بیلیریک توپلومون [جامعهنین] قادین بارهسینده یانلیش تصورو وار. سیمون دوبوارا گؤره، بو تصورو اونون بدنینین فیزیولوژیک قورلوشو ایله باغلاماغین مؤحکم اساسی یوخدور. بس بو تصور هاردان گلیر؟ اونون نظرینجه کیشی، قادینی اؤزونه یارایاجاق بیچیمده ایختیراع ائتدی. ایستر قوللوقچو بیچیمینده، ایسترسه ده بوت. ایندیکی قادین آنادان اولمامیشدان قاباق بئلهجه گلیشدیریلدی. قادین لازیمی دویارلیلیقدان [خودآگاهیدن] محروم قالاراق، اؤزونو اؤرومچک تورونا بنزهر بللی بیر چئورهده گؤرور. اونا بیرجه سئچهنک [انتخاب] قالیر: ایکینجی درجه لی وارلیق اولدوغونو منیمسهمک.
"حیات یولداشی وظیفهسی" قادینی ائوده دوستاق ائدیب آزادلیقدان محروم قویماق اوچون ایستیفاده ائدیلن مؤوهوماتدیر. دوبوار "وورغون" Amorous The باشلیقلی کیتابیندا، ائوده دوستاق اولماق باخیمیندان "سئوگی"نی بئله ان بؤیوک تهلوکه سانیر. (گلین بو سرت باخیشی بیر آز یوموشالداق: بیر طرفلی سئوگی). وورغون قادین باغیمسیز وارلیغا چئوریلمک اوچون چالیشمالاریندا یئنیلگییه اوغرادیغینی آنلایاجاق. بونونلا دا هانسیسا کیشینی اؤزو اوچون خیلاصکار سئچهجک. بئلهلیکله، قادین ظاهیرن باغیمسیز گؤرونن کیشی شعوروندان آسیلی اولماقلا اؤز وارلیغینا اعتیبار قازانیر.
دوبوار چخیش یولو تکلیف ائدیر. بو بهیهنیلمز آسیلیلیقدان چیخیش یولو اولدوقجا یارارلی و اوبیئکتیودیر: مشغوللوق. قادین توپلومدا ایشلهمکله ان بؤیوک آزادلیغا قوووشا بیلر. اونلارین ائوده دوستاق اولمالارینین قاباغینی آلا بیلهجک ان کسه یول، هانسیسا ایشله مشغول اولماقدیر. بو دا وار کی، هر بير ايشين و يا ايجتيماعي وظیفهنین قاپيسي قادینین اوزونه آچيلديقدا، سئوگينين گؤرونوشو قاپانا بیلر. آنجاق بونون دردنینی چکمک گرهکلی دئییل، بو چاتیشمازلیغا کیشی نئجه آلیشیبسا، قادین دا آلیشا بیلر.
