ماندئلا غریبه شخصیت ایدی. او، بعضی اوتوپیک اوخو‌ل‌لارین “بیکتین اینسان” آدلاندیردیقلاری وارلیغین اؤرنه‌یی ایدی؛ سوموت، پارلاق و جانلی اؤرنک. نیفرت آلووو و قودرت توتقوسوندان کئچمه‌سن گئرچک اینسانلیغا قوووشا بیلمزسن! 28 ایل اؤز آماج‌لاری اوغروندا آپارتاید رژیمی‌نین دوستاغی اولموش آدلیم بیر اؤنده‌رین، اؤز موخالیف‌لرینه قارشی قانلی دیوان توتماسی گؤزله‌نیلمز اولمازدی. بونا اونون هم حاققی چاتیردی، هم یئترینجه مشروعیتی واردی. آغ‌لارین وحشیلیک‌لرینه معروض قالمیش قارا دریلی کوتله بونو ایسته‌ییردی، آپارتاید رئژیمی‌نین اولوس‌لار آراسی روسوایلیغی دا بونا برائت قازاندیریردی. آمما ماندئلا باریش، سئوگی و باغیش یولونا گئتدی. ماندئلا یئر-گؤی آدینا دانیشان بیر چوخ اؤنده‌رلره باخمایاراق نه ائتسه یاخشیدی؟ بوتون نیفرت‌لریندن واز کئچدی، اونا اؤلوم جزاسی کسیلمه‌سینی ایسته‌میش پروکورورلا [دادستان‌لا] اوتوروب یئمک ده یئدی. سونرا دا گوج کورسوسونو بوراخدی.
بونا خیرداجا، های‌کولو، مقام‌سئوه‌ر اینسان‌لارین گوجو یئتمز؛ بودا‌ـ‌واری چکینگنلیک سیمگه‌سی اولان ژان پول ایستر کی، واتیکان عظمتینی آرخادا قویسون. ماندلا ایستر کی، بوتون دوشمن‌لره نیفرت یوخ باغیش یاغدیرسین؛ آغ‌لی قارالی بوتون اینسان‌لار رحمت یاغیشیندا ایسلانسین. عین القضاتی آنیرام: اؤتن گئجه سئوگی یاغمیشدی، یئر ایسلانمیشدی.
بونلاری قولایجا سؤیله‌مک اولار، آمما نیفرتدن یاخا قورتارماق و گوج کورسوسوندن کؤنوللوجه چکینمک همیشه قولای دئییل، بعضن اؤلومه بویون قویماق قده‌ر چتین گؤرونور. ماندئلا اؤنمی، ماندئلا بؤیوکلویو بوندایدی. بونلارسیز اؤزگورلویون گور سسی، باریش سیمگه‌سی اولا بیلمه‌یه‌جکدی ماندئلا.
سارسینتی و حوزن‌له ماندئلانین آدی اؤنونده باش أییرم.
2013.12.06