حیدربابا قزئتی “گونئی آذربایجاندا 1385ـ‌جی ایلین پارلاق اولدوزلاری” باشلیقلی بیر پرویئکت گئدیشینده 85ـ‌جی ایلین ان گوجلو شاعیر و یازیچیسینی اوخوجولار و نظرصاحیب‌لری طرفیندن سئچمیشدیر. بو سئچیمین نتیجه‌لری بئله‌جه اعلان اولدو:
ایلین ان گوجلو یازیچیسی:
1- دوکتور ایواز طاها – توپلام 292 سسله
2- دوکتور علی داشقین – توپلام 143 سسله
3- ناصر منظوری – توپلام 112 سسله
ایلین ان گوجلو شاعری:
1- محمد رضا لوائی – توپلام 218 سسله
2-کیان خیاو – توپلام 64 سسله
3- هادی قاراچای – توپلام 63 سسله
ایلین ان دگرلی کیتابی:
1- شعر وارلیغین ائوی دیر – توپلام 162 سسله
2- آواوا – توپلام 131 سسله
3- ساریشین – توپلام 96 سسله
ایلین پارلاق گنجی:
1- سعید موغانلی – توپلام 148 سسله
2-آیداش دلی سئل – توپلام 94 سسله
3- مهیار علیزاده – توپلام 74 سسله
1385ـ‌جی ایلین پارلاق اولدوزلاري نئجه سئچیلدی؟
سون ایل‌لرده آنا دیلیمیزده و مدنيتيميزله باغلي بول-بول اثرلر بوراخیلیر. سئوینديريجيسي بودور کی یئنی اثرلرین بیر بؤلومو یوکسک کیفیت و علمی نورم‌لار اساسیندا بوراخیلیر. آما هر نئجه اولسا بونلارین هامیسی بیر سویه‌ده بوراخیلمیر، و اثرلیرین بعضی‌سی داها گوجلو اولور. بونا گوره ده هامیمیزا وظیفه‌دیر کی داها دگرلی اولان ایش‌لری و قلم صاحیبلرینی اوزه چکیب، اونلاری دگرلی ایش‌لرینه گؤره آلقیشلاياق و بوتون دیل و ادبیات هوسکارلارینا تانیتدیراق.
بونا گؤره حیدربابا هفته‌لیگی‌نین تورکجه بؤلومو اولاراق بو آغیر ایشی بوتون نظر صاحیب لریمیزین واسیطه‌چی‌سی کیمی بوینوموزا آلدیق. آیدین‌دیر کی مدنیتيميزين اوغروندا بوتون چالیشان‌لارین یاردیمی اولمازسایدی، بو ایشی یئرینه گتیره بیلمه‌یه‌جکدیک. بونا گؤره بوتون دیل و ادبیات اوغروندا چالیشان‌لارا بو چتین و البته دگرلی ایشه قاتیلدیقلارینا گؤره تشکر ائدیریک.تانری سیزی یورماسین.
ایلین ان یاخشی‌لارین کیملر سئچدی؟
سئچیم سوال‌لارینی “حیدر بابا” قزئتینده چاپ ائتدیک و سایین اوخوجولاردان نظر بیلدیرمه‌لرینی ایسته‌دیک. دئمک اولار تانیدیغیمیز شاعیر ،یازیچی و قلم صاحیب‌لری‌نین آدینی لیست ائدیب سورغولاریمیزی ایمئیل واسیطه‌سیله اونلارا گؤنده‌ردیک. سونرا اونلاردان خاهيش ائتدیکك كي آشاغيدا يازيلميش يوللارين بيري ايله جاوابلاری بیزه گؤنده‌رسین‌لر:
ـ 1-9141141174نومره سینه مئساژ گؤندرسینلر.
-حیدربابا هفته‌لیگی‌نین آدرسینه مکتوب گؤندرسینلر.
ـ بو آدرسه ایمیل گؤندرسینلر info@heyderbaba.org
درين سايغيلارلا
نويد محمدي
حؤرمتلي دوكتور جواد هيئتين ايلين پارلاق اولدوزلاري پروژ‌ه‌سينه گؤره اورك سؤزلري
حيدربابا نشريه‌سي‌نين دگرلي امكداش‌لاري
سالام و سايغي ايله، دئمه‌لييم كي، كئچن ايلين بؤيوك حيصصه‌سيني خاريجده اولدوغوم اوچون تاسوف‌له ايچه‌ري‌ده چاليشان قلم اهلي‌نين ايش‌لريني ياخيندان ايزله‌ينمه‌ميشم، اونا گؤره ده سيزين سوال‌لارينيزا جاواب وئرمگه اؤزومو حاقلي گؤرمورم. آنجاق قئيد ائتمه‌لييم كي «ان ديرلي يازيچي، ان ديرلي شاعير، ان ديرلي كيتاب و ان ديرلي گنج»ين سئچيمينده باشلاتديغينيز پروژه‌نين حقيقتن ثمره‌لي اولاجاغينا اينانيرام.
اصلينده آذربايجان يولوندا قلم چالان‌لارين ايش‌لريني دگرلنديريب، اونلارا قدر- قيمت وئرمك ، اؤزو ده همين يازيچي و شاعيرلرين ياراتديغي اثرلر كيمي تقديره لاييق‌دير.
من سيزين بئله نجيب چاليشمالاريزا گؤره الينيزي سيخيب، صميم قلب‌دن تبريك ائدير و بو ايشينيزي آذربايجان علم و ادبيات ساحه‌سينده گوجلو ائتگي‌لر و تاثيرلر گؤستره‌جه‌گينه اينانيرام.
دوكتور جواد هيئت
10/4/1386
اوخوجولاريميزين بيرچوخو”ايلين پارلاق اولدوزلاري”سئچکي‌لريندن اطرافلي معلومات‌لار آلماغا ماراقلي اولدوقلارينی بيان ائديب‌لر. همين سببه گؤره اليميزده اولان آمارلارين و سونوج‌لارين بير پاراسيني سيزين اوچون حاضيرلاديق. آرزو ائديريك كي سيزي ده راضي ائده بيلسين.
ايلين ان گوجلو يازيچيسي
بو قونويا 98 اوخوجو و 35 نظر صاحيبي قاتيليبلار. بيلديگينيز كيمي بو قونودا دوكتور ايواز طاها، دوكتور علي داشقين و ناصر منظوري جنابلاري ترتيب‌له ان چوخ سس‌لري قازانيبلار. توپلام 22 يازيچي بو قونودا سس‌لر قازانيبلار. بو يازيچي‌لارين آدلاري اليفبا سيراسي ايله بئله‌دير:
صمد جليلي، نگار خياوي، علي داشقين، رحيم رئيس نيا، حسن راشدي، ابراهيم رفرف، صمد سرداري‌نيا، ميرعلي سيدسلامت، همت شهبازي، عليرضا صرافي، ايواز طاها، منوچهر عزيزي، صالح عطايي، حسين فيض‌اللهي وحيد، رضا كاظمي، حسين محمدزاده صديق، ناصر منظوري، سعيد موغانلي، اسماعيل هادي، رضا همراز، جواد هيئت، زهره وفايي
ايلين ان گوجلو شاعيري
بو قونويا 160اوخوجو و 28 نظر صاحيبي قاتيليبلار . 3 پارلاق شاعيريميز محمدرضا لوايي ، كيان خياو و هادي قاراچاي اولماق شرطي ايله، آشاغيدا اليفبا سيراسي ايله قيد اولونان 24 شاعير سس قازانيبلار:
دومان اردم، نادر ازهري، عباس بابايي، محمد اسماعيل ثاني، ابوالفضل ثوابي، هوشنگ جعفري، لاله جوانشير، نيگار خياوي، علي داشقين، حميده رئيس زاده (سحر خانيم)، سليمان اوغلو، حسين شرقي، حيدر عباسي، مليحه عزيزپور، هادي قاراچاي، ائلوار قلي‌وند، آتيلا كيشي‌زاده، والي گؤزه‌تن، محمدرضا لوايي، اسماعيل مددي، سعيد موغانلي، شهريار نعمتي و محمدعلي نهاوند.
ايلين ان دگرلي كيتابي
101اوخوجو و 28نظر صاحيبي‌نين سس‌لرينه دايانماق اعتباري ايله «شعر وارليغين ائوي‌دير»، «آواوا» و «ساريشين» كيتاب‌لاريني ايلين ان دگرلي كيتاب‌لاري آدلانديرماق اولار. بونلاردان علاوه 28 باشقا كيتاب و توپلام 31 كيتاب سس‌لر قازانيبلار. بو كيتاب‌لار اليفبا سيراسي ايله بئله‌دير:
99حئكايه (زهره وفائي)، ائل باياتي‌لاري، اصلي كرم (ميرعلي سيدسلامت)، امپراتوري بزرگ هون (چئويرن: دوكتور داشقين)، آواوا (ناصر منظوري)، باش چيخاران اؤلوم (شعر توپلوسو، توپلايان: آيداش دلي سئل)، باغلاما پنجره‌ني، باكو شهر نفت و موسيقي (صمد سرداري نيا)، باياتي قوماشي، بو منم نيگار…(نيگار خياوي)، بير سالخيم دان‌يئلي، تاريخ ادبيات آذربايجان (م.كريمي)، تاريخ تبريز، تاريخ ده هزاره‌ي سلماس (توحيد ملك زاده)، تركان تهران، توركجه قديم طبي كيتاب‌لار(ميرهدايت حصاري)، جيلولوق فاجيعه‌سي (توحيد ملك‌زاده)، حاقا قارداش يارانميشام، سئوگي داموسو(دوكتور داشقين)، ساريشين (دوكتور داشقين)، سورگون(حبيب ساهير)، شعر وارليغين ائوي‌دير(دوكتور ايواز طاها) ، ضرب المثل‌لر، قاراقويونلولار (زهره وفائي)، قورشون هاردان آچيلدي (ايواز طاها)، كؤنول ساخسيسي (دوكتور داشقين)، گونش (هوشنگ جعفري)، گونش سسين‌دير باتير(م.لوائي)، نئجه يازاق (ايواز طاها)، نوم كيتابي (سليمان اوغلو) و هويت و زبان (صمد چايلي).
ايلين پارلاق گنجي
گنجلر باشليغي نه‌دنسه اوخوجولار طرفيندن بير چوخ ماراق قازانماسادا، نظر صاحيبلرينين ان چوخ ماراغين اؤزونه جلب ائدن موضوع اولموشدور. يالنيز 44 اوخوجو پارلاق گنج‌لرينه اؤز سس‌لرين وئرسه‌لرده، 36 نظر صاحيبي بو قونودا سس وئرديلر.
اوخوجولار و نظر صاحيب‌لري 23 گنجي پارلاق گنج كيمي سئچديلر. آنجاق بير چوخ‌لاري‌دا بونا تاكيد ائتديلركي پارلاق گنج‌لريميز بير يا ايكي نفر سئچمكله دئييل بلكه يوزلر پارلاق گنجيميزوار. آشاغيدا اليفبا ترتيبي‌ايله سس قازانان گنجلريميزين آدين گؤرورسوز.
آيدين آراز، دومان اردم، توركان اورمولو، ائلناز ايسلام‌وند، سيد حيدر بيات، رامين جهانگيرزاده، دالغا خاتين اوغلو، غفورخيوولو، آيداش دلي سئل، وحيد داوري، آرش ساعي، اوميد شكري، محمد صبحدل، مليحه عزيز پور، مهيار عليزاده، بهروز فتاحي، رضا كاظمي، مهدي نعيمي، آلما موغانلي، سعيد موغانلي و سعيد نجاري.
نظر صاحيبلرينين گؤروش‌لريندن اؤرنك‌لر
ابوطالب الهياري (توتقون)
شاعير و يازيچي، حرم ياپراغي، منيم پاييم ،حكايت سنگها اثرلري‌نين مؤليفي
ـ ايواز طاهانين ايستر شعر، ايسترسه ده نثر ادبياتيميزدا ياراتديغي دگيشيكليك و بوراخديغي اثرينه گؤره
ـ «دويغولارين ترنّومو» و«آذربايجان آشيق‌لاري»› آدلي، گوجلو تحقيقي كيتاب‌لارين يازيچيسي، اوستاد منوچهر عزيزي جنابلاري.
ـ خدآفرين درگيسينين سوروملو مودورو دوكتور حسين شرقي جنابلاري .
ـ آتيلا كيشي زاده‌نين يئني و بديعي فورمادا، سليس تورك ديليميزده غزل‌لري و هابئله حميده رئيس زاده «سحر» خانيمين اثرلري كلاسيك شعريميزي يئني‌لشديريب، گؤزللشديرمه‌لري اوچون.
ـ آيداش دلي‌سئل جنابلارينين حاضيرلاديغي آذربايجان چاغداش سربست شعر آنتولوژيسي ‹باش چيخاران اؤلوم› ان گؤزل و بارلي ايش‌دير.
بهروز ایمانی
يازيچي-ژورناليست
1-ايواز طاها- ديلين ساغلامليغي، محتوا دولغونلوغو و نثريميزه اؤزل اهميّت وئرديگينه گؤره و بير سؤزله يوكسك يئني‌ليك‌لره ييه‌لنديگي اوچون.
2-محمدعلي نهاوند ‹موغان›- كئچميش ادبي ايرثيميزي قوروماقلا ياناشي، يئني تركيب‌لرين و استعاره‌لرين ايشلتمه‌سي اوچون.
3-ديوان‌لغات الترك – دوكتور حسين محمدزاده صديق ‹دوزگون› آچيقلاماسي و چاغيميزدا گنج‌لريميزه گرك اثر اولدوغو اوچون.
4- محمد صبحدل- آذربايجان نثر ادبياتينا داير آتديغي آدديم‌لار و چيخارديغي كيتاب‌لارا گؤره.
دومان اردم
شاعير
1-ايلين ان چوخ ائتگي بوراخان يازيچيسي ايواز طاها (رومان‌لار و بديعي يازي‌لارينا گؤره).
2-ديليميزين اينکيشافي اوغروندا ان چوخ چاليشان شاعير سولئيمان اوغلو بي.
4- مدني چاليشمالارينا گؤره حؤرمتلي سعيد موغانلي ان چاليشقان و دگرلي گنجيميز اولا بيلر.
حسن راشدی
یازیچی
ایلین دگرلی کیتابی “قارداش‌لار و سرحدلر کیتابی”نین ترجومه‌سی‌دیر. باشقا سورغولارا کسگین جوابیم یوخدور.
اسماعيل جميلي
شاعیر و تبريزلي صائبين سئچيلمه بيت‌لري‌نين ترجومه‌سي اثري‌نين مؤليفي
1ـ من اوزاق غوربتده اولدوغومدان يازارلاريميزين چوخونلوقلاايشلريله ياخشي تانيش اولا بلمه ديگيم اوچون سورغونوزا يئترلي جاواب وئره بيلمه رم اؤزهلليکله يئني يازيلار و يازارلار ين دئيرلنديرمه سي بير ايکي ايشله دوزگون اولاسي دگيل آمما تانيش اولدوغوم يازيلار ايچينده ايواز بيک طاها منجه چوخ دولو و آخارلي يازيرلار . اؤز ديليميزده يازانلاردان سؤز گئدير.
2ـ تانيديقلاريمدان محمد رضا لوائي يازيسين و شعر دونياسين بئيه نيرم يئني بويالاري تيکراردان اوزاق سؤز ياراشيغي هابئله سوروملو انسان سئورليليک هاواسيله .آرا سيرا يئي يازارلاريميزين اؤز ديل ودويغو کؤکوموزدن اوزاق اولماسيني و آرينميش ساغلام سئوگي يئرينه بولانليق اومودسوزلوق اسديرمه سيني يئنيليک و مودرنليک عذريله اوزوله رک اوخوسامدا بير چوخ يازيلاري و دوشونجه چلنگين سئوه سئوه آلقيشليرام مليحه خانيمين نئچه گؤزل شعريني اوخوموشام هابئله باشقا دوستلارين
3ـ يوخاريدا دئديگيم کيمي سؤز صاحيبي اولماق اوچون بوراخيلان کيتابلاري و يازيلاري اوخوماق گرکير کي نه يازيق منيم چون اولاسي دگيل
4ـ …
رضا همراز
نئچه كيتاب يازيچيسي، شمس تبريز و حيدربابا قزئت‌‌لرينده يوزلر مقاله‌نين يازاني
1ـ هله‌ليك آردينجايام.
2ـ هله‌ليك آردينجايام.
3ـ گؤردوكلريمدن سيدآغا عون‌الهي‌نين «تبريز تاريخي» و توحيد ملك‌زاده‌نين «جيلولوق فاجيعه‌سي» گومان كي گؤزدن كئچيرديگيم كيتاب‌لارين ان دگرلي‌لريندنديرلر.
4ـ كاش كي تاپيب بيزه ده گؤستره‌سيز!
حيدر بيات
يازيچي- تنقيدچي
1ـ شوبهه‌سيز ايواز طاها. نييه کي اوچ ژانردا هم رمان و هم فلسفه و تنقيد باخيميندان، هم ده ديل سياحه‌سينده اوچ ديرلي اثر ادبي جامعه‌ميزه تقديم ائتدي. «قورشون هاردان آچيلدي»، و «شعر وارليغين ائوي‌دير» و «نئجه يازاق» کيتابلاري. عين حالدا دوکتور طاها يارپاق درگي‌سينده و باشقا درگي و سيته‌لرده اؤنملي مقاله‌لر يايیملايا بيلميشدي.
2ـ بو حاقدا کسين بير شئي دئمک اولماز. نييه کي شعرلرين هاميسي بيزيم اليميزه چاتماييب‌دير.
3ـ «آواوا» رماني ناصر منظوري‌دن. بو کيتاب آذربايجان تورکجه‌سينده هم رمان تکنيک‌لري باخيميندان هم ده ديل باخيميندان گوجلو بير اثر دير. کيتابين ضعف‌لري اولموش اولسا دا رقيبي اولماديقدان هله‌ليک ايلين ان گوجلو اثري حيساب اولا بيلر.
4ـ کيمسه‌ني ترجيح وئره بيلمه‌ييرم. آنجاق رامين جهانگير زاده، سعيد موغانلو، سعيد نجاري، نويد محمدي، بهروز فتاحيني بو آرادا آد چکه بيله‌جه‌يم. رامين اوشاق شعرلريني چاپ ائتدي‌يينه گؤره و هابئله يارپاق قزئتينده فعاليت‌لرينه گؤره، سعيد موغانلو ياشماق درگي‌سينده و باشقا کيتاب‌لارين ائديتينه گؤره، سعيد نجاري انگليسجه‌ـ تورکجه سؤزلوک‌لرينه گؤره، نويد محمدي مدني ايلگي‌لرده چابالارينا و هابئله حيدربابا درگي‌سينده سورکلي چاليشديغينا گؤره، و بهروز رويالارين سايتي‌نين اداره‌سينه گؤره.
همت شهبازي
نقد شعر معاصر آذربايجان كيتابي‌نين مؤليفي
1ـ بوحاقدا چاليشقانليق‌لارین آزاجيق اولماسينا باخماياراق، ظنيمجه « صالح عطايي »نين « منيم آدلاريم » اثريني سئچمک اولار. ديل قورولوشونون اؤزگه‌لشمه‌سينه و نحوي نقصان‌لارينا باخماياراق، بو اثر دونيادا گئدن«پست مدرن ليک» اوزه‌رينده يازيلان اثرلر سيراسينا داخيل اولدوغونا گؤره و عوموميتله ائله دونياميزدا گئدن «پست مدرن‌ليک» اؤزه‌لليک‌لريني عکس ائتديريب آراشديرماسينا گؤره اؤنم داشيير. البتده بو باخيمدان «ناصر منظوري»ني و هله‌ليک کيتاب بيچيمينده اثرلري ياييملانمايان «رضا کاظمي»ني ده نظردن قاچيرمامالييق. اونون اثرلري مختليف درگي و قزئت‌لرده ياييملانيبدير.
2ـ بو سورغونو يالنيز من «هادي قاراچاي» دئيه جاوابلانديرا بيله‌رم. او، اؤلکه‌دن قيراقدا ياشاماسينا باخماياراق، ده‌يرلي شعرلري گؤزدن يايينمامالي‌دير. اونون يايملانان کيتابلاري «بئچه‌لر بانلاياندا » و « بادامليق‌لار»دير. ايلک اثري حاقدا يوخاريدا آدي گئدن کيتابيمدا و آذري درگيسي نين 6-جي ساييندا بير تنقيدي مقاله يازميشام. ايکينجي اثري 1384 ده ياييملانيبدير و ائله ايلک اثري کيمي، آذربايجان اجتماعي داورانيش و ديل قورولوشونو و شعرسل فورماسيني اؤزه للشديردييي اوچون اؤنم داشيير. بورادا خالقيميزين ياشاييش گؤرونتولري هئچ بير شعارا اساسلانمادان يوزولاراق انساني ده‌يرلرين نوماييشي ايله سونوجلانير. هادي‌نين شعري جانلي ائتنيک گؤروش‌لري ياشاداراق انسان سئورليک داورانيش و دويغولاريني دا بيزده اويادير.
3ـ منجه ايلين اَن ده يرلي کيتابي ايواز طاهانين «شعر وارليغين ائوي دير» آدلي کيتابي اولمالي دير. بونا گؤره کي يئني نظري قونولارا قاتلاشان ايلک کيتاب دير. اونون اؤنميني آرتيران باشقا شئي، بو يئني قونولاري آخارلي و شيرين بير ديل ايله بيزه چاتديرماسي‌دير. نظري قونولارين قيتليغي چاغدا بئله بير آخارلي ديل ايله يئني قونولارين يوزوملانماسي اؤز ده‌يريني گؤسترمک‌له ديليميزين يئني قونولاري عکس ائتديرمک باجاريغينا ماليک اولماسيني دا تصديقله‌يير. البتده بو کيتابدان سونرا آيداش دلي‌سئلين حاضيرلاديغي «باش چيخاران اؤلوم» آدلي آذربايجان چاغداش سربست شعر آنتولوژيسيني ده گؤزدن قاچيرمامالیييق.
4ـ بو حاقدا سورغونوزدا «گنج» سؤزو اولماسايدي مدني ايشلرله باغلي «اختر يايين ائوي» نين آذربايجانجا ياييملاديغي کيتاب‌لارا و مدني چاليشماسينا گؤره، اونو ايلين ده‌يرلي مدني ايشچيسي کيمي ده‌يرلنديره‌رديم.
اوستاد دوکتور حسین صدیق
1ـ ايواز طاها يارپاق درگي‌سينده، «شعر وارليغين ائوي‌دير» و «قورشون هاردان آچيلدي» كيتاب‌لارينداكي يازيلاري اوچون.
2ـ محمد اسماعيل ثاني (ممدلي). «ايكي كؤنول بير آرزو» ، «حيات سيناغي»، «دورنالار قاييداندا» و «هؤنكور’سازيم» كيتاب‌لاري ايله شعر دونياميزدا بؤيوك ايزلر بوراخيب و اونون شعرلري‌نين ملاحتي و آخارليغي چوخ دگرلي‌دير.
3ـ «آواوا» فولكلوروموزدان گؤزل يارارلانماسي اوچون، «شعر وارليغين ائوي‌دير» تنقيده دوزگون يول آچديغي اوچون.
4ـ سعيد موغانلي، شعر دونياسيندا صميميليگي، اورك جوشغونلوغو و ايضطيراب‌لاري اوچون.
حميد شافعي
بيليم يولو درنگي‌نين باشقاني
1ـ هشتاد بئشینجی ايلينين ان گوجلو یازیچیسی منوچهر عزیزی جناب‌لاری، درین معنایلا یازدیقلارینا برابر تورک دیلی ساحه‌سینده نثرلری و قلم‌لری گوجلو دور.
2ـ ان گوجلو شاعیر، هوشنگ جعفری جناب‌لاری،درین دویغولودورلار و شعرلری روان شعرلردیرلر.
3ـ «من گونش» آدلی شعر توپلوسون چوخ بگه‌نیرم.
4ـ نوید محمدی، جان یاندیریجی چالیشقان و صداقتلی جوان‌لاریمیزدان‌دیر و اسیرگمه‌دن مدنیت یولوندا چالیشمالارینا گؤره بو جوانی چوخ سئوه‌رم.
سعيد ملازاده
ارك يايين ائوي
1ـ ايواز طاها: بو يازيچي ادبياتيميزدا بؤيوك اينقيلاب‌لاردا يارادا بيلر، طاها جناب‌لاريندان گله‌جكده داها چوخ سؤزلرائشيده‌جه‌ييك.
2ـ هوشنگ جعفري: او ميلّتين سؤزلرينی چوخ گؤزل شعره گتيره بيلير. «گونش» آدلی جناب هوشنگ جعفري‌نين شعر دفتري، موشتري‌لر طرفيندن ان چوخ ايسته‌نيلن كيتاب‌لاردان‌دير و اوستده دئديگيم سؤز همين ايشين سببي‌دير.
3ـ «قورشون هاردان آچيلدي»: ايواز طاهانين يازديغي بو رومان، رومان يئرينين بوشلوغون دولدورماسا دا بو قاپي‌نين باغلي قالماغينا مانع اولور.
4ـ سعيد موغانلي: هم چوخ ياخشي شاعيردير و هم ادبياتيميزا عاييد جيدّي چاليشمالاردا او جومله‌دن ياشماق درگيسينين ياييلماسينا چوخ يارديم ائدير.
رامین جهانگیرزاده
شاعیر و یازیچی
1ـ ایواز طاها. بیرینجی، یارپاقدا گئدن یازیلاری اوچون. ایکینجی، «شعر وارلیغین ائوی‌دیر»، «نئجه یازاق» و «قورشون هاردان آچیلدی» اثرلری یاراتدیغی اوچون.
2ـ یئنی فورمادا و گوجلو شعرلر اوخودوم، آنجاق ادبیاتیمیزدا گئنیش ساحه ده یول آچان و تأثیر باغیشلایان هئچ بیر شاعیر گؤرمه‌دیم.
3ـ «قورشون هاردان آچیلدی». بیرینجی، گؤزل و دوزگون بیر دیله مالیک اولدوغو اوچون. ایکینجی، اوندا اولان تمثیل و یئنی فورمادا اولان تصویرلر اوچون.
4ـ مهیار علیزاده ـ مدرن طرح‌لرله نشریاتدا یئنی بیر جیغیر یول آچدیغی اوچون.
محمدرضا لوایی
شاعیر
حؤرمتلي قارداشيم، درين دوشونجه‌لي يولداشيم نويد محمدي جنابلاري ، كئشگه بو آغير ايشي منيم بوينوما قويماييب مندن واز كئچه‌يدينيز. من سيزين وئرديگينيز وارليغي يوخلوغومدا وار دئييب وارلانديم. اؤزون دئديگين كيمي ‹وارين وئرن اوتانماز›. نه‌دي گيله‌م؟ گؤسترديگين –ايستر درين، ايستر داياز يئني‌ليك‌دير. بام باشقا، بم بياض. سوموك دئييل، ايليك‌دير. بو سئچگي‌ده چوخوسونون ايچري دونيالاري منيم ايچين آچيقلاندي. ايچيمده چوخوسو بئجريب چوخوسو ياندي . من بير بؤيوك حيرت اؤنونده دايانديم . بير پارالارينين يازيچي شاعير تاپماديقلاريندان اوتانديم! باغيشلا قارداش. من بير، ايكي، اوچه سيغمازام. واخت‌سيز چالينان سازام. سورولارينيزا بئله‌جه جاواب وئرمه‌يي سئويرم. قاييديم اؤز سالقاما، دئييرم. دئديگيم بير پارالارينين گؤزلريندن باخسايديم، سولئيمان اوغلونو، والي‌ني، لاله‌ني، نيگاري، اسماعيل مددي‌ني، كياني، صفري‌ني، ازهريني، قاراچايليني،… و نهايتده شعريميزين ياشاميني گؤررديم. اؤنجه شاعيرلرين آديني چكمكدن عوذور ديله‌ييرم. آخي من ده سينيق سالخاق بير شاعيرم. سونرا وارليقدان توتوب سيزين بو بير صحيفه قدر بوراخديغينيز نثر ايزلريني گؤررديم. بيزيم مؤحتشم و بؤيوك يازي‌لاريميز، يازيچي‌لاريميز واردير. يازي-ايستر بير ايكي صحيفه – يازي‌دير. يازيچي باشقا بير يازي .
دوكتور هيئتين، دوكتور صديق جنابلارينين قلميندن توتوب،لاله جوانشيرين سيته‌سيندن(1) تؤكولوب رؤيالار سيته‌سينده دايانيب سيزين صحيفه‌نيزه دالارديم. صرّافي جنابلارينين ديلماجيندان باش آليب ايوازين بوراخديغي يازي‌لارينا سوزولرديم. من او بير پارالارينين گؤزلريندن باخسايديم تبريز، اورمو، تئهران، اردبيل و باشقا شهرلريميزده انجمن آدلي شعير ييغينجاق‌لاريندان، يازي اوتاق‌لاريندا ميليون-ميليون ايلدن يانان اولدوزلاري گؤررديم. بلكه ده نبي دئميشكن ايشيق‌لاري هله بيزه چاتماييب. من پارلاق گنج‌لري، مليحه‌لري، ائلنازلاري، صفري‌لري، آيدين آرازلاري، توركان‌لاري، يونيس صفدري‌لري، كاظمي‌لري ،دالغالاري، حيدر بيات‌لاري، دومان‌لاري، اسلامي‌لري، نويد محمدي‌لري، رامين‌لري، زينال‌لاري، مهيارلاري و…گؤررديم. هله بير چوخوسو شاعير يازيچي آردينجا آوارا گزينجه من آد چكدييم شاعيرلري، يازيچي‌لاري خصوصي ايله آد چكمه‌دييم شاعيرلري،يازيچي‌لاري تاكيد ائديرم. آد چكمه‌ديگيم‌لري – اورگيمه باسيب اونلارلا بو بير ايكي گونلوك آجي عؤمرومو باشا چاتديرارديم. من اونلارين يئرينه اولسايديم سياسي باخيش‌لاريمي، ميزيمين اليمدن چيخماق قورخوسونو ديشاري توللاييب، گؤزلريمه سومبادا چكيب گونئي‌ده آخان آخيمي آيدينجاسينا گؤررديم. داها دوغروسو چكديگيم آدلاري، چكمه‌ديگيم آدلاري ساچ كيمي هؤررديم. وارليغي، ديلماجي، توركو درگي‌لري، توركو صحيفه‌لري سونرا بوراخيلان كيتاب‌لاري اوخويوب دويارديم. «شعر وارليغين ائوي‌دير»، «آواوا»، «بو منم نيگار…»، «بير سالخيم دان يئلي»، خصوصي ايله «نوم كيتابي» و بير چوخ كيتاب‌لار آهان آهان «باش چيخاران اؤلوم» نه‌دن اونلارين گؤزل گؤزلرينه –گؤز ديمه‌سين!- گلمه‌ييب‌لر نه‌دن؟!
منجه بو ايلين گوجلو ژورناليست‌لري، تنقيد‌چي‌لري، تاريخچي‌لري… اونودولمايايدي كاش.
آما بو قدر آغيرليغي بير اينجه صحيفه داشييا بيلمز. بونو آيدينجاسينا دويورام. نويد بَي، من سئچديگيم اينسان‌لار يالنيز بو ايل يوخ بلكه مين ايل‌دير سئچيليب‌دير. اونلار هر آن ايچريمده پارلاييرلار. اونلارين هاميسي بير نفردير، ايل‌لرين هاميسي بير ايل . قورخورام دوست‌لاريم، قورخورام بئله‌جه بير سئچگي‌لرده تنهاليق‌لاريندان ياغيب ياغيب دالغالانان گنج شاعيرلرين آديني بيلمه‌دن اونلارا خيانت ائديم . آخي هله بير چوخ گوجلو يازيچي‌لاريميز، شاعيرلريميز، يازي‌لاريميز، شعيرلريميز ايمكانسيزليقدان، يالنيز اؤزلرينده قالماقدان اوزه چيخماييبلار. ياني من اونلاري گؤرمك ايچين دايازام. من اوتانيرام اونلارين درينليينه جوموب بوغولماقدان . گؤزل دوستوم نويد محمدي جنابلاري، سيزين بو ايشينيزدن تقدير ائتمك بورجوموز اولسون. سؤزومون اؤزتي بودور. بو ايل كيمسه بير سطير يازي، بير تيكه شعير يازيب‌سا منيم سئچگيم اولا بيلر. منه بو قدر يئتر. آي منيم پارلاق اولدوزلاريم، پارلاييب قارانليغيمي يانديرديغينيز ايچين سيزدن ممنونام . گؤرورسونوز ياديمدان چيخدي؟ هله نئجه‌سينيز؟ هئي نويد،هئي اوخوجولار، سالام. (1ـ باراما ادبي سيته‌سي)
عليرضا صرافي
ديلماج درگيسينين مسئول موديري
آذربايجان خالق ادبياتي، تورکجه واللي‌لي ايل‌لرده آذربايجان اؤيرنجي حرکتي اثرلري‌نين مؤليفي
1ـ ناصر منظوري، اسماعیل هادی، ابراهيم رفرف، ايواز طاها و نيگار خياوي. يازيلاري تاماميله اؤزوملشميش و اؤزل بير يازي سبکي و قلم شيوه‌‌سينه چاتا بيلديکلري اوچون.
2ـ اسماعيل مددي، لوائي، آتيلا کيشي‌زاده. شاعيرجه‌سينه دوشونوب، يازديقلاري اوچون. سؤزلرده يئني حاديثه و اينقيلاب ياراتديقلاري اوچون، کئچميش‌لردن قيدالانيب، آما کئچميشده دايانمامالاري اوچون.
3ـ ادبياتدا «آواوا» ناصر منظوري‌دن. اثرين اؤزونده، هم ده اثرين ديلينده بير ميتولوژيک آب و هواني ياراتديغي اوچون. تاريخده «تاريخ ده‌هزار ساله‌ي سلماس»(دکتر توحيد مل‌کزاده، بير شهريميزه عايد چوخلو انسکلوپديک معلومات وئرديگي اوچون، (يازيچي بير چوخ قايناق‌لارا او جومله‌دن تورکيه آرشيولرينه ده موراجيعت ائديب، اثريني علمي بير سويه‌ده يازابيلميشدير، کيتابداکي بعضي بيلگي‌لر ده بيرينجي دفعه اولاراق علم عالمينه تقديم اولموشدور.)
4ـ ميليون‌لارجا گنجين ايچينده آنجاق بير نئچه يوزونو آز- چوخ ياخيندان تانييا بيلميشم. تانيديقلاريم ايچينده نويد محمدي‌ني اؤرنک اولاراق آد چکه بيلرم، باشيني ساليب ايديعاسيز، بير نئچه نفرين ايشيني تک باشينا گؤردوگو اوچون؛ يئرسيز دئدي-قودولارا قاتيليب، واقتيني ايترمه‌ديگي اوچون؛ بير گنج کيمي اؤزون يئتيشديره بيلديگي اوچون؛ بؤيوک‌لرله حؤرمتله ياناشيب، کيچيک‌لرله مهريبان اولدوغو اوچون…
سعيد موغانلي
شاعير
1ـ ناصر منظوري: جناب ناصر منظوري‌نين گؤزل يازيلارين اوخوياندا، آنا ديليمزده نه قدر گوجلو اثرلر ياراتماق يئري وار. تاسوفلر اولسون كي نثر ساحه‌سينده بو گونه قدر چوخلو بوشلوق‌لار گؤرونور.
2ـ كيان خياو: عرب ادبياتي‌نين بؤيوك شاعيرلريندن ساييلان نزار قباني و باشقالاري كيمي ، كيان خياو جنابلاري دا آذربايجان شعرينده موقاويمت و سئوگي‌ني، چيين-چيينه چوخ گؤزل ترسيم ائده بيلير.
هادي قاراچاي:هادي قاراچاي آوروپا مدرن شعريتين، آنا ديليميزده چوخ گؤزل ايفء ائده بيلير.
3ـ باش چيخاران اؤلوم : بو كيتاب بير چوخ شاعيرلريميزين شعريندن اؤرنك وئريلديگي اوچون ، بو گونكي شعر دونياميزين و شعريتيميزين بير پارچاسينين تمثيچي‌سي كيمي اولا بيلر.
4ـ آلما موغانلي: تهران دا ياشاماغينا باخماياراق، ديليميزده چوخ گؤزل شعرلر يازا بيلير. او شعرينده تصويرلري چوخ گؤزل يارادا بيلير و شعريت، شعرينده دالغالانير. توركان اورمولو: توركان دا گنج اولماغينا باخماياراق، شعرينده بديعي مضمون‌لاري چوخ گؤزل گتيره بيلير.
آیدین آراز
1ـ آنجاق ناصر منظوري نين اثري گوجلو گوروندو «آواوا» كيتابي.
2ـ من اوخودوغوم گونئي شئعرلري‌نين ايچينده سؤزسوز كي، محمد رضا لوايي‌نين «گونش سسين‌دير چیخیر» كيتابي‌دير.
3ـ ايواز طاهانين «نئجه يازاق» كيتابي ديرلي كيتاب كيمي و قيدالي اثر كيمي تانينا بيلر. گؤزل نثرله يازماق دويون‌لريني آچماق هوسي آچيقلانير بو كيتابدا.
4ـ منجه ائله نويد محمدي ديلماج و حيدر بابا درگي‌لرينده انر‍ژيك و درين حضورويلا بيز گنج‌لري گوزلجه‌سينه تمثيل ائده بيلدي. دوغروسو دا ائله بو گون گنجلر ایشلري قاباغا آپاريرلار.