كوٍچه‌نين باشيندا يئرلشن بير تئلئفون كؤشكوٍنون [کيوسک] قاباغيندا جاماعات صف باغلاييب. هاوا سوْيوق‌دور. ياغيش ياغير. دؤزوٍمسوٍز آداملار گؤزلريني كؤشكوٍن ايچينه زيلله‌ييب‌لر. دسته‌يي ألينه آلميش كيشي، تئلئفونلا دانيشير. توْختاق‌دير، كيمسه‌ني وئجينه آلمير. گوٍلور، اوغونوب كئچير. بير گيله سيگارئت چيخارير، آليشديريب يئنه ده دانيشيغا قيزيشير. ائشيكده‌كي آداملار تله‌سيرلر، سينيرلري گرگين‌دير. دئيينيرلر. صبري توٍكنميش بيريسي سيرادان چيخاراق كوٍچه‌دن كئچيب، گئجه‌نين قارانليغيندا ايتير. بيرـ ايكي تله‌سگَن آدام دا سيرادان چيخماغي دوٍشونور، سوْنرا نه‌ايسه فيكير‌لريندن داشينيرلار. سيرانين باشيندا دورموش كيشي كؤشكوٍن قاپيسيني دؤيوٍر. كؤشكده‌كي آدام قاش‌ـ قاباغيني ساللاياراق تلسمه‌مه‌لريني آنلادير. هامي‌نين اعتيراض سسي اوجالير. آمما كؤشكده‌كي كيشي تئزـ تئز دانيشير. گوٍله‌ـ گوٍله دسته‌يي قوْيور. تئلئفون دفتريني گؤتوٍروب، كؤشكدن چيخير. سئوينجيندن دريسينه سيغمير. جاماعات آجيقلي باخيش‌لارلا اوْنو سوٍزور، آستاجا سؤيوٍرلر. اوْ ايسه سايماز آدديم‌لارلا قارانليقدا ايتير.
ايكينجي نفر تئلئفون كؤشكوٍنه گيرير. يامان آجيقلانيب. دسته‌يي قالديراركن گؤزوٍ اينديجه قارانليقدا ايتميش آدامين كؤلگه‌سيني آختارير. تئلئفون دفتريني چيخاريب، واراقلايير. بير سكّه سالير، نؤمره‌لري ييغير. دانيشماغا باشلاديقدا سيرـ صيفتي آچيلير. كراواتي‌نين دوٍيونونو بوْشالدير. دانيشير، دانيشير، يئنه ده دانيشير. أييلير، دوٍزهلير. اوْ بيري آدام شوٍشه‌ني دؤيوٍر. كؤشكوٍن ايچينده‌كي كيشي اوْنو سايمير. ديشارداکي كيشي يئنه ده شوٍشه‌ني دؤيوٍر. ايچهريدهكي كيشي اوٍزونو تورشودوب، دؤزوٍملو اوْلمالارينا ايشاره ائدير. يئنه ده دانيشير، اوٍره‌كدن گوٍلور. دسته‌يي قوْيور. كاغيذ‌ـ كوغوذونو ييغيشديرير، كراواتي‌نين دوٍيونونو بركيديب، كؤشكدن چيخير. هامي نيفرت‌له اوْنا باخير. او دا كيمسه‌ني سايمادان يوْل آلير، قارانليقدا ايتير.
سونراكي آدام كؤشكه گيره‌رـ گيرمز آجيقلا قاپيني باغلايير. چاشقين‌دير، آجيغيندان يئره توٍپورور. دسته‌يي قالديرير، بير سكّه سالير. دانيشير، تپيك‌لريني يئره دؤيهـ دؤيه دانيشير. نهايت توْختاييب، گوٍلومسه‌يير. گؤزله‌مكده اوْلان دؤزوٍمسوٍز آداملار أل‌لريني أل‌لرينه، هردن ده ديزلرينه دؤيوٍرلر. بير نئچهسي سيرادان چيخيب، قارانليقدا گؤزدن ايتيرلر. ايچهريدهكي كيشي كؤشكدن چيخير. گه‌ييرير، سوْنرا ماشينينا اوْتوروب، تلهسيک اوزاقلاشير.
گوْمبول بير آرواد، قوْلتوقلاريندا چه‌لييي، كؤشكه گيرير. بير آز دوروب نفسيني درير. دسته‌يي قالديرير. سكّه ساليب، باشلايير دانيشماغا. نهسه سوْروشور، تعجب‌له‌نير. چوْخ اينجيک گؤرونور. ائشيتمير، باشا دوٍشمور. دانيشير، يئنه ده دانيشير. سيرايا دوٍزولموش آداملار بئزيكيب‌لر. اوْنلاردان آجيقلي بيريسي يومروقلا شوٍشه‌ني دؤيوٍر. قوْجا آرواد محل قوْيمور. دانيشاـ دانيشا اوغونوب، كئچير. قوْلتوق چوبوق‌لاريني بير يانا آتير. كيمسه ايچه‌ري كئچمه‌سين دئيه، آياغيني قاپي‌يا سؤيكه‌يير. ائشيكده‌كي‌لر جانا گلميشلر.
كؤشكه گيره‌ن سوْنراكي آدام اوْن ياشيندا بير اوشاقدير. دسته‌يي قالديرير. دانيشير، دانيشير. هامي تله‌سير. [اوشاق كؤشكدن چيخير] سوْنرا تله‌سگن‌لر بيرـ بير ايچه‌ري گيرير، ديرچه‌لير، باييرداكي آدام‌لارا اعتنا ائتمه‌دن دانيشير، دانيشيرلار. دئيير‌سن كؤشك گوٍج مركزي‌دير.
سوْنونجو آدام، قوْجا بير كيشي‌دير. قيويرـ زيويرلا دوْلو توْربا ألينده ايچه‌ري گيرير. يوْرغون، چاشقين. شوٍشه‌دن چؤله باخير، كيمسه يوْخدور. يئره سريلير. اوزانير كي، ياتسين، يومروقلا قاپيني دؤيوٍرلر. يئل‌دير قاپيني دؤيوٍر.
قوجا كيشي كؤشكدن ائشييه چيخير. تاختا اوْتوراجاغين اوٍستونه اوزانير. يئل كؤشكه گيريب، دسته‌يي قالديرير. ياغيش يومروقلا شوٍشه‌ني دؤيوٍر.
ــــــــــــــــــــــــــــــــــــــــــــــــــ
غلامحسين ساعدي Qulamhüseyn Saidi (1314-1364 گوٍنش ايلي) تبريزده آنادان اوْلدو. يئنييئتمه چاغيندا محمد مصدقين باشچيليق ائتدييي ميللي نئفت حرکاتينا قوْشولدو، بير سوٍره «فرياد»، «صعود» و «جوانان آذربايجان» کيمي قزئتلرين باش يازارليغيني اؤز اوٍزهرينه گؤتوٍردو. 1332ـجي ايلده باش وئرميش چئوريليش آردينجا بير سوٍره گيزلينده ياشادي، سوْنرا ياخالانيب دوستاق اولدو. اوْتوزونجو ايللرين سوْنلاريندا صمد بهرنگي، بهروز دهقاني، و مفتون اميني ايله بيرليکده تبريز بيلميوردونون اؤيرنجي حرکاتينا رهبرليک ائتدي. ساعيدي 40ـجي ايللرده تهرانا گئدرهک، رضا براهني، جلال آلاحمد و سيروس طاهبازلا بيرليکده سانسورون آرادان قالديريلماسي آماجي ايله شاه حؤکومتي ايله دانيشيقلار آپاردي. 1353ـ‌ده ياخالانيب بير ايل بويو تجريد حاليندا ساخلاناراق آغير ايشگنجهلره معروض قالدي. 1360ـ‌دا کؤچکوٍن اولاراق پاريسه گئتدي، 1364ـجوٍ ايلده دوٍنيادان کؤچدوٍ. أثرلري: «خانهي روشني»، «پرندگان در طويله»، «لالبازي»، «غريبه در شهر»، «واي بر مفلوک»، «تاتار خندان», «ضحاک», خانههاي شهرري (1336)، ليلاجها (1336)، شکايت (1337)، غيوران شب (1337)، سايههاي شبانه، سفر مرد خسته (1340)، ايلخچي، خياو يا مشکينشهر، عزاداران بيل، چوب بهدستان ورزيل، بهترين باباي دنيا، اهل هوا، مقتل، واهمههاي بينام و نشان، آي بيکلا آي باکلا (1341-1346)، ترس و لرز، قرهداغ، توپ، پرواربندان، جانشين، گاو (1346-1353) گور و گهواره، عافيتگاه، کلاته نان (1356).