جنابلار! يئر گونشين باشينا فيرلانير!
اوگون يوخدوركي، قدرت تريبونالاريندان دموكراتيایا قارشی گولونج سؤزلر سسلنمهسين. مضحكه بوراسيندادير كي بو آجي سؤزلر بيرباشا دموكراسي محصولو ساييلان راديو، تلويزيون، و نشريهلرده ايله سؤيلهنيلیر، كوتلهيه چاتديريلير. بوتون بونلارا باخماياراق، بو دئييم چاغداش انسان توپلومونون ايلكين احتياجلاريندان بيري اولاراق قالير، و اونو هئچ نه عوض ائده بيلمير. گؤرهن بونون سببي نهدير؟
دموكراتيك توپلوملارین يارانماسي نه اَيلنجه [تفريح] ماهيتلي بير گئديش ایدی، نه ده گؤیلره دیرهنیش دیلهیی. بئله بير حؤكومت سيستئمينه احتياج او واخت دويولدو كي انسانلار داها بللی بير فرد يا طبقهنين هميشهليك حاكيميتده اولدوغوندان بئزیکدیلر. بو ساده بير گئديش دئييلدي. بو، يوز ايللر بويو، حاكيم قاتلارین ظولمو و اؤزباشيناليغینا قارشي ديرهنيشلردن تؤرهنميشدي.
بونون نتيجهسينده گونو كئچميش و اؤزباشينا رژيملر، ياييلماقدا اولان گئنيش اويانيش دویومو و علمي اوغورلار قاباغيندا تاب گتيره بيلمهييب، تملدن لاخلاماغا باشلاديلار. چونكي، انسانلار بئله بير قراره گلميشديلر كي، اؤزونو گؤلرین نمايندهسي كيمي تانيتديران اؤزباشينا رژيملري، يئني قورولوشلارلا عوض ائتسينلر.
كليسا بو گئديشي جيلوولاماق اوغروندا باجاردیقجا چالیشدی. هاردان باشلاسا یاخشیدی؟ کلیسیا نه گؤتوردو، نه ده قویدو، ایلک نؤبه ده دوشونجه صاحيبلريني چئشيتلي بهانهلرله دامغالاماغا و داغلاماغا باشلادي. بير چوخلاري دوستاغا آتيلديلار. جوردانو برونو ديريديري يانديريلدي. گاليله محكمه قارشيسيندا «قارا»يا «آغ» دئمهلي، گئجهني ايسه گوندوز آدلانديرمالي اولدو.
گاليله يئري يئريندن اويناديب، گونشين باشينا فيرلاتميشدي. بونونلا دا كائناتين تن اورتاسيندا دايانميش كليساني گونش سيستئمينين بير کونجونه سيخناميشدي. پاپا يئر پلانئتيني [كورهسيني] وارليغين اورتاسيندا گؤروردو، اؤزونو ده يئرين گؤبهيينده. ایش ده ائله بوردان کورلاندی. گاليله آدلی قورخاق مُرتد! بونونلا راضيلاشميردي. او، جناب پاپاني يئرله بیر یئرده، باش گيجلديجي سورعتله گؤنشين باشينا فيرلاتماق ايستهييردي. پاپا و عيسوي [خريستيان] دين خاديملري بونا بويون قويموردولار. گالیلهنین باشی او قدهر آغریدی کی، عزرائيل ايله قارشيلاشمالي اولدو. گاليله اؤلمك ايستهميردي. بونون اوچون، محكمه اثناسيندا اعتراف ائتدي كي: «جنابلار! سيز دئيهين دوزدو، يئر گونشين باشينا فيرلانمير.» آمما بو فيكيري بوغماق مومكون اولسايدي بئله، گاليله دئميشكن« يئر» يئنه ده «گونشين» باشينا دؤنهجكدي.
بوتون حبسلر، ايشكنجهلر و اعداملار كليساني يئني دييشيكليكلر بورولغانيندان قورتارا بيلمهدي. انسانلار آرتيق اويانميشديلار. و بوتون ديني و دونيوي گوج آراجلارینی اللرينده توپلاميش ـ نئجه دئيهرلرـ تانري نمايندهلريندن بئزيكميشديلر. چونكي، اصلينده هئچ بيري سوچسوز اولمايان انسانلارين ايچيندن، كميسهنين آللاها عاید اولان گوج و صلاحيتلري اؤزونه چيخماسي، داها گولونج ساييليردي. نتيجهده دموكراتيا ياراندي.
دموكراتيانين ايلكين مقصدي، بير زومرهنين الينده توپلاشميش گوج واسيطهلريني كوتلهنين آراسيندا پايلاماق ايدي. دموكراسي بودور. و بئله بير اؤنملي آنلاييشدان آنجاق حاكميتي غيردموكراتيك يوللارلا قازانميش انسانلار قورخماليدير. بونو دا آتيرماليييق كي، كوتلهني قاتيغين قارا اولدوغونا اينانديرماق اولسا دا، دموكراتيايا قارشي چيخان دوشونجهلره هميشهليك اينانديرماق اولمایاجاق.
