کیتابی بوردان ائندیریرن >>>
“کیملیکچی سیاست باره‌سینده پاتولوژیک تئزلر“ [تزهایی آسیب‌شناختی درباره‌ی سیاست‌های هویتی].
بو، ایواز طاهانین قیسا بیر کیتابی‌‌نین آدی‌دیر. کیتابین ایلکین قارالاماسی [چرکنویسی] یالنیز سانال اورتام‌دا نشر اولونور.
یازار بو کیتابدا بعضی سوال‌لارا جاواب آختایریر: سیاست دوغرودان‌می چیرکین بیر ساحه‌دیر؟ کیملیکچی سیاستین آماجی نه‌دیر؟ اؤزچو [ذات‌گرا] طبقه آنلاییشی اؤنمینی ایتیردییی چاغدا توپلومسال دییشمین اؤزنه‌سی [فاعیلی] کیم‌دیر؟ طبقه یوخسا کیملیکچی کسیم‌لر؟ کیملیکچی سیاستین بیزده‌کی سورون‌لاری و مانعه‌لری نه‌دن عیبارت‌دیر؟ بیزیم کیمی توپلوم‌لاردا عدالت و آزادلیق مسئله‌سینی چؤزمک اوچون “رادیکال دئموکراتییا” أن یاخشی چؤزوم یولودورمو [راه حل]؟
یازار ایللر اؤنجه ایشاره ائدیردی کی، «سون واخت‌لار ایکی اؤنملی مسئله‌نی چؤزومله‌مه‌یه [آنالیز ائتمه‌یه] گیریشمیشم. کیملیک [هویت] و عامیلیت. منی ماراقلاندیران مسئله بودور: بوتؤو کیملیک و دمیر عامیلیت همیشه دیکتاتورایا یول آچیب. فرانسا اینقیلابیندا دا بئله اولوب، سووئت‌لر بیرلیینده ده، ایراندا دا. پست‌مدرنیزمین اورتایا آتدیغی داغینیق کیملیین ایسه بیر توکو دبرده‌جک قده‌ر گوجو قالماییب. من بو ایکی اوچورومون آراسیندا قیل کؤرپوسو سالماق ایسته‌ییرم. بو ایکی ضدیت آراسیندا ایجتیماعی چالیشقانلیغین هم یارارلی، هم ده اینسانی بیچیم‌لرینی [فرم‌لارینی] آختاریرارم. جاواب نه ساوادسیز باغیرغان سوبیئکت‌ده‌دیر، نه ده اگزیستانسیالیزمین ایضطیرابلی فاعیلینده. مارکسین دا سئویملی ایشچی طبقه‌سی بیلگی پاتلاییشی [انفجار اطلاعات] نتیجه‌سینده داغیلمیشدیر.»
یازار بو تئزلرده چئشیدلی مسئله‌لره توخونور کی، بونلارین چوخونو اوچ بؤلوکده یئرلشدیرمک اولار:
ــ دیل؛
ــ اؤزچولوک و اونونلا باغداشلیق قوران بوتونچولوک [تمامت‌‌خواهی] کیمی قاورام‌لار؛
ــ شعر و اونون نثره اوستونلویو.
بونلارین کیملیکچی سیاست‌له هانسی ایلگیسی واردیر؟ بو عامیل‌لرین هانسی پاتولوژیک یؤن‌لری واردیر؟
طاها بیر موددت‌دیر گونئی آذربایجاندا دوشونجه آفت‌لرینی آراشدیریر، بو کیتاب ایسه همین آراشدیرمالارین کیچیک بؤلومودور. “کیملیکچی سیاست باره‌سینده پاتولوژیک تئزلر” کیتابی اوتوز تئزین اون بئشینی ائحتوا ائدیر، قالان اون بئش تئز ده یاخین گله‌جکده اونا آرتیریلاجاق‌دیر.
تئزلرین باشلیغی بوندان عیبارت‌دیر:
بیرینجی تئز: سیاستین آتا-آناسی وار؛
ایکینجی تئز: اؤزچولوک [ذات‌گرایی]؛
اوچونجو تئز: بوتونلوک زوارکیلیق [خشونت] قایناغی‌دیر؛
دؤردونجو تئز: مین بویالی سولچولوق، میللتچیلیک، ایسلامچیلیق؛
بئشینجی تئز: اؤزگونلوک [اصالت] آبسورددور؛
آلتینجی تئز: دوزگون دیل سیاستی اوغروندا سسدن دیله دوغرو؛
یئددینجی تئز: کیملیکچی سیاست و دیل ساوادسیزلیغی؛
سککیزینجی تئز: دوشونجه یوخسوللوغو؛
دوققوزونجو تئز: دوققوزونجو تئز: میتوسدان لوگوسا (اینتئرنئت، ایستئثنا و شیفاهی مدنیت)
اونونجو تئز: اونونجو تئز: أخلاقی قارشی‌دورما، یوخسا سیاسی دوشمن
اون بیرینجی تئز: ائندیرگه‌مه‌چیلیک [تقلیل‌گرایی] و نسنه‌لره تک‌اؤلچولو باخیش؛
اون ایکینجی تئز: شعر بیزی هم دیلدیر، هم ده اؤلدورور؛
اون اوچونجو تئز: قهرمانلیق دؤنمیندن وطنداش [شهروند] آنلاییشینا دوغرو؛
اون دؤردونجو تئز: قورغو قورامی [نظریه‌ی توطئه]؛ دورتو dürtü و دوشونجه‌لرین قاریشدیریلماسی؛
اون بئشینجی تئز: “کیملیکچی سیاست” رادیکال دئموکراتییا ایله اویغون‌دور.
کیتابی بوردان ائندیریرن >>>