ان گؤیچک گئرچلیک
Eyvaz TAHA
بیر چوخ خالقلاردا و اینسانلاردا اولدوغو کیمی، بیزده آغیر بیر دوشونجه خستهلییی وار: «بیزدن باشقا بیچیمده دوشوننلره قارشی دؤزومسوزلوک». ییغینجاقلاریمیزدا بئله [حتتا] باشقا سؤز ائشیتمک، یئنی دوشونجه اؤیرنمک ایستهمیریک؛ اؤز اورهییمیزین سسینی دینلهمک، اؤز بئینیمزین عکسصداسینی آیری آیری آغیزلاردان ائشیتمک ایستهییریک. بو بیر یاندان بیزی ساوادسیزلیغین یوورالاق جیزگیسیندن چیخماغا قویمور، او بیری یاندان ایسه «حقیقت» کیمی سئویملی آنلاییشی [مفهومو] قوربانلیق وئریر. بوردا گئرچکلیک قوربان کسیلیر، چونکو من تکجه اؤزومو، سؤزومو، و دوشونجهمی گئرچک سانیرام. حالبوکی دوشونجهلر مندن سندن آسیلی اولمایاراق دوغروـ یالان اولا بیلر. منیم شخصی پیسلیم دوشونجهمین انکار قایناغی دئییل، سنین ده شخصی یاخشیلیغین سینین دوشنجهلرینین دوغرولوغونا گارانتی یارادا بیلمز. حقیقیتین اؤلچو بینالاذهانیدیر. منجه دوشونجهلرین آیاغینی یاراتدیقلاری فاجیعهلردن قیراغا چکمک اولماز، آمما هردن بعضی دوشونجهلری اونلارین یاراتدیقلاری سونوجدان آسیلی اولمایاراق آراشدیرمالیییق.
میشل فوکونون باخیشینا گؤره، گئرچکلییی گوج قورولوشو یارادیر. بو سؤز ایلک باخیشدا گوج قورولوشلارینین تنقیدینه یؤنلسه ده، سون مقامدا آلین یازیمیزا بویون قویماغا گتیریب چیخاریر. چونکو بو دوشونوشون [طرز تفکرون] سایهسینده، فوکونون و باشقا پستمدرنیستلرین ساووندوغو عدالت و اینسانلیق بوتونلوکله یئنیلیر. سیز حقیقتین گوجلولر الینده اویونجاق اولدوغونا اینانیرسانیز, گوجون اؤزباشینالیغی قارشینداکی سون ییخیلماز سنگری اؤز الینیزله اوچورورسونوز.
حقیقتی آیاقلاماغا حاققیمیز چاتمیر. «آزلیق» آختارانلار و «قدرت جیزگیسی دیشیندا [خاریجینده] یاشایان اینسانلار توپلوسو»نون بیر بیرجه داغ کیمی دایاغی وار: حقیقیت. بو ایسه ان گؤیچک گئرچکلیکدیر.
دیر!
