یونان دوشونجه‌سینده کوتله‌نین چئشیدلی آدلاری واردیر: “اوخلوس” بیچیمسیز قارماقاریشیق کوتله‌یه دئییلیر. “دئموس” ایسه بعضی فرقلی‌لیک‌لرینه باخمایا‌راق دئموکراتیکجه ایداره اولونان بو گونکو وطنداش توپلومو [جامعه‌ی مدنی] ایفاده ائدیر. ژاک رانسیئره گؤره، دانیشان حئیوانین باشلیجا اؤزللییی دیلی آنلاماقدا دئییل، بونو اوشاق‌لاردا باجاریر، دیلین اوره‌تیمینده‌دیر. دیلین نیظاملانماسی ایله دئموس و وطنداش یارانیر، بوندان اؤنجه بیچیمسیز کوتله واریدی. رانسیئر وطنداشی، دیلی آنلاماقلا دیلی یاراتماق آراسیندا یئرلشدیریر. آدام وار دیلی آنلاییر و همین آنلاق یولویلا ایشی، توپلومسال ایلیشکی‌لری و یاشام فورماسینی قاوراییر. بو قبیل آدام‌لار اوخلوس تبعه‌لری‌دیرلر. آدام دا وار دیلی یارا‌دیر. یاراتماقدان مقصد ایسه اؤز قونوموندان علاوه، باشقا اینسان‌لارین دا ایستاتوسونو شهرین جاری ایئرارخیک [سلسله مراتبی] اینتیظامیندا معین‌لشدیریر. بو کیمی آدام‌لار دئموس تبعه‌لری‌دیرلر. بو مرحله‌نین اؤزنه‌سی وطنداش[شهروند]دیر، دانیشیق گوجونه اؤلومجول آنتاگونیزم‌لردن اوزاقلاشماغی باجاران وارلیق. فیزیکی ساواش‌لار یئرینه دوشونجه‌لری ساواشدیرماق. دانیشمایان حئیوان بونو باجارمیر. 2004ـ‌جی ایل نوبئل موکافاتی لاورئاتی ژئلینئک‌ـه گؤره، «سؤزجوک‌لر بیزیم اوچون اؤنملی‌دیر، چونکی داها دانیشمایان کیمسه آرتیق گئجیکمه‌دن قتل تؤره‌ده بیلر.»
قایناق: >>>