بیز او تایدان گلمه‌ییک، ننه‌م (آتامین آناسی) تمیز باکیلی قادین ایدی. منیم اوشاقلیق گون‌لریم اونونلا کئچدی. گؤوهر ننه‌نین منه آشیلادیغی دیلین ائتکیسی ایله یئنی‌یئتمه چاغ‌لاریمدا خیرداجا بیر درگی بوراخیلیشینا قورشاندیم “قارداش” آدیندا. بو آدی سئچمکده اوستاد دوزگونون “یولداش” درگیسیندن ایلهام آلدیم. درگی منه یوموشاق تجزیه‌طلب اتهامی گتیردیییندن نه ائتسم یاخشیدی؟ تورکجه یازماغی قاتلاییب طاقچایا قویوب بیلیم یوردونا یوللاندیم. آمما سئویملی ننه‌نین اؤلومو منی بیرداها دیله قایتاردی. آنانین فراقیندا بیر اوزون رومانتیک یازی یازدیم “ایتکین گون‌لرین ناغیلی” باشلیغی آلتدا. دیل آلت‌بیلینجیمدن بیردن بیره فواره‌لنمیشدی. منی دوغما، تانیش و گیزم‌لی دونیاما چاغیرمیشدی دیل. بو یازیدان بیر ایل سونرا اؤزومه گووه‌نه‌رک “یول” درگی‌سی‌نین پلانینی تؤکدوم.
من ننه‌نی بیر ده عمی‌لری “قورشون هاردان آچیلدی” باشلیقلی رومانیمدا جانلاندیرمیشام. ایکی عمیم باکیدا آنادان اولموشدولار، ۳۷ رئپرئسیالاریندا آتامین عمیسی گولله‌لنمیشدی، سونرالار ایسه ایکی عمیم‌له ننه‌م بو تایا دئپورت اولموشدولار. بونون اوچون موغانین آدلیم حاجی‌لاریندان بیری همیشه تحقیرلی بیر چالارلا منه دئیردی: «آ بالا سندن اسلامچی چیخماز، سن عمللی باشلی بیر کمونیست‌سن!» گؤره‌ن دوغرومو دئییرمیش؟
___________________________
بو ایستاتوسو سلیم زحمت‌دوست و بولود مورادی‌یه بورجلویام.