من نیفرت أدبیاتینا قارشییام. گئرچک و یا فرضی دوشمنه یاغدیریلان سؤیوش‌لر عاغیل گؤستریجیسی دئییل، گئری‌قالمیشلیغین علامتی‌دیر. آچیغینی دئییم، واخت وار نه دئمک اؤنملی دئییل، نئجه دئمک اؤنملی‌دیر. دوشمنه قارشی زوراکی بیر دیل‌له دانیشان اؤزنه [فاعل]، دوستا دا رحم ائتمه‌یه‌جک. بدیعی بیر اثر، ایچیمی [مضمونو] ایله دئییل، بیچیمی [فورماسی] ایله اؤلچولمورمو؟ باخمایاراق کی، دوشمنین اؤزو ده آرتیق سرت، بوتؤو و کلاسیک آنلامینی ایتیرمیشدیر.

بو بیچیمین فاجیعه‌وی یؤنو وار. باشقاسینا قارشی نیفرت سؤیلمینی[گفتمانینی] قوللانان کیمسه، اؤزونو راضی سالماغی هر شئیدن اوستون سانیر. بئله کی، سیاسی آماج، اینسان‌لارین موتلولوغو، توپلومون یاخشلیغیا دوغرو دییشدیریلمه‌سی بو نیفرتین کؤلگه‌سینده قالیر. چونکو بئله بیر آدام یئری گلدیکده اؤز فیکیرداشینی دا نیفرت سؤیلمی‌نین بورولغانینا سوروک‌له‌یه‌جک. چونکو او، همیشه اؤزونو خئیر اؤلچوسو کیمی گؤرور، باشقاسینی ایسه شر. بو شر دامغاسی ایسه، فیکیر آیریلیق‌لاری زامانی دوستون آلنینا وورولا بیلر. دئوریم‌لرین ظفر سونراسی دورومونا باخین! دئوریم اؤز اوشاق‌لارینی اودمور، دئوریمچی‌لر بیربیرینی پارچالاییر.