آنجاق بعضن قورخولو جهت بوراسیندادیر کی، ادبییاتیمیز بوی آتدیقجا بویاتلاشا دا بیلر. دوغرودو بو گونلر ده ادبی آلاندا و نئت ده آز اولموشام و داها چوخ حیاتین ایش، سئوگی و دیگر گرکلی یؤنلری ایله اوغراشمیشام و هله ده ایلقارا سؤیله‌دییم کیمی منه ادبییاتین بوتونو سئوگیلیمین گؤزلری و باخیشی قدر اؤنملی دئییل، آنجاق بونونلا بئله، او قدر ده اوزاق دئییلدیم کی، باش وئرن حادیثه‌لردن خبرسیز قالیم، آزیندان اوخومادیقلاریمی دا اویان-بویاندان ائشیدیر و تعقیب ائدیردیم. یاخشی نه‌دیر بو بویاتلانما؟ آچیغینی سؤیله‌سم چوخدان ایزلرینی حیس ائتدییم ادبی قوروپلاشمالار بیر طرفینده دورور بونون. آخی نئجه دئییم بو قوروپلاشمالار فیکیر و دوشونجه آیریلیغی سببی ایله اولسایدی بلکه ده نورمال یاناشماق اولوردو، آنجاق آنلاشیلان بو دوستلوق اساسیندا آنلاشمامیش قوروپلاشمالار، داها چوخ اؤی منی، اؤیوم سنی. هر نه سن یازسان، قاداسی موکمملدی، فیل بورنوندان دوشنلریک بیز و نه بیلیم چاغداش آذربایجان ادبییاتی‌نین آتا آنالارینی آختارما قدر اوزون بیر پئپسی ماجرالاریدی. آما حئیف کی بو آتا آنالاری گئجه‌لر تک بوراخمادیلار، توخوم اکیلیب، محصول وئرمه ایمکاناتی اولمادی. بوش بوغازلیق ائتمه‌دن دئمه‌لییم کی بو یاریشمایا قاتیلمادیغیمین سببلریندن بیریسی همین بو وورغولادیغیم اولوردوسادا، دیگر یوندن حؤرمتلی ژوری هئیتینی بوتون تک-تکینه حؤرمتیمله یاناشی، اؤزومدن او قدر ده اوخوموش و منه داها بیر شئی بخش ائده بیلن، یا آچیغی تنقیدچی مقامیندا گؤرمه‌دییم ایدی. اؤزللیکله سایین روقیه خانیم کبیری و حامید احمدی دن داها یاخیندان ایلگی ده اولدوغوم اوچون عوذور دیله‌ییرم و اومورام کی اینجیمزلر مندن. آما هرحالدا بونو دئمک یالان دئمکدن داها یاخشیدی. دئمه‌مک ده حقیقتین بیر پارچاسینی گیزلتمکدی. بو یالنیز منه عایید دئییل، یاریشمادا ایشتیراک ائدنلرین بیر نئچه‌سی ده ژوری هئیتی قدر و بلکه داها چوخ باجاریقلیدیلار. اومورام بو جومله سهو آنلاشیلیب و فارسلار دئمیشکن حمل بر خودستایی فیلان اولماسین کی ساقین بئله دئییل، آنجاق یالان دئییه بیلمیرم کی شریف مردی‌نین حیکایه دیلین ژوری هئیتینده‌کیلردن داها چوخ بیه‌نیرم. بیر آز دا درینه گئتسک دوغرودور پروفئسیونال یازاریمیز اولمادیغی اوچون بلکه ده پروفئسیونال تنقیدچیمیز ده یوخدور، آنجاق نئجه دئیرلر آزدان-چوخدان بو دیل و ادبییاتین گوشه‌سیندن باخان بیریسی ده، نثر ادبییاتیمیزدا ائیواز طاها، محمد صوبحدلی، همت شهبازی و…گؤره بیلر آخی. آزیندان بیلیریک بونلار تنقید اوزره چالیشمیشلار، اؤزوم ایسه هر زامان سایین طاها بی‌ین یارادیجیلیغیندان اؤیرنمیشم. هر حالدا،باشقا بیر اؤزل سبب ده وار ایدی قاتیلمادیغیما، آما هر حالدا بورادا اؤزوم حقیقتین بیر آزین سیزه سانسور ائدیرم. خیلاصه دئسم، ایندی بو یاریشما بیتدیکدن سونرا بیر سیرا دوستلارین ائعتیراضی منی حاقلی دوشوندویوم قناعتینه گتیریر. نه‌یسه جیددی شکیلده گلیشن ادبییاتیمیزا، هر تور قوروپلاشمالاردان کنار ساغلام بیر فضا دا، داها پروفئسیونال یاریشمالار دیله‌ییرم. ادبییاتیمیز بوی آتدیقجا، اوجالسین اومورام.

· بو پوستو بویون ناهارچاغی یازماقدایدیم کی، تئلئفونوم زنگ چالدیغی اوچون بوراخیب گئتدیم و ایندی اونوتدوغوم مسه‌له‌لر ده اولدو بو آرادا. نوصرت دئمیشکن هامیسی سئوگیدندی. اونا گؤره بعضی سؤزلر یادیما دوشسه بلکه بو پوستا آرتیردیم دا.

http://azrurmia-urmiye.blogfa.com/post/1782