اینسان توپلومون اینکیشافینا و سیاسی چئوره‌نی دییشدیرمه‌یه قالخیرشیرکن اؤزنه‌له‌شیر. بئله بیر اؤزنه‌نین بعضی اؤزه‌للیک‌لری اولمالی‌دیر؛ مثلن بیلیک، أخلاقی یاناشما، عقلانیت و دیره‌نیش روحو. فعالیت آپاریلاجاق آلاندا بیلیک‌لی اولماقدا هئچ بیر شوبهه یوخ. یوخسا سون مقامدا یانلیز جهالت ظولمه غلبه چالاجاق. آمما سون اوچ اؤزه‌للییه گلدیکده، دیره‌نیش روحو و أخلاقی یاناشما طرزی ایله عقلانیت یوکونو عینی زاماندا داشیماق اولدوقجا چتین‌دیر. چونکی دیره‌نیش، أخلاق و عقلانیتین نیسبتی اؤزگورلوک/عدالت نیسبتینه بنزه‌ییر. بیری گئرچکلشدیکده او بیریسی اؤله‌زیییر. بوردا ألبته سؤز چیخیلمازلیقدان [بن‌بست‌دن] گئتمیر. باشقا سؤزله، او اوچونو بیر یئره توپلاماق قولای اولماسا دا اولاناقسیز دئییل. بونا بیر چوخ اؤرنک‌لر وار: بیری رحمتلیک غلامرضا أمانی، او بیریسی ایسه سعید متین‌پور (بو ایکنیجسی باره‌ده باشقا بیر فورصتده دانیشماق گره‌کیر).
أمانی ایله سون گؤروشوموز أرک یاییم‌ائوینده باش توتدو. اوچ-دؤرد آی کده‌رلی اؤلوموندن اؤنجه. بوتون باسقی‌لارا باخمایارق آذربایجانداکی اولا‌ی‌لارین گئدیشی باره‌ده دقیق آنالیزی و عقلانی یاناشما طرزیندن حئیرته گلمه‌یه بیلمزدیم. اوندان اؤنجه ألبته دفعه‌لرله گؤروشوب، بیر دفعه‌ده ائوینده گونش خانیمین دوز-چؤره‌یینی یئیره‌ک گئنیش دانیشمیشدیق، آمما سون گؤروش باشقا بیر شئی ایدی. چوخ یئتکینلشمیشدی. أمانی‌دن آیریلدیقدان سونرا اونون سؤزلرینده‌کی درایت و گؤزلرینده‌کی طراوت باره‌ده سعید ملازاده‌یه دانیشدیم. آجی اؤلوم خبرینی ائشیتدیکده ایسه سون گؤروش گلدی دوردو اؤنومده: «یارپاق نشریه‌سینه دای ایجازه وئرمزلر چیخسین، آیری بیر آدامین آدینان آیری آددا بیر نشریه مجوزی فیکرینده اول!» جاوابیم اوره‌ک آچان دئییلدی: «یورولموشام.» شاشیردی. اونا یورولماغین آنلامی یوخ ایدی.
أمانی سارسیلماز، آییق، خوش‌گؤرولو و حاشیه‌سیز بیر اؤزنه ایدی. نه یازیق کی، بوتون بونلاری اؤزونده توپلامیش او بؤیوک اینسان دونیامیزدان واختسیز کؤچدو (3 آیان 1387). مسئله بوراسیندایر کی، هم او یاخشی اؤزه‌للیک‌لر، هم ده بو واختسیزلیق بیزه درس اولمالی ایدی، یئترینجه اولمادی. بعضی‌لری نه او أخلاقدان درس گؤتوردو، نه ده دونیانین فانیلیییندن. یوخسا بیر چوخ اینسان‌لار هئچ بیر أخلاقی ایلکه‌یه رعایت ائتمه‌دن، بونجا گئنیش قارشیلیقلی تخریب وسوسه‌سینه قاپیلمازدیلار.
سئویملی أمانی‌نین یولو ایشیقلی، دوشونجه‌سی داواملی، متین‌پورون ایسه جانی ساغ، ایش‌لری آواند اولسون.