“يئني دؤنم” The New Age ایصطیلاح ايييرمينجي یوزایللییین ايکينجي ياريسيندا غرب اؤلکه‌لرينده يارانميش مدني آخيما اشاره ائدير. 1968 اوْلاي‌لاري آردينجا غرب آيدين‌لاري سانکي بؤيوک يئنيلگييه اوغراديلار. فرانسا باشدا اوْلماق‌لا غرب اؤلکه­‌لري 1968ـ‌جي ايل گئنيش اؤيرنجي حرکاتي­نين Evenments شاهیدي اوْلموشدو. بو اوْلاي‌لار، بوتون غربده 60ـ‌جي ايل‌لرين اوْرتالاريندان باشلانميش گنج‌لر و اؤيرنجي‌لر عوصياني­‌نين پارتلایيش نؤقطه­‌سي ايدي. مؤوجود ایجتیماعي گله­‌نک­‌لره و گوج قورولوش‌لارينا قارشي يؤنلميش بو اوْلاي‌لار، غرب اويغارليغيندا درين ايز بوراخدي. بئله کي، اوْلاي‌لاردان سوْنرا شرقين ميستيک دوشونجه‌لري غربده باش آليب گئتدي. هیند عرفاني، تائويزم و ذئن دبه ميندي. بو مکتب‌لر، کاپيتاليزمين ظفري اوُجباتيندان روح سارسينتيسي کئچيرن آيدين‌لارا اويوشدورجو [مخدّر] درمان ايدي. بئله بیر یاناشما طرزی “یئنی دؤنم” آدلانیر.