اؤتن هفته دونیادا ایکی فاجیعه باش وئردی: دمشقده 1300 نفر کیمیاسال سیلاح‌لارین قوربانلیغینا چئوریلدی. مصرده مین نفره یاخین اینسانین قانی رابعه العلویه مئیدانیندا حربی چئوریلیش آردینجا مباح سانیلدی. هر ایکی اولایی عرب مئدیاسی‌نین قایماغی اولان
الجزیره کانالیندان اوره‌ک آغریسییلا سئیر ائتدیم.
بیرینجی فاجیعه‌نین ایران رسمی مئدیاسیندا یانسیماسی اولدوقجا ایلگینج‌دیر. بونلارین نظرینجه گویا کفن ایچینده مسجیدلره دوزولموش اوشاقلی قادینلی جنازه‌لر غرب مئدیاسی‌نین اویدورماسی‌دیر. احمدی نژاد گؤیدن دوشمه‌میشدی، بو فاحیشه سیاستین و آغ یالان‌لارین اورونو ایدی. ایران تئلئویزیاسی بیلیر بو ایش کیمین ایشی‌دیر کی، زهرلی گازلارلا حیاتینی ایتیرمیش اینسان‌لاری گؤسترمکدن چیکینیر. یوخسا دفعه‌لرله، آی‌لارلا او جنازه‌لری خبرسیز کوتله‌نین گؤزونه سوخاردی.
مصرده ایسه دوغرودور موسلمان قارداش‌لار خالق ایستک‌لرینه سایماز یاناشدیلار؛ دینی بیر آنایاسانی کوتله‌یه تلم‌تله‌سیک سیریماق ایسته‌دیلر. آمما بونلارین هئچ بیریسی، مئدیانین گؤزو اؤنونده اودولو سیلاح‌‍لارلا خالقین خزل کیمی یئره سریلمه‌سینه برائت قازاندیرا بیلمز. رابعه العلویه وحشلییی قینانماسا هر یئره باش وئره بیلر.