باليق بازاري استانبولدا ان چوخ سئوديييم يئردير. يانيلمايين من اوشاقليقدان باليغا اؤيره‌نمه‌ميشم. ائوده ايسه هردن كيريخاندا بارماق‌لاريمي باليغين ياغينا باتيريرام. آمما بو بازارين منيم اوچون بونجا اؤنملي اولماسي، اورداكي كيتاب‌لاردان گلير: ايكينجي‌أل [دست دوم] كيتاب‌لاردان. «تاكسيم»ي ايلك کز شعر سؤزجوک‌لرینده دويموشدوم: استانبولون بو نوستالژيك كوچه‌سيني. ترامواييني سونرالار گؤردوم. آمما بو «ايكينجي‌أل كيتاب ساتيش ائويني» هئچ گؤرمه‌ميشديم: تاكسيم جاده‌سينده، باليق چارشیسی‌نین بير كونجونده گيزلنميش كؤهنه كيتاب ساتیش ائویني. بازارا گيرديكده باليق‌لارين قوخوسو هاواني چولغايير. من‌سه گؤزلري دوپ‌دورو باليق‌لاردان يان كئچه‌ره‌ك «كيتاب ساتیش ائوینه» سوخولورام. چارشی نه‌دیر؟ بازار دئمک‌دیر! بير آز كيتاب‌لارا گؤز گزديرديكدن سونرا باشيمي دؤنده‌ريب، ساتيجیدان خورخه لويس بورخئسین «أطلس» كيتابيني ايسته‌ييرم، سونرا ايسه جئيمز جويسون «دوبلين‌لي‌لر» أثريني. هئچ بيري يوخدور. بلكه اولدو- دئييرم،- يوك آركاداش، يوك- سؤيله‌يير کیتاب ساتان. بورخئسين «قوم» كيتابيني گتيرير. سونرا لاتين آمريكاسي‌نين باشقا يازيچي‌لارينين آديني چكير: فوئنتئسي، ماركئزي، ژورژ آمادونو. من «خوآن بوش»ـو سسلنديريره‌م. شاشيب قالير. آديني ائشيتمه‌ديیي بير يازيچيدي بو خوآن بوش. بير زامان دومينيكن جمهوریتينده باشقان اولدوغونو سؤيله‌ييره‌م. بو آدامي تانيماديغيندان دريندن حئييفسيله‌نير. بو قده‌ر شاشقینلیغین نده‌نيني سؤز گليب سون دؤنمین فيلوسوف‌لارینا چاتديقدا آنلاييرام. من هر بير كيتابين آديني چكديكده، او عيني يازيچيدان باشقا كيتاب‌لارين دا اولدوغونو وورغولايير. فرانسوا ليوتاردان هئچ بير أثر يوخدورسا، ژوژ باتایدان، ائرنئستو لاکلائودان، ژاك دريدادان، ايهاب حسندن وار، بیر ده کارل ائشمیتدن. ظارافتجا، نازیست دئییل‌می ایدی؟ بو ائشمیت دئییرم. بیر آز آجیقلی لحن‌له، شونو داها ایکی اوکو أفندیم، سؤیله‌ییر. كامونون آديني چكيره‌م، به‌يه‌نميرريال بئرتولد برئشته پاپاغینی گؤتورور. کؤهنه بیر دوکان ایچینده کیتابلار آراسیندا آستا دولاشان بو وارلیق یاواش یاواش دوینامیزا آزیب گلمیش غریبه بیر روح کیمی جانلانیر گؤزومده. ایستئفان کینگ کیمی اورتاباب یازارلارین آدینی چکدیکده دوداغینی بوزور. جئيمز جويس سويه‌ده يازيچي‌لارلا ماراقلانان بو تانينماز كيمسه، مني «پيامي صفا» ايله تانيش ائدير. همين گون قوناق ائوينه گئري دؤندوكده، بير تاپينتييا اوغراديغيمي آنلاييرام. پيامي صفاني اوخويورام.
ايندي بو باليق بازارينداكي كيتاب ساتيش ائوي، بوتون استانبول ماغازالاريندان منيم اوچون داها سئویملی‌دير. او ماغازادا كيتاب‌لارين روحونو اوخشايان بير جوت أل چاليشير، اونلارين مضمون‌لاري‌نین قارانلیق قاتینی گؤره‌ن بير جوت گؤز دؤيونور، و اونلارين اويغوسويلا ياشايان بير اورك اؤيونور: «آركاداش داها نه لازيم؟»، «سنين ساغليغين». بو اونون و منيم سون سؤزوموز دئييل. گلن گؤروشه قده‌ر آيريليريق.
2005
_____________________
* سونرالار کادی کؤیو و آنکارادا “اولقون‌لار” سوکاغینی کشف ائتدیکده، داها او چارشییا یولوم دوشمه‌دی، بیلمیرم ایندی ده دوروور یوخسا یوخ.
* فوتو: آرا گولر