عالیم قاسیمووون “خاطیره‌دیر” ماهنیسی گئرچک آنلامدا گؤزل أثردیر. سؤزوم بوندا دئییل، شعرین سؤزلرینده‌دیر. ماهنینی دینلرکن بیر میصراع منی دیکسیندیردی: «نییه چیخدیق یولا بیز». آذربایجانین ماهنی شاعیرلریندن بو حکیمانه میصراعنی گؤزله‌مزدیم. میصراع آنتیک بیر وورنوخمانی ییغجام بیچیمده اؤزونده یئرلشدیریر. بو وورنوخما یاشامین آنلامی باره‌ده حئیرانلیغا عایددیر. آمما دیکسینتیم او آنداجا خیال قیریقلیغینا چئوریلدی. بابا وزیراوغلونون بو میصراعسی منده درین شاعیرانه دویغو اویاداردی اگر نؤوبتی میصراع دوشوک سانتیمانتاللیق باتاقلیغینا سوخولماسایدی. “دلی اولوب بو دنیز.”
«دلی اولوب بو دنیز”؛ نؤوبتی میصراع بو ایدی. بونو دینله‌دیکده دیکسینتیمین یئرسیز اولدوغونو آنلادیم. شاعیرین یول قورخوسونون سببی “دیریم”له باغلی آغیر بیر سورودان قایناقلانمیرمیش. یعنی «بیز نییه دونیایا گلدیک» کیمی نفس‌قیران سوال ایله ایلگیسی یوخ ایمیش. میصراع آذربایجان شعرینده چوروک دنیز خیالینی یئنه ده أن کؤهنه بیچیمده جانلاندیرماق ایسته‌ییرمیش. بونونلا دا بیتمیر، سونراکی یئرسیز میصراع، شعرین ائستئتیک اؤزه‌للییینه قیرمیزی قلم چکیر: “بیر آدادیر سئوگیمیز.”
شعر فلسفه مکتبی دئییل، شعرین بیله‌رکدن فلسفه یوکونو داشیماسینا گره‌ک یوخ. دوشونجه یوکو آنجاق شاعیرین چیینینه دوشمه‌لی‌دیر. پول والئری‌ده بونو گؤروروک، اوکتاویو پازدا، حتتا احمد شاملودا دا. بیزیم بو ماهنی شاعیریمیزین ایینه اوجویجا دوشونجه وورنوخماسی اولسایدی، نؤوبتی میصراعدا شعریت چؤکمزدی. و نهایت شعر عالیمین سسینده فیرتینایا چئوریله بیلردی.
____________________
بو بیر قارالاما [چرکنویس]دیر. اونو گئنیشلندیره‌جه‌یم.