی. او گوندن باشلایاراق بشار أسد حلب دؤیوش‌لرینی “اُم المعارک” [ساوش‌لار ساواشی] آدلاندیریب، قیریجی اوچاق‌لاردان شهره بومبالار، راکئت‌لر یاغدیردی. چئچن تاریخی بوردا دا بیر داها تکرار اولوندو؛ بیر دؤولت اؤز شهرینی گؤیدن بومبالادی. بو تئروریست آختاریشی ایدی‌می؟ میگ 25 اوچاق‌لاری ایله شهرین اورتاسیندا تئروریست آختاریشی گئرچکله‌شیرمی؟ شهرلرین چئوره‌سینه تانک دوزوب، ائولری اوچورماق‌لا تئروریست آختاریلا بیلرمی؟ “ام المعارک” سؤزونو بیرینجی  کز صدام حسین آغیزلارا سالمیشدی، اؤزو ایسه اونون قوربانلیغینا چئوریلمیشدی. ایندی ایسه باشقا بیر اؤزباشینا کاپیتان، همین شوعارین آلدادیجی ایشیق‌لاری آردینجا “بعث” پارتییاسی‌نین او بیری قانادی‌نین گمیسینی باتیریر.

3

روسیا دیش‌ایش‌لر باخانی یاردیمچیسی میخاییل بوگدانوف بوندان اؤنجه شام دئوریمچی‌لری‌نین غلبه قازانا بیله‌جه‌ییندن دانیشدی. دئمک أسدلرین 45 ایللیک دیکتاتوراسی‌نین سیاسی مئییده چئوریلدییینی روس‌لار دا باشا دوشدولر. روسیا بونو تله‌سیک تکذیب ائتسه ده، او گوندن بری ولادیمیز پوتین و سئرگئی لاووروفون دانیشیق چالاری درین اومودسوزلوغا، گؤرونمزین خائوسا سوروکلندی. پوتین دئدی: «بیز أسده سیغیناجاق وئرمه‌جه‌ییک، بونو بیزدن ایسته‌ین‌لر اؤزلری سیغیناجاق وئرسین.» پوتین البته أسده یاشیل چیراق یاندیرماغی دا اونوتمادی: نه روسیا، نه ده چین أسدین ألیندن اؤندره‌رلیک کورسوسونو آلماغا قادیر دئییل‌لر. پوتین بونو دئمک‌له أسدی قاندیرماق ایسته‌ییردی کی، روسیا هله اوندان اومودونو تام اوزمه‌ییب. آنجاق لاووروف بشارین سون دورومونو گؤز اؤنونه آلاراق یومورتالارین بعضیسینی سوریه سبدیندن گؤتورمک ایسته‌دی. «بیز سوریا رژیمی‌نین یاخین دوستو دئییلیک، هئچ زامان دا اولمادیق.» و نهایت 2012-جی ایلین سون گون‌لرینده روسیا بیرداها تاریخی داورانیشینا قاییتدی: دؤنوش نؤقطه‌سینده طرفداشینی ساتماق. دئکابرین 29-ده لاووروف چاشییب قالمیش مئدیا قارشیسیندا هم أسدی سوریا میللی ائتلاف شوراسی ایله دانیشیغا چاغیردی، هم ده همین شورانین باشقانی معاذ خطیبی دانیشیق‌لار اوچون موسکوا، ژئنئو و یا قاهیره‌یه دعوت ائتدی. خطیبین جاوابی گئجیکمه‌دی. همین گون الجزیره کانالینا وئردییی موصاحیبه‌سینده روسیانی سورونون بیر بؤلومو آدلاندیراراق دانیشیق‌لارین عرب اؤلکه‌لری‌نین بیرینده آپاریلماسینی وورغولادی. بیر شرطه‌له: بشار و اونون یاخین‌لاری هرهانسی بیر کئچیجی حؤکومتده یئر آلمامالی‌دیرلار.

4

أسد رژیمی بوتون دیکتاتورلارین تانیش سؤیلمیندن یارارلانیر: داخیلی موخالیف­‌لری خاریجی دوشمنین أل­‌آلتیسی آدلاندیرماق. جمال‌الدین‌أسدآبادی دئمیشکن، داخیلی آوتاریتاریزمی خاریجی سؤمورگه‌چیلییین بهانه‌سی ایله آیاقدا ساخلاماق. بو یانیلساما، سؤیله‌دیییمز “شر باخیش”ین سوزگجیندن کئچیر. سانکی کوتله اؤز عوصیانیندا یانیلیر، و بوتون دوشونجه­‌لری، سلیقه­‌لری، و ایجتیماعی­ آمال­‌لاری بیر پارتییادا أریتمیش رحمسیز بیر دیکتاتورون اوغلو دوغرو دوشونور. بوتون دونیا یانیلیر، چونکو قان آخیتماغی گور سسله محکوم ائدیر. 57 ایسلام دولتی ال آلتی­دیر، بوتون عرب اؤلکه­‌لری یانیلیر، بیرلشمیش میللت­‌لر تشکیلاتی­‌نین عمومی اجلاسیندا أسد رژیمینی محکوم ائتمیش بؤیوک چوخلوق یانیلیر، آنجاق روسیا باشدا اولماقلا قطعنامه­‌یه قارشی چیخان 12 دؤولت حقیقتی جار چکیر. ندن‌لر ایسه آیدین‌دیر: چونکو موروثی أسد رژیمی بئله گومان ائدیر. تانک‌لار شهرلرین کوچه­‌لرینده یئریییر، حربی اوچاق‌لاردان شهرلره راکت­‌لر ائندیریلیر، دمشقدن حلب چئوره‌سینه اورتامنزیللی ایسکود راکئت‌لری آتیلیر، اینسان‌لار بؤلوک بؤلوک قبیرلره گؤمولور، تام یالقیز قالمیش سوریا تلویزیاسی ایسه هله ده اؤنده‌رین خالق سئوگیسیندن دانیشیر، وطنی قوروماغا چاغیریر.

 یمن‌ده علی عبدالله صالحین تئلئویزییاسی سوره‌ک‌لی اولاراق “لنحافظ الوطن» سؤیله‌ییردی، سانکی دئوریمچی‌لر وطنه قارشی هجوما کئچمیشدیلر. أسد ده همین تانیش یؤنتمدن یارالانیر. دیکتاتور اؤزونو همیشه وطن‌له عینی سانیر، بعضن اوندان دا بیر آز آرتیق، یوخسا اوخول‌لارین یازی‌تاختاسی‌نین باشینا “آللاه، أسد، سوریا” یازیلمازدی.

سوریادا هامی قورغودان دانیشیر، ایپ‌لرین اوجونون خاریجی أل‌لرده اولدوغوندان سؤز گئدیر. کیمسه میللت‌دن دانیشیمیر. حالبوکی 43 مینه یاخین ایتکی وئرن میللت‌دیر؛ اسدی دمشقین بیر کونجونه قیسنایان میللت‌دیر؛ سویوق چادیرلارا سیغینان‌لار “الشبیحه” قولدورلاری دئییل، میللت‌دیر. هئچ بیر دئوریمین باشلیجا اؤزنه‌لری [فاعیل‌لری] خاریجی اولماییب. سوریادا قورغو قورامی میللتی اونودور، یالنیز خاریجه سیغینیر. حالبوکی قورغو وارسا دا یا میللته قارشی‌دیر؛ و یا سوریا دئوریمی‌نین ظفر چالیب چالمایاجاغیندان خئیر و یا زیان گؤره‌جک روسیا کیمی خاریجی گوج‌لرین قورغوسودور.

5

موریال میراک وایسبارخ “گوج کورسوسونده مجنون‌لار” کیتابیندا عرب‌لرین بئش دیکتاتورو باره‌ده یازیر: «بو دیکتاتورلار اؤزونه‌وورغونلوق، یانیلساما، شؤهرت‌سئوه‌رلیک و اؤز توپلوم‌لاری‌نین سیاسی-ایجتیماعی گئرچک‌لیک‌لرینی یئترینجه انلایا بیلمه‌دیک‌لری اوزوندن کوتله‌نین گئنیش عوصیانی ایله قارشیلاشدیقدا چاشیب قالدیلار.  اونلارین تپکیسی‌نین ماهیتی گؤزله‌نیلمز دئییلدی: شاشقینلیق، اینامازلیق، اعتیراض‌لاری دوشمنین قورغوسو سانماق، ناراضیلیق‌لاری انکار ائتمک و سون مقامدا زوراکیلیغا أل آتماق. وایسبارخا گؤره، اؤز اولاغان‌اوستو باجاریق‌لارینا تام گووه‌نمک، اؤزونه‌وورغونلوق جنونونا یولوخموش اؤنده‌رلرین باشلیجا اؤزه‌للییی‌دیر. اونلار بوتون ایستک‌لر و خیال‌لاری‌نین حیاتا کئچه‌ بیله‌جه‌یینی گومان ائدیر، بونون اوچون ده هئچ بیر موخالیف باخیشی بئیین‌لرینه سیغیشدیرا بیلیمرلر. اؤزونه‌وورغون اؤنده‌رین گؤزلنتیسی بودور: کوتله هم اونو سئومه‌لی، هم ده اوندان قورخمالی‌دیر. لیبی‌ده عوصیان هریانی بوروموشکن قذافی بیر مخبره دئییر کی، «کیمسه منه قارشی دئییل، ندن منه قارشی چیخمالی‌دیرلار کی؟ اونلار منه وورغون‌دور، جان‌لارینی منه فدا ائتمه‌یه حاضیردیرلار.»

دیکتاتور اؤزوندن خاریج عالمده هر بیر موخالیف سسده قورغونو سئزیر. آنجاق قورغونون کؤک‌لری همین باخیش‌بوجاغی‌نین اؤزونده‌دیر، همین دوشونجه طرزی‌نین اؤزودور. سونوج آدین‌دیر: بو قبیل رژیم‌لر، یالانا قارشی نه‌سه سؤیلنمک ایمکانینی کوتله‌دن تام أسیرگه‌دیکده جنون باش قالدیریر. قذافی سون گون‌لرده اؤزونون عؤمورلوک دئوریم باشچیسی اولدوغوندان دانیشیردی، مصراتا عوصیانچی‌لاری طرابلسا یاخینلاشدیقجا اؤز سارسیلمیش قولدورلاینا “الی الامام” [ایره‌لی یورویون] سؤیله‌ییردی. کوتله‌نی کور سیچان‌لار آدلاندیریردی، یئرآلتی تئروریست‌لر. اونلاری کوچه به کوچه، ائو به ائو ایزه‌له‌ییب اؤلدوره­‌جه‌ییندن دانیشیردی. دیکتاتور همین باخیشین قوربانلیغینا چئوریلدی.

بشار أسد ده عینی بیچیمده دوشونور، عینی بیچیمده داورانیر. سونوجدا ایچه‌ریده دؤرد میلیون، دیشاریدا ایسه 500 مین سوریالی قاچقینا یانیلساما گؤزویله باخیر. چونکو حقیقت کوچه­‌لرده باش وئرمیش فاجیعه­‌لرده دئییل، حقیقت تلویزییا اعتیراف‌لاریندا دوغرولور.

دونیانین شر گؤرمه گئدیشی ائله بیر زامان سونا چاتیر کی، حؤکومتین چیلپاق گوج مئکانیزمی سارسیلاراق اونون باشچی‌­لاری قذافی کیمی فاجیه­‌وی سونوجلا قارشیلاشسین. سؤزسوز، بشار أسد گئتدیکجه حربی گوجونو ایتیردیییندن همین یولا گئدیر. بو، فرویدون آنالیز ائتدییی “اؤلوم دورتوسو”دور. دیکتاتور بو دورتونون شهوت زیروه‌سینی همیشه سیناقدان کئچیرمک ایسته‌ییر. سونونج ایسه همیشه آیدین‌دیر: وارلیغی مشروعیت قایناغینا چئوریلمیش دیکتاتورون یوخلوغوندا ائستئتیکانین دوغرولماسی. وطن‌سیز سنسیز گؤزل‌دیر بشار*!

___________

* بو جومله‌نی بیرینجی کز “یمن” خالقی‌ علی عبدالله صالحه قارشی سسلندیردی: الیمن من دونک اجمل!