سوررئالیزمه یئنی بیر باخیش
ايگيرمينجي يوز ايللييين اوللرينده يارانميش ادبي مکتبلرين ان ماراقليسي سوررئاليزم ايدي...
بو دا چايخانادا دوغان بير مکتبدير آخي. سوررئاليزم دئييمي ايلک دفعه گيوم آپولينئرين Guillaum Apolinaire (1880ـ1918) «ترئزيانين ممهلري» آدلي اثرينده قوللانيلميشدي. سوررئاليزم باشدا اولماقلا بو مکتبلرين چوخو شعرله ياناشي رسسامليقدا اؤزونو دوغرولدور. سالوادور دالينين بيرجه رسم اثري بير کيتاب شعر قدهر سوررئاليزمين اؤزهلليکلريني هايقيرير. آمما تکجه شعردن دانيشديغيمز اوچون رسسامليغا گؤز يومماليييق.
سوررئاليزم، مضمون باخيميندان اوچ داياق اوزهرينده دايانيردي: لاغ irony، رؤويا و دليليک. رؤويا بونلارين باشيندايدي. چونکو رؤويا متندير، سمبوليک ايمگهلرله دولو متن. بو اؤزهلليکلر اوتوماتيزم automatism نظريهسينده بيرلشيردي. آندرئ برئتون Andre Breton سوررئاليزمي بو اوتوماتيزمده، يعني اؤز اؤزونه ايشلهمکده خلاصه ائديردي: «پسيخي خاليص اوتوماتيزم؛ دوشونجه سورهجي يالنيز بئله بير آندا دانيشيقدا، يازيدا، و آيري شيوهلرده باش وئرير. بو دا يعني هر بير راسيونال قايدادان آزاد بيچيمده، هئچ بير ائتيک و ائستئتيک باخيشدان آسيلي اولمادان دوشونجهني آنلاتماق.» باشينيزي نيييه آغريديم، دلي کيمي ساييقلاماق. يازيچي اؤزونو رؤويايا تاپشيرديقدان سونرا، دوشونمهدن آغزينا گلهني دليجهسينه دئمهلي و يازماليايدي. ايلک جومله اؤز اؤزونه گلير و اونون آردينجا آييق ذهنله ايلگيسي اولمايان باشقا جوملهلر آخماغا باشلايير. بوردا ذهن اؤزاؤزونه و عاغيلين موداخيلهسي اولمادان چاليشير. «من»ين گيزلي درينليکلرينده باسديريلان يئتکين گئرچکلييي اوياديب ائشيگه چکمک. بونون ان ساده يولو اؤزاؤزونه يازماقدير. سوررئاليستلرين «اؤزاؤزونه يازماق» آدلانديرديقلاري پرينسيپ، فرويدون ايرهلي سوردويو «بيلينجآلتي» قاوراما سؤيکهنيردي. سن اؤز ذهنينين بيلينجآلتي بؤلگهسيني اؤزگور [آزاد] بوراخيرسان، او دا ايستهديييني يارادير. برئتون بونو ائديردي. ژاک لاکان رؤويانين قورولوشو ايله ديلين قورولوشو آراسيندا ياخينليق گؤرمهميشدن قاباق، سوررئاليستلر رؤويا و ديلين قوووشاغيندا يازيبـ ياراتماغا باشلاميشديلار.
لاغدان، رؤويادان و دليليکدن آد چکدينيز آمما سئوگيني اونوتدوم. بلي سئوگي. او گونلر سئوگي سوررئاليستلرين باشليجا ايلهام قايناغينا چئوريلميشدي. برئتون دئييردي کي، سئوگي بيزيم اينقيلابي گيريشيمه ماراغيميزلا چيينچيينه دايانيردي. بئله کي، سوررئاليزمه لاييق هر بير ذؤوق و اَسريکليک [سرخوشلوق]، سونلوقدا سئوگييه گئديب چيخيردي. اونون سؤزويله دئسک، او گونلر چاپ ائديلن شعرلرين ان ماراقليسي سئوگي شعرلري ايدي. ائله بير سئوگي بوتون ساواقلاري [سدلري]، بؤيوک مانعهلري داغيداجاق قدهر گوجلو ايدي.
سوررئاليستلر «سئوگييه چاتمايان اللر» باشليقلي مقالهني چارلي چاپليني ساوونماق اوچون يازديلار. چاپلين، چکدييي فيلملريندن دولايي، «اخلاقسيزليق» دامغاسي ايله سؤيولوردو، حالبوکي سوررئاليستلر اونا «سئوگي داياغي» کيمي سايغي بسلهييرديلر. آخي اينسان اوچون بوتون ايدئاللاردان داها يوکسکليکده دايانان فئنومئن ايدئال سئوگيدير. بونو دا دئييم کي، سوررئاليستلر سئوگي باشليغي آلتدا سئکسدن ده يان کئچميرديلر. شاعيردن اولمايان ايش!
سوررئاليستلر رؤوياني گئرچکلييه اوستون سانيرديلار و ياشاييشين اؤنملي مسئلهلرينين چؤزولمهسينده اوندان يارديم ديلهييرديلر. بونا گؤره ده اونلارين بعضي شعري اورهيه ياتمير، چونکو حددن آرتيق رؤويايا قاپيلير. لاکين بو قدهر رؤويايا دالما، ايلک باخيشدا آخماق گؤرونسه ده، بو ياناشمانين درين سببي واريدي: رؤويا عالمينده هر شئي ساده و قولاي گؤرونور. و اولدوغو کيمي جيلوهلهنير. چونکو فيکيريميزي پوزان «ايمکان» چيخيلمازليغي اوردا آنلامسيزدير. ساييقلامالار، دهشتلي قاراباسمالار و عئيبهجر رؤويالار ياراديجيليغين باشليجا قايناغيدير. سوررئاليستلر ائله بير چاغدا باش قالديرديلار کي، عوٍصيان، دليليک و روح خستهلييي زمانهنين آپاريجي اؤزهللييينه چئوريلميشدي. روحي خستهليک اولمادان سانکي صنعت ده يارانا بيلميردي. بو مکتبين تمل داشيني قويانلارين بيرينين فيکرينجه، روحي خستهلر، اؤزگون سوررئاليستلرديلر. بو ايسه هم آزادليغا يول آچا بيلردي، هم ده توتاليتئريزمه. بير آز گئرييه قاييداق. فرويد بشر توپلوموندا بوتون شعورلو قورولوشلارين اؤزولونده [اينفرااستروکتوروندا] دايانميش «آلتبيلينج»ين قارانليغيني ايشيقلانديرماق ايستهييردي. سوررئاليزم ده شعورون بو قارانليق بؤلگهسيني باشليباشينا بوراخيرديردي کي، صنعت يارانسين.
سوررئاليستلر بيزيم «گيزلي اؤزوموز»ده باسديريلان بوتؤو وارليغي اوياديب چاغيرماق ايستهيرکن ميثلي گؤرونمهين آزادليغي بيزه باغيشلاديلار. والتئر بئنيامينـه Walter Benjamin (1892-1940) گؤره، آوروپا بئله بير آزادليغي باکونيندن بويانا سيناماميشدي. سوررئاليستلر دونيايا قارماقاريشيق اولايلار مئيداني کيمي باخيرديلار. اونلار، اولايلارين آراسينداکي منطيقي باغليليغي، سوبيئکتيو چاغيريشيم [تداعيمعاني assosiya] ايله دَييشيرديلر. بونو دا آرتيرمالييام: سوررئاليستلرين اثرلرينده «گئرچکلييين گؤزلهنيلمز آندا پارلاماسيني قاوراماق» ايرهلي سورولموشدو. منطيقه قارشي چيخماق دا بوردان گليردي. سوررئاليستلر، منطيقي پارچالاماق اوچون اويوشماز اشيالاري ياناشي اوتوردوردولار: تيکيش ماشيني، چتر، اتازن و قيزيل گول. آندره برئتونـا گؤره گؤزهلليک ايکي اويوشماز نسنهنين قارشيلاشماسيندا باييرا سيچرايير.
1922ده دادايزمين ايچيندن باش قالديرميش بو آخيم، هر بير منطيقه قارشي چيخاراق سببيت [عليت] قانونو داغيتماق ايستهييردي. بو داغيديجليق البته بونونلا بيتميردي، هر شئيه عوٍصيانلا سونوجلانيردي. بو عوٍصيان ليبراليزمين تکسسلي قورولوشونو لاخلاتماق و بورژوازينين ايکياوزلو اخلاقيني ييخماقلا ياناشي، اوسچولوغو [عقلانيتي] ده داغيديردي. هيتلئره، استالينيزمـه يول آچيردي. بعضي سوررئاليستلر استاليني اؤيوردولرسه شاشيرماماليييق. بيز بوردا عاغيلين افليج اولدوغونو گؤروروک. اشپئنگلئرين Oswald Spengler مکاشفه فلسفهسينين باش قالديرديغيني گؤروروک. عاغيل اؤز يئريني ساواش و جنونا وئرير.
بونو دا وورغولاماق گرهکير: عاغيلين بو تاريخي يئنيلگيسينده نه سوررئاليزمه، نه ده اؤنجهکي ادبي بديعي آخيملارا تکجه ندن کيمي باخماق اولماز. ترسينه، آيدينلانما دؤنمينده گليشن و غرب اويغارليغيني بللي استقامته يؤنلدن قاتي و سرت راسيوناليزم اؤز قارنيندا اؤز ضديني بئجردي. عاغيلين آللاهليق ائتدييي يئرده، اورهک عوٍصيان بايراغي قالديراجاق. ايييرمينجي يوزايلليين اوللريندهکي بديعي آخيملار بو بايراغي قالديرميشديلار.
چوخلاري گومان ائديرلر کي، سوررئاليستلرين آماجي گيزلي ضميرين ساحهسينه ال تاپماق، اونو صنعت اثرينده جانلانديرماق ايدي. بو يانليش تصوووردور. اونلار، آلتبيلينجين دونياسيندان چئشيدلي عنصرلري آلاراق يئني بير خيالي دونيا ياراتماق ايستهميرديلر. اونلارين آماجي مانعهلري اوچوروب داغيتماق ايدي؛ گيزلي ضميرله آييق ضميرين آراسينداکي، و ايچ عالمله ديش عالمين آراسينداکي جيسماني و روحاني سدلري سينديرماق.
سوررئاليتلر سدلري سينديرماق، مانعهلري آرادان قالديرماق ووورغونويدولار. اونلار، مانعهلري آرادان قالديرماقلا ايلگيسيز اولمايان باشقا بير ايش ده گؤردولر. اونلار ادبي آنلاتيمين [بيان] قورولوشوندا کؤکلو دييشکليک آپارديلار. ائله بير دؤنم ياراندي کي، ادبي آنلاتيم گوندهليک ديله قوووشدو. شعري کوتله ديلينه قوووشدورماقدا سوررئاليستلرين رولو دانيلمازدي. باخماياراق کي، بو اوغورون هاميسيني اونلارين حئسابينا يازماق دوزگون اولمازدي. چونکو بو ساحه ده فرانسا شاعيري آرتور رمبونون، هابئله داداچيلارين بؤيوک امهيي واريدي. هئربئرت مارکوز دا بونو وورغولايير. عادي و ادبي سؤزجوکلرين آراسيندا مومکون (اولا بيلهجک) اوخشارليقلاري آختارماق، بو دؤنمين اؤزهلليکلريندن ايدي. بو دؤنمده يوکسک شاعيرانه آنلاملار، نثرين عادي قاوراملاري ايله آنلاديليردي. يئني شعر، آز بير موددتده، شعر/نثر ايلگيسينين تمليني لاخلاتدي و طنطنهلي عبارت يازماغا چاليشماق عوضينه، تانيش سؤزجوکلرين نئجه سئچيملهسي اؤنم قازاندي. لفظ، هم ذهن سيستئميني پوزدو، هم ده جوملهنين عادي سؤز دوزومونو. لفظ جوملهنين عادي سؤز دوزومونوندن بويون قاچيراراق، ذهندهکي تجروبهاؤنجهسي آنلاملاري دانماق آراجينا چئوريلدي. اوستونلوک سؤزه وئريلدي. او دؤنمين ادبيياتيندا سؤزجوکلر يئني، عيني حالدا اوسانديريجي بير دونياني جانلانديريرديلار. ويرانليغا [خاراباليغا] دوغرو شوٍتوين دونيا، اوچولوب داغيلميش دونيا. ديل قورولوشوندا باش وئرميش بو دييشمه، او قدهر ائتکيلي اولموشدور کي، حتتا اينسانين طبيعت اوزهرينده آپارديغي سيناقلارين تمليني لاخلاتميشدي.
