سؤزجوک‌لر قالابالیغیندایام، سؤزجوک‌لر کوتله‌سی‌نین داریخدیریجی أحاطه‌سینده. ایکیلی دانیشیق‌لار، جیب تلفون‌لاری‌نین زنگ‌لری، چئوره‌م‌ده‌کی دوداق‌لارین تله‌سیک ترپه‌نیشی، و یانیمدا اوتورموش کیشی‌نین قارماقاریشیق مونولو‌گ‌لاری. بوتون بونلارین آخاریندایکن غریبه حادیثه باش وئریر؛ هئچ بیر ریتوآلا [آیین] گره‌ک قالمادان سؤزجوک‌لرین آنلامی سامان کیمی سوورولوب گئدیر. سؤزلر بوش‌یئره خرجله‌نیر. بوردا چوخلاری بوش‌بوش دانیشیر. بونون آدی “دانیشان دیلسیزلیک”دیر. گونئی شعرینده بئله بیر دیلسیزلیک یایغین‌دیر.
●
آنلامین، منطیقین، اؤزبیلینجین یوخا چیخماسی بودور؛ دویغولارلا آنلام‌لارین یئردییشمه‌سی. دویغو آنلامین یئرینده اوتورار-اوتورماز أن دوشوک پوپولیزم باشلانیر. عاغیل مأذونیته [مرخصی‌یه] گؤنده‌ریلیر. بوردا سؤزجوک‌لر حتتا آنلامسیزجا تکرارلانان هانسی‌ها پوچ ریتوآلا دا بنزه‌میرلر. اونلار هئچ‌دیرلر؛ بیر اوووج زیبیل. بوردا سؤزجوک‌لر أن یارارسیز ایله‌تیشیم یوکونو بیله، داشیمیرلار. بو قدر آلچالدیلمیش سؤز، بوندان اؤنجه دونیانین تملینده دایانمیشدی. تانری کلمه‌دن باشقا نه ایدی کی؟ اینسان کائناتی سؤز آراجیلیغی ایله پارچالاماسایدی مدنیت گئدیشی باشلانمازدی. سؤز دیلی یارادیر، دیل ایسه سیمگه‌سل اینتیظامین اوجاق داشی‌دیر؛ یعنی توپلومون، تاریخین و مدنیتین. دئریدا کائناتین اؤزه‌یینی سؤزه سیغیشدیرمیشدی: “متندن باشقا بیر دونیا یوخدور”؛ ایندی ایسه أرسطو سؤزونو گئری آلیر: بعضن “اینسان دانیشان حیئوان دئییل، سؤزلری چورودن آخماق‌دیر”.
●
بوردا دیل سانکی سس سویه‌سینه ائندیریلیب‌دیر؛ حیوان سسیندن داها آشاغی سویه‌یه. حیوان هله دیل سویه‌سینه یوکسلمه‌میش بیر سس‌له آجی‌لاری آندیرا بیلیر بیزه. لاکین ایندی اوتوردوغوموز یئرده اوست‌اوسته قالانمیش سس دالغالاری‌نین هیچ بیر آماجی یوخ. بو سس‌لر آردیجیل اؤزلرینه چارپیر، سینیر، داغیلیر، گؤزدن ایتیرلر. هئچ بیر معنا ایزی بوراخمادان اؤلومون قارانلیغیندا یوخلوغا قووشورلار. بونو، آرابیر قاناد گرن سوسقونلوق آنلاریندان آیدین آنلاماق اولار. سؤزجوک‌لرین نیسگیللی اؤلومونو دئییرم.