2000ـجی ایلدن چاپ اوچون یول گؤزلهین "دیکتاتور" باشلیقلی کیتاب نهایت کی، "پینار" یاییمئوینده بو یاخینلاردا ایشیق اوزو گؤرهجک. ایواز طاهانین بو کیتابی یوز سئچیلمیش حئکایهنی ائحتیوا ائدیر. کیتابین مقدمهسینده دئییلیر:
«کیتابدا گئدن اؤیکوٍلرین [حئکایهلرین] اوْرتاق اؤزهللیکلری، اوْنلارین قیسا اوْلدوقلاریدیر. بو اؤیکوٍلر، آَدداـ بوددا آَختاریشلارین تاپینتیسی اوْْلسا دا، اوزون بیر سوره درلهنیب توپلانمیشدی. 1993ـجی ایلدن بری، یعنی «یوْل» درگیسینین باشیازارلیغینی مجبوری ترک ائتدیییم ایللردن باشلایاراق، بونلاری توْپلاییب، چئویرمهیه باشلامیشام.
علمی اَراشدیرمالار اثناسیندا، هر بیر کیچیک اؤیکوٍنون یازماسی، اوْخوماسی، و یا ائله بیر اثرین دیلیمیزه چئویرمهسی، یوْرغونلوق چاغی بیر ایستکان ایستی چایا بنزهییردی. (آمما منیم باشلیجا آماجیم بو ایلکین لذتدن داها اوزاقلاردا یئرلشیردی.) بعضَن اوْنلاری بارماقلا ساییلاجاق دقیقهلرده اوْخویوب، چئویرمک اوْلوردو. من، کیتابدا یئر آلمیش «خوُلیوْ کوْرتاسار»ین Julio Cortazar اثرینی، کوچهلرین بیرینده، قیرمیزی چیراغ یانینجا اوْخوموشام و اوْنو «قوردقاپیسی» آدلی یئمکخانادا چئویرمیشم. قیسا دئیهنده، «مینیمال» دئییمینی نظرده توتورام، سؤزلری میندن آز اولان اؤیکوٍلر. باخمایاراق کی سؤزلرینین سایی بعضن اللینی آشمایان اؤیکوٍلرله یاناشی، بئش آلتی اؤیکوٍنون سؤزلری مینی آشمیشدیر.»
