شعر، قاباريق وارليقدير
ایواز طاها
شعر خستهليكدير، قيزديرمادير، کافکا دئميشدير. قيزديرمانين درجهسيني آزالتماق هله لاپ ساغالماق دئييل. ترسينه، قيزديرما هر شئيي تميزلهيير، داها آيدين گؤستهرير.
شعر خستهليكدير، قيزديرمادير، کافکا دئميشدير. قيزديرمانين درجهسيني آزالتماق هله لاپ ساغالماق دئييل. ترسينه، قيزديرما هر شئيي تميزلهيير، داها آيدين گؤستهرير. تبريزلي خطيبه گؤره، «شعر حاققيندا يازماق، شعر يازماقدان چتيندير»، شاعير حاققيندا يازماق بونلارين ايکيسيندن ده. كيمسه دئميشدي، شاعير، بير قورو داللا اوزوناوزادي دانيشابيلن آدامدير. بو بوتونلوكله دوغرودور، آمما بوندان داها دوغرو شئيلر ده وار.
شعرين شعريت قازانماسي اونون آلنينا يازيلير. شعر يا شعردير يا هئچ نه. اورتا شعر يوخدور. شعر، شعريت قازاناندا اولدوزلاري آياقلاريميزين آلتينا جالايير، قازانماياندا ايسه آياققابيلاريميزين آلتينين توزو اولماغا دا يارامير. باخ بو جمال ثريا دير دانيشير: «اولدوزلار قيامت کيمي ايدي/چونکو بير آز اوول ياغمور ياغميشدي /آدام بولود کيمي ايدي، خاطيرلادي /آدامين آياقلارينين آلتيندا اولدوزلارين اولدوز اولدوغو واردي /آدام اولدوزلارا باساباسا يورودو /چونکو بير آز اؤنجه ياغمور ياغميشدي.» شعر اؤز آماجينا قايناييب قاريشماليدير؛ تام اؤزگورلوکله روحون درينليکلريندن هارا گلدي سيچراماليدي. دوغرودور، هارا گلدي. شعرين مضمونو نه پوئتيک دويغودان گلير، نه توپلوم تاپشيريغيندان، نه اوخوجو ماراغيندان، نه ده شاعيرين اوماجاغيندان. شعرين فورماسي ايسه، «سسله آنلام» آراسيندا آرديجيل گئديب گلن هارمونيادان دوغور. اولدوزلا آياققابينين چارپيشماسيندان. ليريک شعر بيله، شاعيرين کؤيرک دويغولاريني دئييل، تاريخي دايانديرماق ديلهييني چاغلايير، زاماندان آيريلماق ايستهييني. شعرين شعريتينده، «اؤيود، اينام، عؤهدهليک» چيخداش اولور. بونلار شعرين آياقلاري آلتينا آتيلان قاوون قابيغيدير. شعر بونلارا، يا دا اونلارا قوللوق ائتمير. اونون قارشيسينا هانسيسا مقصد قويولورسا، چورويور، يوخا چيخير. آچيغيني دئييم، شعر اويغارليغين دَيرلر خزينهسينه نهسه آرتيرمير، اويغارليقدا چات يارادير.
يئرين گؤيون آراسيندا آسيلي قالميش اينسان آنلارينا چيلهنن ديکسينمه قيغيلجيملاريدير شعر. يئر حاققيندا دانيشيلان گؤي يالانيدير، و يئرده آنيلان گؤيون خاطيرهسي. بونلار دئييل، رؤويا دير شعر. بير آنليغا وارليغين وارليغينا جالانان بو رؤويا، هر اينسانين گؤزونده بير بويايا چالير. چالماسا شعر دئييل. چونكي بو دونيا، کؤکونه وارديقدا، گؤردويوموز گؤرکمده دئييل، دوشوندويوموز بيچيمدهدير. بيز قاورام سوزگجيندن كئچيريرهك، تانيييريق بو دونياني. يالنيز شعرين ايشيغيندا بو ادراك دونياسينين گئرچک اولدوغونو، و گئرچک دونيانين يالانلا دولدوغونو آنلاييريق. هگل دئيهنده کي، «من دونيانين تاريخيني يازديم و تاريخ اولايلاري اونونلا اويغون گلمهليدير»، فلسفه قارانليغينا زيللنمير، شعرين سسيني دينلهيير. شعر، گئرچكليكلردن داها گئرچكدير.
شعر خيالدان باش قالديران آرديجيل سؤزجوك دؤيوشچولريدير. شعر يازيلاركن، سؤجوكلر باشلاييرلار يول يئريمهيه، رؤوياني اوياتماغا، دونياني دولاشماغا. او، بو دؤيوشچولرين گوجونه، دونياني آلت اوست ائدير. بيز سؤزجوکلرين هر اوخونوشوندا، يئني دونياني كشف ائديريك: پارچالانميش، دَييشميش، طبيعي قانونلاري پوزولموش دونياني. «شعر هرنهيي اونون ايلکين داياناجاغينا قايتارير»، هر شئيي اونون ايلکين کيملييينه چئويرير. ايندي او نسنهلر، «سانکي بيرينجي کز گؤرونورلر»، بيرينجي کز گؤيده اوٍزهن سونا بولبوللر کيمي. ائليوت دئميرمی «گئنيش جادهلرده يولچولوغا چيخ، سونرا ائوينه قاييت، هر شئيه بيرينجي کز گؤردويون کيمي باخ!» يانيلميشام شعر رؤويا دا دئييل. رؤويانين اؤرتدويو نسنهلري شعر آچيقلايير. رؤويا کئچميشي آنديقدا، شعر گلهجهيي چاغلايير. بيز ايندي گئرچهيين سؤزونو دانيشميريق، اؤزونو گؤروروک.
شعر، يوخو ايله آييقليق سينيرلاريندا دوغور. قاينار باخيشلي، قاراپاپاقلي يولچولار اوتورارکن قاتار آياقيالين يول گئدير، شعر دوغولور. يئر آلتيندا يوخلاشان جانليجانسيز نه وارسا، شاعير بئينينده قالخير آياغا. «باريش! جانينداكي زهرلي دردله! اييرهنمه اؤزوندن ايلان بالاسي. بلكه ده ان آجي حقيقت، ائله سنسن يئر اوزونده». شاعير اؤزو دئميرمي بوردا «ايلان بالاسي» شعر و شاعير حاققيندادير؟ من راميز رؤوشنين ايلان بالاسيني آييقليقدا گؤرورم، سيلويا پلاتين سؤيلهديکلريني ايسه يوخولاريمدا: آخار توستوسونو قويوب گئتميش کؤهنه قاتار، باخيشلاريميزي قزيللي دؤشوندن يايينديران دالغين بايقوش، موم هئيکللرينين چيينينده تولکو دريسي، شهر بوغارسيقلاريني چئينهين سيچان ديشلري، و قاپالي [مرموز] فاجيعهنين آغير سوسقونلوغو، اينتحار. پلات اوتوز بير ياشيندا اؤزونو اؤلدورمهديمي؟ بو، "وارليغين دؤزولمز يونگوللويو" دئييلمي؟
شعر، اَن اؤزگون [اوريژينال] دانيشيقدير. دانيشيق. سؤيلهييجي، دينلهييجي اولمادان ديل ده يوخدور. ديل اولان يئرده دونيا دا وار. چاشديرماسين بو «دونيا» دئييلن، سيزي. اينسانلا داشکسک آراسيندا يئرلشن دوزهنليکدير بو دونيا؛ شاعيرله اولدوز آراسينداکي اوچورومدور. مارالين، يارپيزين، اولدوزون دونياسي يوخدور، اينسانين دونياسي وار. چئشيدلي وارليقلار ايچينده تکجه اينساندير بو اوچورومدا شاعيرانه ياشايان. اونون ديلي وار آخي. ديلي ده شعر يارادير. شعر يا ديلدن اؤنجه گلير، يا دا اؤلدورولمک اوٍزره اولان ديل کوٍللويوندن باش قالديرير. سيرر اورتادا اوتورور، بيزسه اونون باشينا فيرلانيريق.
شعر يازيليرکن بيز يارانيريق، گليشيريک. تام قارانليق بير ميصراع اولدوغوموزا گؤره، بيز آپآيدين وارليق بلگهسينه چئوريليريك. اينسانين گؤزهللييي اونون آنلاشيلمازليغيندادير. شاعير اؤز دونياسيندان قوپموش دانيلماز بير وارليقدير؛ اوستاوسته قالانميش آنلامسيز سؤز بيرلشمهسي؛ گوموش پردهدن چيخيب تاماشاچيلار آراسيندا اوتورموش چالباش آكتيور. شعرين ميصراعلاريندا يوخلاشان ابهام، فلسفي دوشونجهلردن داها آرتيق، تاريخي ايرهلي سورويور. آچيقليقدا، آيدينليقدا، نسنهلرده و اوست بيلينجده دايازليق ياتير؛ آنلاشيلمازليقدا، قارانليقدا، اؤزنهده [سوبیئکتده] و آلتبيلينجده ايسه اؤلمزليک وار، لذت، درينليک. شعردهکي آنلاشيلمازليق، روحو دورغونلوقدان قورتارير. باخ! وارليغيميزين بوتؤولويو، دانيلمازليغي بیزیمله باغلیدیر، آنلاشيلمازليغيميزين اولدوقجا يوکسکلييي ايله باغليدير. سؤزجوکلر ياغيشي گؤيدن الهنرکن بو «بوتؤو وارليق» روحوموزن چاتلاقلاريندان باش قالديرير، گؤیه آغیز آچير.
آديني چکمک ده چتيندير دليلييين. قافيه وورغونلاري ايله ايشيم يوخ. آمما دليليکدن پاي آلمادان، کيمسه ايمگه [تصوير، ايماژ]، مئتافور [استعاره]، وزن و هارمونيا گوجونه گووهنيرسه، عاغلينا دوعا يازديرماليدير. «پنبهي داغِ جنون ايچره نهان دير» شاعير. شاعير دليلرين دليسيدير. دلي ايسه آنلام ياراتمير، سؤز و سس اووسونونا سالير بيزي. «دلي هئچ بير آنلامي ياراتمير» دئيهنده، يارادير، آنلاديغيميز آنلامي ياراتمير. شعر اوخويورکن آنلامسيزليق چؤللوکلرينده گؤروروک ياراديجيني. دئمهديممي بيز هر نهيين ان آچيق، ان دوشکون، ان داياز قاتلاريني گؤرمک ايستهييريک. نه يازيق کي، گؤرونمهيهني گؤرمک ايستهميريک. بيز آليشديغيميز داورانيشلارا، دوشونجهلره و نسنهلره عاغيللي دئييريک. تانيديغيميز يوللارا گئديريک. دلي آمما، ياشام يولونو بيزيمله گئتمير، قاچاق جيغيرلاردان يورويور. ياغهاـياغدا اسن يئلليکده گئدير. هؤلدئرلينه باخين:
يازيقلار اولسون منه،
قيش گلدييينده
چيچهيي،
گونشي، ايشيغي، کؤلگهني
هاردان تاپاجاغام؟
ديوارلار يئريندهجه دورور،
سسسيز و سويوق، ياغهاياغدا اسن روزگاردا،
بايراقلار دالغالانير.
اينگيليس شاعيري درئيدئن دئميشکن «عاغيللي اينسانلار چوخ يآخين دورورلار دليلييه.» دئموکريتوس «دليليک اولمادان شعر اولماز» دئيير. شاعيرين عاغيلليسي يوخدور، وارسا شاعير دئييل. چونکو اينسانلارين ان دليسي عاغيلليسيدير آخي. ان عاغيللي دلي ايسه قاني قانلا يويور: «ديشلهديمسه لعلين ائي قانيم تؤکن قهر ائيلهمه/ توت کي، قان ائتديم، عدالت ائيله قاني قانه توت!»
هر شئيدن اؤنجه، شعر اؤلوم و سئوگي اوزهرينده قورولور. اؤلومون نه اولدوغونو اؤلدوکده بيلهجهييک، آمما سئوگينين آنلامي شعره آيدينليق گتيردي بلکه. شعر سئوگيدن يارانير، ان يوکسک اوفوقلرده ايسه اونونلا بيرلهشير. فلورانس اسکاولشينين سؤزو ايله دئسک، «دوزگون سئوگي اؤزوندن يانادير، هر بير قورخودان اوزاق. هئچ بير ديلهيي اولمادان، نهسه اوممادان، سئوگيلينين باشينا ياغير. سئوگي نين سئوينجي آلماقدا دئييل، باغيشلاماقدادير.» سئوگيني شعرين آياغي آلتيندان چکيرسک، شعردن نه قالاجاق: قورو سؤيودلر و اوميدسيز تيترهک قورباغالارين گؤلمهجهلرده قورولتولاري. من، شعرين عؤهدهليکدن بويون قاچيرماسيني وورغولايارکن، بونو دئمک ايستهييرديم. بونون باشقا آدي شعر دير. يونيس امرهني اونوتما! سئوسن سئويلهجکسن، اؤلسن ديريلهجکسن. شاعير هر بير سئوگي ايله اؤلور، هر بير اؤلومله ده ديريلير. سئوگي، اؤلومله ديريمين قووشاغيدير. بيرجه كز «سني سئويرم» سؤيلهديكده، بيز اؤلومو چاغلاييريق شعرده. چونکو، سئوگي بوتون كايناتين اينتيظاميني ايستهنيلن بيچيمده پوزور. نظم داغيلير، قافيه يوخا چيخيركن نه باش وئرير گؤرهسن؟ نه باش وئرهجک، بوتون آليشقانليقلار، قوتسالليقلار، گلهنهكلر، توخونولمازليقلار، و ايناملار، کئفجيل روحون نَفَسي ايله اريييب گئدير. بيرجه سئوگيني چاغلايان چيلپاق سؤزجوکلر قالير. من دئميرم، شمس تبريز دئيير، «سئوگينين سيررينه واران اولمادي، وارسا دا سرگردان قالدي.»
عادت و اينام بير قاراباسمادير سانکي اينسان تاريخينده. شعر اولماسايدي هاردان بيلهجکديک عادت يالان قالاغيدير، اينام ايسه آلدانما قايناغي. بيز اؤلورکن يالنيز چيلپاق گئرچکلييي باغريمزا باسيريقسا، شعر بو قوووشمانين اؤندن گلن خبريدير. هايدگر دئيير: «ديلين داها سونرا ايرهلي سورهجک نسنهلري، شعر اينديدن باشلايير دئمهيه». اوشونمه! شاعير، اويغولو ديريلر آراسيندا دولاشان آييق اؤلودور. اؤلن، آنجاق اؤزونو هله ده ديري سانان بو اؤلو، اؤلوم اؤرتويو آرخاسيندان دونياميزا بويلانير، گؤردوکلريني سرسملهيير. شاعيرين ابدي سرگردانليغي باشلانير. شعر يارانير. سرگردانليق وارسا شاعيرين آزغيني دا، قودرت قوللوغوندا دوراني دا، اؤزونه قارشي عوصيان ائدير: «ائي باديمجاني، بيرلشميش ميللتلر تشکيلاتيني بير يئرده يارادان!.. ائي شعري، پرئزيدئنتلرين اوشاقيانا نيطقلريني بير يئرده يارادان! سؤيله، سؤيله کي، حاق شعرله، سونبوللرلهدير، نووه بومبالاري ايله دئييل.»
خورخه لويس بورخئسين سؤزويله دئسك: «دونيادا سيررلي- سئحيرلي اولمايان بير شئي يوخدور. آمما بعضي شئيلرين سئحيرليلييي، داها قاباريقدير. اؤرنهيين: دنيز، قوجالارين گؤزو، ساري رنگ و موسيقي». منجه شعر بونلارين هاميسيندان داها قاباريق وارليقدير.
