قیسا سئچمه‌لر: پولیس و سیاست

سیاست باره‌سینده چوخ‌واخت یانلیش تصور واردیر. بعضن اونو گوج قورولوش‌لاری [ساختارهای قدرت] ایله دییشیک سالیرلار، پولیس‌له پولیتیکانی عئینی سانیرلار. 

سیاست‌چی‌لرین تؤره‌تدییی فاجیعه‌لر بیزی سیاستین گئرچک آنلامیندان یاییندیرمامالی‌دیر. چونکی قوزئیده گؤرمکده اولدوغوموز “سیاستسیزلیک” اولغوسو، توپلومو أیلنجه باتاقلیغینا سوروک‌له‌یه بیلر.  سياست‌ اساسن تکذیب‌چی‌دیر. محض بو اؤزه‌‌للیییندن دولایی صنعت‌له ده عینی جبهه‌ده دایانیر. سیاستی گوج قورولوش‌لاري (پوليس) ایله قارشی قارشییا قویمالیییق. پولیتیکانی پولیسدن آییرمالیییق. پولیس کيمليک‌لري نظام‌لي بيچيمده پايلايير؛ توپلومون هر بير آيرينتيسي‌نين، هر بير اويه‌سي‌نين يئريني دقيق معينلشديرير. سياست بو سيستمي داغيتما گيريشيمي‌دير. ياراديجيليق، يالنيز بو داغيديجيليقدادير کي، سياست‌له ال‌ـ‌اله وئرير.

پوليس اينديکي دورومون گودوکچوسودور؛ دوزگون سياست ايسه اينديکي دورومو سورغويا چکمک. بونلاري بيربيريندن آييران سينير، تيترک و سيويق اولسا دا آنلاملي‌دير. سياستين پوليس يؤنو اجتماعي گئديش‌لري اداره ائديب، جيلوولايير. بیرئی‌لری [فردلري] بللی چرچیوه‌لرده صينيفلنديرير، باششقا سؤزله اونلاري گؤرونرده ساخلايير. پولیس بوتون اولاي‌لارا اینتیظام باغيشلايير، هرنه‌يي قانون چرچيوه‌سينه سيخناشديرير، آيريم‌لارا [ایستئثنالارا، موخالیف دوشونجه‌لره] ياغي، يابانجي گؤزله باخير، اونلاري ديشلايير؛ ايستبليشمئتي establishment خائوسا تام حاکيم قيلماق. بوتون بونلارا قارشي چيخماق ايسه دوزگون سياستين ايشي‌دير.

سیاسته قورشانماق اینسان توپلومونون طبیعتینده‌دیر. اونا خاریجی ندن آختارماق ایسه قورغودان [توطئه‌دن] سوره‌ک‌لی دم ووران حؤکومت‌لرین قورغو باخیشیندان گلیر.

قایناق: سیاستدن گؤزه‌للییه کئچیرم | ايواز طاها