اوچ گون اؤنجه وجودومون بیر بؤلومونو اؤز ألیم‌له تجرید ائتدیم. یاندیم. اینیلده‌ین چاره‌سیز حئیوان کیمی. ایتکین اوغلونو لیمان‌لاردا گؤزله‌‌ین اومودسوز آنانین اوره‌ک یانغیسی گلدی عاغلیما. ضرورت [جبر] دوشونجه‌سینی چؤزه بیلمه‌ین عالیمین چاره‌سیزلییی نه‌دیر کی، منیم وورنوخمام قارشیسیندا. دیزلریمده هئی قالمامیشدی، بیلمیرم دیز چؤکدوم‌مو، چؤکمه‌دیم. گئجه‌نی اؤزومله خلوته دالدیم، نه یازا بیلدیم، نه ده اوخویا. گؤزومو زیلله‌دیم قارانلیق اوتاغین یوخاری کونجونده‌کی قارا بوشلوغا. گؤزلریمدن یاش گیله‌گیله سوزدو. بو یالنیز بیر دالیش [مکاشفه] دئییلدی، رئاللیغین آغیر باسقیسی ایدی.
یئریدیم، یئرییه بیلمه‌دیم. اوتورماق ایسته‌دیم، اوتورا بیلمه‌دیم. قرارسیزلیق [بی‌تصمیمی] اوچورومو بودور. نه بیر سؤزون، نه ده بیر سسین چیرکابینا بولاشماق گوجونو بولا بیلمه‌دیم اؤزومده. قارانلیغین دؤزولمز یونگوللویونده سوکوتا سیغیندیم . سوکوت همیشه گیزملی جنت کیمی گؤرونموشدو منه. بئتهوونئین بئشینجی سیمفونیاسی کیمی بیر نسنه. آمما ایندی سوکوت جهنمه چئوریلمیشدی. روحوم اونون آلوولو درینلییینده چیرپینماسین نئیله‌سین؟
اوزاق کئچمیشده بیر نئچه ایل گوج جبهه‌سینده دایاندیم، گوج منی دیشلادی. چونکو شوبهه‌لرله دولو دجل بیر ذهنین یئری اقتدار دوزه‌ن‌لییی دئییل. من اؤزگورلوک آختاریشیندا یانلیش آدرسه گئتمیشدیم. سؤزون دوغروسو، من نه قدرته قارشی دیره‌نمک ایسته‌ییردیم، نه ده کؤله [برده] کیمی اونون قوللوغوندا دایانماق. من اؤزگور یاشاماقدا ماراقلی‌ایدیم، بالیق سویا باغلی اولان سایاغی. موخالیفین اؤلومونه دؤزمه‌یه‌رک کیمسه‌نین خیال عالمینه توخونمادان یاشاماق. نه یازیق، اورتا بیر آلان یوخ. یا گوج جبهه‌سینده دایانیرسان، یا دا حئیوانلیقدان اینسانلیغا کئچمه‌یین شرطی ساییلان سیاسالی اونودورسان. یوخسا اؤلکه‌سیز بیر وطنداشا چئوریلیرسن. هر آن آغیرلیغیندان صبریم توکه‌نه‌جک بیر مصیبت. مادی ایمکان‌لاریمی توکتدیلر، صبریم توکنمه‌دی. چونکو همیشه گوج قایناق‌لاریندا بیر چات گؤرموشم. و ظفر چاغلایان بیر اومود سئزمیشم او چات‌لاردا. بوردا ظفر وارسا یئنیلگی [شکست] یوخ.
آنجاق بو سارسینتیمین سیاست آلانینا هئچ بیر دخلی یوخ. دوشونجه فردیت‌دیرسه، یئنیلگی ده بئیینده باش وئریر. منیم ده ایچیندن زامان کئچمه‌ین یارالاریم وار. یارالار یئرینده قالسین، تکلیکده اؤز داخیلیمده چاتلاق چاتلاق اولدوم؛ سینیب، تؤکولدوم. وجومودون بیر بؤلومونو تجرید ائتدیم. بو ایسه آغی قده‌ر آجی یئنیلگیم‌دیر.
یازی‌لاریمی سیزلر اوچون یازمیشام، بو یازینی دا منیم اوچون اوخویون، هئچ بیر سوال وئرمه‌دن!