شعر قيزديرمادير
شعر خستهليكدير، قيزديرمادير، کافکا دئميشدير. قيزديرمانين درجهسيني آزالتماق هله لاپ ساغالماق دئييل. ترسينه، قيزديرما هر شئيي تميزلهيير، داها آيدين گؤستهرير. تبريزلي خطيب’ـه گؤره، «شعر حاققيندا يازماق، شعر يازماقدان چتيندير»، شاعير حاققيندا يازماق بونلارين ايکيسيندن ده. كيمسه دئميشدي، شاعير، بير قورو داللا اوزوناوزادي دانيشابيلن آدامدير. بو، بوٍتونلوكله دوغروْدور، آمما بوندان داها دوْغرو شئيلر ده وار.
ديلين دومانليغيندا يئني نسنهلر
يئرله گؤي آراسيندا آسيلي قالميش اينسان آنلارينا چيلهنن ديکسينمه قيغيلجيملاريدير شعر؛ آنلاملاريني آسيلي ساخلاميش سؤزلر عوٍصياني. ’ايتکين اؤلکهلرين‘[1] خسته نوستالگيياسي؛ خارابا مزارلارين آخماق اؤزلمي؛ بير اوْووج توزدا قوْرخونون ايزلهييشي:
و من ائله بير شئي گؤستهرهجهيم کي سنه،
نه سني دورمادان ايزلهين صاباحکي گؤلگهندير،
نه ده قالخيب سني قارشيلايان آخشامکي کؤلگهن،
سنه قورخونو گؤسترهجهيم بير اوْووج توْزدا. (ت.س. ائليوت)
بونلار دئييل، آلتبيلينجدن[2] بوْيلانان رؤويادير شعر. باسديريلميش مئيللرين سمبوليک [سيمگهسل] فوراني. شعر اوغوسوزلوقلارين توتقون خاطيرهسيدير، آزغين لذّتلرين ائرکن آختاريشي، دوٍشونولمهميش سؤزلرين آنسيزين باييريا سيچراماسي. ادراک داغارجيغينين ياريمکوٍرهسي دانيشير؛ بئينيميزي دئييرم. رؤويا گئرچکلييين دوْنوق گؤودهسينه جالانير. بير آنليغا وارليغين وارليغينا جالانان بو رؤويا، هر اينسانين گؤزوٍنده بير بوْيايا چالير. چالماسا شعر دئييل. يالنيز شعرين ايشيغيندا بو ادراك دوٍنياسينين حقيقي[3] اوْلدوغونو، گئرچک دوٍنيانين ايسه يالانلا دوْلدوغونو آنلاييريق. يوردو، ياماني، سامانيولونو، ساماني يامسيلامير شعر. ديلين دومانليغيندا يئني نسنهلر يارادير. هئگئل دئيهنده «من دوٍنيانين تاريخيني يازديم و تاريخ اوْلايلاري اوْنونلا اويغون گلمهليدير»، فلسفه آيدينليغينا زيللنمير، شعرين سسيني دينلهيير. گئرچكلييه خوْر باخان شعر، حقيقتي باغرينا باسير.
قایناق: چاپا حاضیرلانمیش
"آنجاق شعر؛ بيرآز دا سئوگي، دوشونجه و سياست" باشلیقلی کیتابدان
[1] جامعهي آرماني، مدينهي فاضله. اينجهصنعتين اؤزهلليکلريندن بيري ده اوتوپيک utopik اولماسيدير. يونانجا u- يوخ و topos - يئر دئمکدير. نه قدهر گولونج! دئمک اوُتوْپيا زامان و مکان ديشيندا يئرلشن آباد اؤلکهني آختارماقدير. هئچ يئرده اولماياني اؤزلهمکدير. بونو "ايتکين اؤلکه" آدلانديريرام. بو تئرمين آذربايجان جومهوريتينده "ايدئال جمعيت" کيمي سسلهنير.
[2] آلتبيلينج: تحتالشعور، تحتالادراک، ناخودآگاه، the subconscious.
[3] بو يازيدا "گئرچکليک" و "حقيقت" سؤزلري آيري آيري آنلام داشيييرلار. "گئرچکليک" واقعيت، رئالليق، reality دير "حيقيقت" ايسه truth، هر شئيين ذاتي.
