شعر بير معنالي فئنومئن دئييل. اونون ايجتيماعي ياشامدا ضديت‌لي رولو واردير. شعر ديليميزي ديري ساخلاميش ائتکن‌لردن [عاميل‌لردن] بيري‌دير. آنجاق بو مثبت اوٍزون منفي آستاري دا وار.
تاريخي شرايطيميزدن آسيلي اولاراق بيزده هله ده شعر نثره اوستون‌دور. ديليميزي آياقدا ساخلاميش ائتکن‌لرين باشليجاسي شعر اولسا دا، مدنيت آلانيندا شعرين تام ائگه‌منلييي سيمپتوماتيک علامت‌دير. يعني خسته‌ليک بلگه‌سي‌دير. أدبيات، شعرله نثردن اولوشور. آنجاق توپلومدا تکجه شعر يازيليرسا، دئمک، توپلوم گئري قاليب. تي. اس. ائليوت ايييرمينجي يوزايللييين باشلانغيجيندا دئميشدير: «بديعي فيکير شعري آرخادا قويماسا، هئچ بير درينلييه، بوتؤولويه، چيچکلنمه‌يه گليب چيخا بيلمز.» آنجاق بونونلا راضيلاشمايان‌لار دا وار. نثر سونراسی بیر شعر ده وار.
ماتيوْ آرنوْلد شعرين گله‌جک جلاليندان دانيشير. شعر گله‌جکده عظمته مينه‌جک، زيروه‌لرده داياناجاق. دبدبه‌لي ديل و يوٍکسک قوْنو، شعرين گئرچک وظيفه‌سيني اونا باغيشلاياجاق. بو, ديني گؤره‌و‌دير. دين بير زامان‌لار انسان ياشامي‌نين تئراژيک قات‌لارينا قاتلاشيردي. ايندي “ايمان دنيزي” چالخانتيدان دوٍشوب، اؤلوٍ دورغونلوق يارانيب. بئله بير آندا شعر، انسانين معنوي ياشاميني جانلانديرا بيلر، دنيزي يئنيدن چالخالانديرا بيلر.
⏺ ایواز طاهانین “آنجاق شعر” کیتابیندان