ایواز طاها، چاغداش ادبیاتیمیزدا ان دیرلی شخصیتلردن بیریدیر. سؤز یوخدور کی دیلیمیزین جان وئردییی بیر چاغدا دیلیمیزین دادینا چاتدی. او، گنج اولارکن، 1370 ایللرینده “یول” درگی سینی یولا سالاراق نثر ساحه سینده دیلیمیزی بیرده باشدان دیریلتدی. یول درگی سی نین ائتکیسی نی هئچ کیم اونودا بیلمز. او زامانلاردا یول درگیسی طاهانین زحمتلری سایه سینده یولا دوشدو، اما نه یازیقلار کی چوخ اوزانمادی و نئچه ایلدن آرتیق عؤمرو اولمادی. آمما یئنه طاها دایانمادی؛ بو دؤنه دردلری دوشونن یازیچیمیز تحصیلینی داوام ائتده رک باکییا گئدیب و علم اؤیره نیر و بیرده تازادان بیر عالیم کیمی و بو دفعه دوکتورا پیتیگینی الده ائده رک، فلسفی دوشونجه لرله وطنینه قاییدیر و “یارپاق” درگی سینی بوراخیر. دیلیمیزین گؤزه للیگینی و اؤزه للیگینی بیز یارپاق تاپیریق و اؤزوموزه، هابئله دیلیمیزه گووه نیریک. نه یازیق کی بو درگی ده چوخ عؤمر ائده بیلمیر. بیر حالدا کی داها دیلیمیزده- شعریمیزده و نثریمیزده بی ادبی آخیمین درین ائتکی لرینی بوراخمیشدیر. “وارلیق” درگیسی اؤز مکتب کیمی تاثیرینی بوراخسا دا ایندی طاهانین مکتبی یارانیردی و مختلیف آدلارلا: یول، یارپاق و گؤزه ل-گؤزهل کتابلار و نهایتده بیر ادبی یئنی لیک آخیمی. من بو ادبی آخیمی چاغداش ادبیاتیمیزدا بؤیوک و یول آچان بیر حرمت کیمی دیرلندیریرم. چوخلو گنجلریمیز بو یولو داوام ائتدیلر و داوام ائده جکلر.

http://azerlu.blogfa.com/post-13.aspx