ايواز طاها قومسالليقدا بوي آتان چينار
آنا ديلي سادجه کنديميزده، يؤره ميزده اؤيرنديييميز ديل دئييلدير. بو، ديلين ايلکين ائورهسيدير. ديل، اينسانين بيلگيلرينين قايناغينا و گؤسترگه آراجينا دؤنوشمهديکجه آخساقدير، ائورهنسل ايستکلردن، دوشونجولردن يوخسوندور. ديلين توکنمهيَن بير درينلييي وار. بو درينلييه وارماديقجا، دالماديقجا اؤنملي بير ياپيت (اثر) يازماق مومکون اولماز. بو درينلييه واريش کنديليگيندن اينسان بئينينين انگين اوزايينا (فضاسینا) بير يول آچميش اولور. بو يولدا يورودوکجه دوشونجه دئنئييملري قازانيم و ياراديجيليق بيچيمينده اورتايا چيخار. بونون اوچون ديلين ياراديجيليق ديليني بولماق ايلکين قوشولدور (شرطدیر). ذهنين کنديني آلقيلاما (ایدراک ائتمه) مئکانيزمي بيليمسل اولاراق کشف ائديلميش دئييلدير. آنجاق گئنيشلهين، کندي اوزاييندا قاپساديغي مکانلاري قاورالارا دؤنوشدورن ذهن، بولوشلاريني نسنللشديرميش اولور. سورهکلي اولاراق اوزاي و زاماندان پارچالار قاپسايان قاوراملار ذهنين کندي ايشلهييشيني سوموتلاشديرما (مشخصلشدیرمه) اؤرنهيي کيمي اورتايا چيخار. قاوراملار هم ذهنين ايشلرليييني، چاليشما ديناميکيني اولوشدورور، هم ده ذهنين بولوشلاري يئنه ده قاوراملارلا سوموتلاشير. بو ندهنله ده ديل کندي ياشامسالليغيني (حیاتییتینی) قاوراملار يولويلا و قاورامساللاشديرما دولاييسييلا سوردورموش اولور. کئچميشدهکي زامانلار، بير چوخ داورانيشلار و تپکيلر قاوراملار يولو ايله اينديليکده گلهجکله ايلهتيشيمه گيره بيليرلر. ديل يالنيز بو شکيلده "وارليغن ائوي" اولا بيلير. وارلیق، دونهنی، بوگونو و گلهجهيی ایله بیر بوتون اولاراق دیل گوزگوسونده گؤرونر. بو اوزدن ده دیل بیلگیسی درینلشدیکجه، وارلیق حاققینداکی بیلگیلریمیز ده گئنیشلر. اينسان- وارليق ايليشکيسينده ديل تانيملاييجي ائتکندير (عامیلدیر). آنلاماق، تانيماق وارين (وارليغين) وارلا (ذئهني وارليقلا) اؤرتوشمهسيدير. بو ايکي وارليغي اؤرتوشدورن ديلدير. بو اوزدن ده هم ذهني وارليق، هم ده کوسموس و اوزاي، ديلي اؤزونه ائو اولاراق بليرتميش اولورلار. ديل قوللانديقجا وارليغين ائوي سارايلاشير، قوللانيلماديقجا بو ائو اؤرهنه (örən-viranə) دؤنوشور. ان گؤزل وارليق بئله، دوغرو قوللانيشيندان يوخسون بوراخيلديغيندا چيرکينلييه و کؤتولويه يووارلانير.
ايواز طاهانين "شعر وارليغين ائويدير" ياپيتي بير ديل آبيدهسيدير. تورک ديلينين درينلييينه ائنميش بير کيشي آنجاق بؤيله اؤنملي يازينسال (ادبي) ائلئشتيريده بولونا بيلير. يالنيز بو يوللا ديليميز اؤز سايقينليغيني قورا و قورويا بيلر. طاها اؤز ياپيتينين گيريش بؤلومونده "هر شئيدن اؤنجه منيم بؤيوک ديلهييم آذربايجان تورکجهسينين نظري يؤندن زنگينلشمهسيدير. ديليميز دوشونجه ساحه سينده ديل آچماليدير" - يازير. کيتابي اوخويوب بيتيرن هر بير اوخوجو گئنيش بيلگيلر قازانماقلا بير يئرده طاهانين ديليميزي دوشونجه ديلي ياپماقدا نه قدهر باشاريلي اولدوغونون بيلينجينه وارميش اولور. بو قدر ائورنسل بيلگيني اؤز ايچينده بارينديران کيچيک حجملي بير کيتاب سون يوز ايلده نه باکيدا، نه ده تبريزده يازيلميشدير. يازارين بو کيتابي يازمادان اؤنجه نه قدهر اوخويوب بيلگي بيريکديردييي ديققتلردن يايينمير. قورخونج باسقيلار آلتيندا قوزئيده و گونئيده قوراقلاشديريلان، قومساللاشديريلان ديليميز طاهانين ياراديجيليغي ايله ياشيل خياللاريني گئرچکلشديرميشدير. کيتابي اوخويوب بيتيرديکدن سونرا آدامين عاغليندا "کيتابين ايچريگي (مضمونو) ايله آدي اويوم ايچينده دئييل" کيمي فيکير يارانير. چونکو کيتابدا يالنيز شعرين فلسفهسي، الده ائتدييي ائورنسل تجروبهسي و ائورهلري حاققيندا دانيشيلمير. فلسفهنين اؤزو، وارليق و صنعت فلسفي حاققيندا گئنيش بيلگي وئريلير. دونيانين فلسفي فيکريني ائتکيلهميش بير چوخ دوشونورلرين صنعت و وارليق حاققيندا فيکيرلري ايله تانيش اولماق مومکوندور. آيريجا طاهانين بو صنعت و فيکير آخيملارينا ائلئشتيرل (تنقیدی) توتومو دا چوخ ايلگي چکيجي و اؤيرتيجيدير.
ائلئشتيري اولماديغي يئرده بؤيوک صنعت ياپيتلاري يارانا بيلمير. چونکو يالنيز ائلئشتيري يولو ايله بيلينجآلتيندا ساخلي اولانلار بيلينجه داشينير. بو ائلئشتيري دئديييميز يالنيز صنعت ياپيتي اوزهرينه دئييلدير، قاوراملار اوچون ده کئچرليدير. يا بيلينجآلتيندا، يا دا توپلومسال ياشامدا اونودولموش، يئتيم کيمي ياشايان بير چوخ قاوراملارا ائلئشتيرمن دَيَر وئرير، اونلاری ديله قازانديرير. بو قاوراملارا حئيثييت يوکلهنير. طاهانين بو اثرينده دونيا يازيني (ادبيياتي) باغلاميندا آذربايجان ادبيياتينا فلسفي ائلئشتيري ديققتي چکمکدهدير. بير چوخ جيددي شاعيرلرين و صنعت آدامينين ياراديجيليق و ذهني اولاناقلاري بو کيتاب آراجيلیغی ايله گئنيشلهنهجکدير. چونکو هر ائلئشتيرل اثر بيلينجآلتيندان بيلينجه دوغرو بير یؤنهلیش ساغلار. طاهانين بو کيتابيندا گونوموزده ديلين قورتولوشو اوغرونا بير اوجاق ياخيلميش، ديلين گلهجهیي آيدينليغا قوووشموشدور. اولوسلارين گلهجهييني بهلرلهين اونلارين ديليدير. سيياسي، ايقتيصادي سيستئملر چؤکدويونده اوناريلا (تعمیر ائدیله) بیلر. لاکين ديل سيستئمي چؤکدويونده هر شئي بيتر. بو اوزدن ده طاهانين بو کيتابي هر شئيدن اؤنجه ديليميزين گئرچکدن ديل اولدوغونو ايثباتلاماقدادير. بو ياپيت بير ديل آنتروپولوژيسيدير. کيتابدا سون 100 ايلده اوزرينه يانليش يوزوملار ياپيلميش بير چوخ قاوراملارين دوغرو آچيقلاماسي وئريلميشدير. بونلاردان بیری هئچ خوشلانماديغيم "ايدئولوژي" سؤزودور. يالنيز ائورنسل بيلگييه يييهلنميش اولان [آدام] بو يانليشليقلاري توپلومون بولانيق ذهنيندن سيله بيلر. بو آچيدان دا ايواز طاها بؤيوک جسارت گؤسترميشدير. کيتابين بوتون سطيرلري بيلگي ايله دولو اولدوغو اوچون اونون حاققيندا يازماق چتين ايشدير. بو چتينلييي اورتادان قالديرماق اوچون کيتابي ديققتله و الده قلم آلتيني چيزه- چيزه اوخوماق گرهکير.
