ایندنبئله بو اینتئرنئت دوشرگهسینده آذربایجانلی اولاراق دوشونجهمیزده و دوشونوش طرزیمیزده کی آفتلری آراشدیراجاغام. "دوشونجه آفتلری" باشلیقلی آردیجیل یازیلار، بو آددا بیر کیتابین سادهلشدیریلمیش ائپیزودلاریدیر. حاضیرلاماقدا اولدوغوم کیتابین مضمونونو بئله قیسا و سادهجه وئرمهیین ایکی فایداسی وار: بیرینجیسی، تفککوروموزله باغلی یازیلاری ساده دیلده بؤیوک اوخوجو کوتلهسینه چاتدیرماق اولور؛ ایکینجیسی، آدلیم بیگینلریمیز و سایین اوخوجولاردان گلن فیدبکلر اساسیندا کیتابی یئنیدن گؤزدن کئچیرمک آسانلاشیر.
بونونلا بئله نه یازیق کی، بو خیردا یازیلار اؤنجهدن اوغورسوزلوغا محکومدور. چونکی فلسفهنین باشلیجا ایشی نسنهلری [شئیلری]، فئنومئنلری، و قاوراملاری [مفهوملاری] سورغولار بورولغانینا سوروکلهمکدیر، چؤزوم یولو گؤسترمک دئییل. بونا باخمایاراق من ایجتیماعی، تاریخی و سیاسی دوروموموزدان آسیلی اولاراق، مسئلهلره پاتوژیک [آسیبشناختی] بوجاقدان باخمیشام.
بو یازیلارین اؤنجهدن اوغورسوزلوق دامغاسی یئدییینین باشقا ندهنی هر نهیی عموم کوتلهنین آنلایاجاغی قدهر سادهلشدیرمکدیر. نییه بئله اولور؟ جاواب چتین دئییل. فلسفه ده بیلگیسایار [کامپیوتئر] کیمی بیر ساحهدیر. اؤزونه گؤره ایصطیلاحلاری و دئییملری وار دیر. نئجه کی، بللی بیلک اولمادان، بیلگیسایارلا ایشلهمک مومکون اولمور، فلسفهیه گیریشمک ایسه، معین قاوراملار و منطق علمی ایله هئچ اولماسا ایلکین تانیشلیق طلب ائدیر. فلسفی قونولارین ذاتی چتینلییی ده ایشی لاپ بوروشدورور. سونوجدا، آراشدیرمالار گئدیشینده بیر چوخ مسئلهلرین گئرچک ماهیتینی ایتیرمهدن، اونلارا آیدینلیق گتیرمک اولمور.
بوتون بونلاری گؤز اؤنونه آلاراق، فلسفه ایله اوغراشمایانلار بیله [حتی] دوشونجه خستهلیکلریمیزین ماهیتینه وارسینلار دئیه؛ هر نهیی سادهلشدیرمیشم. آنجاق بو آرادا دقیقلیی بوتونلوکله کورلامامیشام. اوستهلیک، بو یازیلار اؤزوموزه یؤنلمیش ایلکین تنقیدلردن بیریدیر. حؤکومتلر چوخواخت خاریجی دوشمنلری حئسابینا تنقیدی بوغورلار، دوغما گروپلار ایسه اؤزگهنین قاخینجینی بهانه ائدهرک. حالبوکی، هر سیاسی گوجون و سیاسی چالیشمانین فاجیعه اؤلچوسو آلماسینین تکجه مانعهسی تنقیددیر. تنقید قیزدیرما کیمی هر شئیی تمیزلهییر.
