ديل مسئلهسي ايله اوُغراشماق اوٍچون سياسي آچيليم دوًنميني گوًزلهمك
يئرسيزدير. کیمسه «سياسي گوجو اله كئچيريرسك ديلي بير گئجهده چوًزه بيلهريك»
دئيير، او بيريسي «ايندي تئزدير، ديلي واختيندا اوًيرنهجهييك» سوًيلهيير. بو
باخيشدا حقيقت وارسا، چاتيشمازليق دا وار.
بيرينجيسي، ائله بير فوٍرصتين واختيني معينلشديرمك هئچ كيمين
الينده دئييل. او فوٍرصت بللي زامان نوًقطهسينده يئرلشمير، تاريخي گئديشه باغليدير.
بونون اوٍچون ديلين آلين يازيسيني باشلي باشينا بوراخماق اوْلماز. ديلين ماهيتي،
ساغلام ديلين گئرچكلشمه مئخانيزملري، ديلين اوًيرهتيمي، مانعهلر، انگللر و
اولاناقلارلا تانيش اوْلمادان بير گئجهده سهيلدير، بير عوًمور بويو مسئلهني
چوًزمك موٍمكون اوْلماياجاق. بونو دا سؤیلهمک یئرینه دوشردی کی، ديل نه قدهر
سياسي ياساقلار چرچيوهسينده يئر آليرسا، بير او قدهر ايستكلي گوًرونور، آمما
ديل ياساقلار دايرهسيندن چيخديقدا اونونلا باغلي ماراقلار داها
«قوتساللديريلميش آزادليق، ميللي منليك، اوًزوٍنه قاييديش» قاوراملارينین آدی
آلتيندا آنلاشیلمایاجاق. گلوباللاشميش رقيب ديللرين چارپيشماسيندا اوًلهزييهجك.
توتاليم ديلين تدريسينه ائله بير سياسي ايمكان ياراندي.
مسئلهنين اوًنملي طرفي ديل سياستيني پلانلاشديريب گئرچكلشمهسيدير. ديلله
ايليكين تانيشقليق اوْلمایان تقدیرده، يا دا آذربايجان توركجهسينده بيرجه سطير
دوزگون يازماغي باجارمادیغیمیز حالدا، ديلين تدريسينه گئدن هانسي يولو سئچهجهییك؟
بورا فاجيعه دؤنگهسيدير.
گوٍج لحظهسيني گوًزلهمهيين آستاريندا اينديكي
دوًزومسوزلوك ياتير: «او زامان گئج گلهجك، تئزليكله مسئلهنين باشيني
باغلامالييق.» بو ايسه، ديل مسئلهسيني گئجيكديريب واختيندا چوًزمهمهيين او بيري
اوٍزدور. بللي چئورهلر اولدوقجا دارتيشمالي مسئلهلرده گركلي علمي صلاحيت
قازانمادان كسه چوًزوٍم يولونا فيكيرلشير؛ کسه چوزومیولونون دا تئزلیکله عومومی
زغبت قازانماسی موٍمکون اولمادیغیندان، رقيبلري عرصهدن ديشاري وورماقلا سؤز
بیرلییینی ساغلاماق اولور! بو ايسه آچيقجا بيلگي، ديل و دوشونجه آلانلاريني سياست
مئيداني ايله دييشيك سالماقدير. بونون آديني «حذف سياستي» قويا بيلهريك. بو
سياست دوٍشونجهلري، اينانجلاري و باخيشلاري قوْندارما بيچيمده عئينيلشديرمك
ايستهيير. بيز داها چوخ فيكيرداشلاريميزلا موباحیثهيه گيريشمك ايستهييریک،
تنقیدچیلر، ادبی اثرين ديريني متنده دئييل، فيكيرداشلاريندا آختاريرلار. سؤزون
قیساسی منیم دوستوم یاخشی یازیر.
ادبيات، اويغارليق، تكنولوژينين كوًكلري دوشونجه بنزهرليكلرينده
دئييل، فيكير آيريليغيندادير. كسكين انكارلاردا.
نه يازي قايدالاري، نه ده ساغلام ديل، عئيني دوٍشونجهلي
آداملارين اوزلاشماسي ايله يئترينجه گئرچكلشه بيلمهيهجك. بو اوزلاشما، چئشيدلي
ـ حتي ضديتلي ـ باخيشلارين ايشيغيندا یارانمیش فيكير آيريليغي دوروموندا گئرچكلشمهليدير.
بئله اوْلماديقدا ايشين سوْنو اوٍركآچان اوْلماياجاق، چاتیشماز، عئيبهجر
آليناجاق، هامينين طرفيندن ماراقلا منيسمهنيلمهيهجك.
معين قدر فيكير آيريليغي اوْلمادان اويغارليغين، بيليمين،
دوشونجهنين چيچكلنمهسي آلينمازدير. اوًزلليكله ايصطيلاحلار ـ گئنلليكله ديل
ـ كيمي بير علمي مسئلهده، هم دوشونجه چارپازليغينا، همده دوشونجه
چارپيشمالارينا تمل احتياجيميز واردير.
آنا یارپاق| دوشونجه| قیسا یازیلار| رومان، اؤیکو| تنقید| کیتاب| درگی، قزئت| گوزگو| کیملیک| دوشرگهنین تاریخی آردیجیللیقلا آرشیوی| فارسینوشتها| بیرباشا ایلگی| بوتون یازیلار|
● Bir grup öyrəncilərə bağlı bu internet düşərgəsi azərbaycanlı yazıçı
və düşünər EYVAZ TAHAnın yazılarını yayır
● Düşərgədə gedən yazılara görə sayın müəllifdən icazəli olsaq da bütün
texiniki çatışmazlıqların mısuliyyıti bizim üzərimizə düşür
● BU İNTRNET DÜŞƏRGƏSİNDƏN GÖTÜRÜLMÜŞ YAZILARIN QAYNAĞI MÜTLƏQ GÖSTƏRİLMƏLİDİR
● Bizim E-mail ünvanımız: yarpaqnews@gmail.com
● Yazarın E-mail ünvanı: eyvaztaha@gmail.com
© Bütün hüquqları qorunur və düşərgə sahibinə məxsusdur
